Новы год і Каляды – адны з самых любімых святаў і дарослых, і дзяцей. Многія спадзяюцца, што наступны год будзе лепшым, чым папярэдні. Многія вырашаюць пачаць жыць па-новаму ("абавязкова буду добра вучыцца, слухацца тату і есці ўсё, што згатуе мама!"). І ўсе абавязкова імкнуцца выбраць самыя лепшыя, незвычайныя і карысныя падарункі для родных і блізкіх. Я не магу не параіць выдатныя экалагічныя падарункі, якія зменяць жыццё да лепшага.
1. Лічбавы экалагічны гаджэт Flower Pod. Яго прыдумала дацкі дызайнер Кэтрын Р. Кнудсэн. Гэты апарат у выглядзе кветкі правярае ўзровень спажывання энергіі ў кватэры і "вяне", калі ён перавышаецца.
2. Тэлефоны сёння ёсць у кожнага, і зараджаць іх трэба часта. Энергазберагальная зарадка iYo для iPhone – гэта адмысловая прылада, якая вырабляе і акумулюе энергію падчас уласнага кручэння.
Цяпер ты і твае аднакласнікі можаце проста гуляць у Yo-Yo, а айфон атрымае бяспечную чыстую энергію. І дзецям весела, і прыродзе ніякай шкоды! Дарэчы, да такой падзарадкі можна падключаць не толькі тэлефон, але і іншыя партатыўныя прылады.
3. Гэты падарунак будзе ідэальным для любімых бабулі і дзядулі. Седзячы ў адмысловым крэсле-качалцы (распрацоўшчык – Пётр Новак), можна чытаць пры святле ўбудаванай лямпачкі, а энергія для яе выпрацоўваецца ад руху крэсла.
4. Парайце сваім бацькам купіць для сябе ці ў падарунак сваякам паветраны фільтр для памяшкання (неабходная рэч у гарадскіх умовах!). "Што ж тут незвычайнага?" – спытаеце вы. Сама тэхналогія вельмі экалагічная. Дзякуючы ёй паветра ў пакоі прымусова ўсмоктваецца і прапускаецца праз глебу і каранёвую сістэму расліны і тым самым ачышчаецца ад шкодных рэчываў.
5. Зубная шчотка ў якасці падарунку? Чаму б і не! Памятаеце, у школе распавядалі пра афрыканскае племя, жыхары якога чысцілі зубы, разжоўваючы палачку? У XXI стагоддзі мы прыйшлі да таго ж! Сёння модна чысціць зубы місвакам. Усяго некалькі сантыметраў дрэва арак рэкамендуюць разжоўваць да стану пэндзліка два разы на дзень. Валокны добра счышчаюць налёт і перашкаджаюць размнажэнню бактэрый.
Спадзяюся, што такія падарункі спадабаюцца вашым блізкім. Добрага вам настрою і вясёлых святаў!
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».