Вы тут

У Мінску праходзяць трэція Беларускія калядныя чытанні


Падчас іх былі падпісаны дагаворы аб супрацоўніцтве паміж Беларускай праваслаўнай царквой і Міністэрствам культуры, Міністэрствам працы і сацыяльнай абароны, Дзяржаўным камітэтам па навуцы і тэхналогіях, Нацыянальнай акадэміяй навук.


Фота БЕЛТА

Мітрапаліт Мінскі і Заслаўскі Павел, Патрыяршы Экзарх усяе Беларусі, адзначыў:

— Падпісаныя пагадненні — гэта сімвал жадання працаваць разам, ствараць наша жыццё. Зусім невыпадкова Беларусь з'яўляецца прыкладам для пераймання для многіх краін. У нас жывуць людзі самых розных веравызнанняў, кожны мае свой погляд на жыццё, але ўсе мы жывём у міры і згодзе. Наша спакойнае існаванне з'яўляецца яскравым пацвярджэннем нашых унутраных імкненняў — жыць у міры з самім сабой, з Богам, з усімі людзьмі, побач з якімі Гасподзь вызначыў наша жыццё.

Сваё прывітальнае слова да ўдзельнікаў трэціх Беларускіх калядных чытанняў накіраваў і міністр інфармацыі Беларусі Аляксандр КАРЛЮКЕВІЧ. У сваю чаргу першы намеснік міністра культуры Ірына ДРЫГА расказала:

— Гэта пагадненне з'яўляецца працягам даўніх і доўгіх адносін Міністэрства культуры з беларускай праваслаўнай царквой. Тыя праграмы, якія падпісаны паміж намі, не заставаліся толькі на паперы, але прыносілі добрыя плады. Напрыклад, узводзяцца культавыя пабудовы, робяцца роспісы, вырабляюцца мазаікі... Гэта і штодзённая праца бібліятэк, гарадскіх і раённых, тая работа, якую яны здзяйсняюць. У нашых музеях праводзяцца выстаўкі іканапісу, дэкаратыўна-прыкладнога мастацтва пачынаючы са старажытнасці і да нашага часу.

Цікавым з'яўляецца і падпісанне пагаднення аб супрацоўніцтве Беларускай праваслаўнай царквы з Дзяржаўным камітэтам па навуцы і тэхналогіях. Як растлумачыў намеснік старшыні гэтай установы Сяргей Шчарбакоў, раней паміж камітэтам і царквой падобныя дагаворы не заключаліся. Больш за тое, доўгі час лічылася, што падстаў для развіцця супрацоўніцтва паміж навукоўцамі і вернікамі няма.

«Мы зараз пакуль на пачатку шляху. Намі плануецца правядзенне сумесных мерапрыемстваў, у тым ліку канферэнцый, семінараў, абмен інфармацыяй, — расказаў Сяргей Шчарбакоў. — Сутнасць у двух сакраментальных пытаннях: першае — аднаўленне дыскусіі аб трыадзінстве ведаў, веры і светапогляду, другое — пытанне маральна-этычных нормаў і крытэрыяў».

Паводле спецыяліста, абедзве гэтыя тэмы важныя і для царквы, і для навукі. «Традыцыйна лічыцца, што рэлігія — гэта пра веру. Нехта нават скажа, пра безумоўную веру. Але калі мы на самай справе звернемся да рэлігійных тэкстаў і дыскусій, то ўбачым, што там ёсць і вялікая прастора для ведаў. Самае простае — веданне святых тэкстаў і іх аналіз».

На трэціх Беларускіх калядных чытаннях прысутнічаў таксама Надзвычайны і Паўнамоцны Пасол Малдовы ў Беларусі Віктар Сарачан і іншыя высокапастаўленыя асобы.

Ніна ШЧАРБАЧЭВІЧ

nina@zviazda.by

Загаловак у газеце: Жыць у міры

Выбар рэдакцыі

Грамадства

Захаваць. Нельга знесці

Захаваць. Нельга знесці

Знакі прыпынку нарэшце расстаўлены.

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.