Уладальніцай ганаровага тытулу «Студэнт года –2017» стала другакурсніца філалагічнага факультэта Гродзенскага дзяржаўнага ўніверсітэта імя Янкі Купалы Аляксандра РАДКОВІЧ. Пяць хлопцаў і пяць дзяўчат аспрэчвалі гэта званне ў фінале рэспубліканскага конкурсу, які прайшоў у сталіцы ў сценах Нацыянальнай бібліятэкі. А ўсяго ў адборачных турах, якія адбыліся ў 42 ВНУ, узялі ўдзел 292 студэнта.
Фінал у гэтым годзе быў аб’яднаны агульнай тэматыкай «Беларусь – крыніца натхнення». Але толькі Аляксандра Радковіч, будучы настаўнік беларускай мовы і літаратуры, адзіная з фіналістаў аказалася верная роднай мове ад пачатку і да канца. З журналістамі пасля сваёй перамогі яна таксама размаўляла толькі на мове. Прызналася: «У мяне ёсць цікавы, на мой погляд, праект, скіраваны на папулярызацыю беларускай мовы і беларускай культуры сярод моладзі праз сучасныя віды мастацтваў. І таму ў наступным годзе я хачу прадставіць яго ў рэспубліканскім конкурсе «100 ідэй для Беларусі».
У людзях Аляксандра цэніць, перш за ўсё, шчырасць, бо яе не купіш ні за якія грошы. Другая якасць – гэта ўпэўненасць у сабе, бо яна патрэбная як у паўсядзённым жыцці, так і ў асабліва адказныя моманты. І трэцяя якасць – гэта творчасць. «Люблю творчых асоб, яны заўсёды натхняюць мяне на новыя адкрыцці», – прызналася яна.
На другім месцы пасля падсумоўвання ацэнак журы аказаўся курсант чацвёртага курса факультэта міліцыі Магілёўскага інстытута МУС Максім ПАТАРАНКА. «Я не толькі будучы страж правапарадка, які «ЗАЎСЁДЫ Ў ФОРМЕ», але і вельмі цікавая, творчая асоба, якая марыць стаць сапраўдным ГЕНЕРАЛАМ!», – жартуе ён сам пра сябе.
Трэцяе месца – у студэнта другога курса факультэта эканомікі і бізнес-кіравання Віцебскага дзяржаўнага тэхналагічнага ўніверсітэта Руслана НОВІКАВА. «Я чалавек творчы, таму і гляджу на свет праз прызму мастацтва, – канстатуе хлопец. – Ніколі нельга губляць аптымізму і пачуцця гумару. Дабрыню, шчырасць, бескарыслівасць і спагадлівасць – цаню ў людзях больш за ўсё. Лічу, што ў жыцці чалавек не павінен спыняцца на дасягнутым. Быць пастаянна ў руху, адкрываць для сябе новыя сферы жыцця, ставіць мэты і іх дасягаць – залог майго поспеху. А ўдзел у конкурсе «Студэнт года» – гэта яшчэ адзін верны крок на шляху да самаўдасканалення».
Арганізатарам праекта, скіраванага на развіццё лідарскіх якасцей і падтрымку творчага патэнцыялу студэнцкай моладзі, выступае Беларускі рэспубліканскі саюз моладзі пры падтрымцы Міністэрства адукацыі нашай краіны . Конкурс праводзіцца пачынаючы з 2011 года: за мінулы час тытул «Студэнт года» пяць разоў запар даставаўся дзяўчатам. Невыпадкова жартавалі, што трэба перайменаваць конкурс у «Студэнтку года». Летась гэту традыцыю перарваў Дзмітрый Куксо – студэнт Полацкага дзяржаўнага ўніверсітэта. Сёлета ён быў запрошаны ў журы. Але, нягледзячы на даволі моцную канкурэнцыю ў фінале з боку мужчын, дзяўчаты зноў вярнулі сабе «пальму першынства».
Надзея НІКАЛАЕВА
Фота Ганны ЗАНКАВІЧ
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
