Уручэнне падарункаў ад Прэзідэнта краіны праходзіць на Гомельшчыне. Віншаванні з навагоднімі і каляднымі святамі і каля 600 падарункаў атрымалі выхаванцы Гарадзецкай і Улукаўскай дапаможных школ-інтэрнатаў, спецыяльнай агульнаадукацыйнай школы № 70, Гомельскай абласной дзіцячай клінічнай бальніцы і абласнога дома дзіцяці. Падарункі ўручалі прадстаўнікі дэпутацкага корпуса.
У межах дабрачыннай акцыі «Нашы дзеці» кіраўнікі рэспубліканскіх органаў дзяржкіравання, мясцовых выканаўчых і распарадчых органаў наведвалі дзіцячыя інтэрнатныя ўстановы, апякунскія і прыёмныя сем'і, дзіцячыя бальніцы. У спецыяльнай агульнаадукацыйнай школе № 70 Гомеля для навучэнцаў з парушэннем слыху ганаровую місію ўручэння падарункаў выканаў намеснік старшыні Гомельскага гарвыканкама Віталь Атаманчук. Ён разам з Дзедам Марозам, Снягуркай і героямі вядомых мультфільмаў уручыў дзецям цацкі, якія развіваюць, і настольныя гульні. Прадстаўнік улады падкрэсліў, што традыцыйная дабрачынная акцыя «Нашы дзеці» ніколі не згубіць сваёй актуальнасці:
— Напэўна, у назве самой акцыі — яе галоўны сэнс: увага дзяржавы да нашых дзяцей. У гэтай школе навучаюцца дзеці з асаблівасцямі развіцця. Дарэчы, яны не раз станавіліся пераможцамі розных абласных і рэспубліканскіх конкурсаў і спаборніцтваў. Амаль усе навучэнцы ўстановы наведваюць спартыўныя секцыі.
У спецыяльнай агульнаадукацыйнай школе № 70 Гомеля цяпер атрымліваюць адукацыю 82 вучні з рознай ступенню парушэння слыху. Навучанне вядзецца з выкарыстаннем гукаўзмацняльнай апаратуры калектыўнага карыстання, тэхнічных сродкаў, якія забяспечваюць перадачу навучальнага матэрыялу і іншай інфармацыі.
Больш за 200 навагодніх падарункаў ад кіраўніка дзяржавы атрымалі дзеці, якія па стане здароўя вымушаны сустракаць святы ў стацыянары гомельскай абласной клінічнай бальніцы. Салодкія прэзенты ім перадалі старшыня абласнога Савета дэпутатаў Алег Барысенка і дэпутат Палаты прадстаўнікоў Нацыянальнага сходу Беларусі Мікалай Васількоў. Госці пажадалі маленькім пацыентам як мага хутчэй акрыяць і вяртацца дадому:
— Перад Калядамі кожнае дзіця чакае цуду і жадае атрымаць падарунак, — адзначыў Алег Барысенка. — Штогадовая дабрачынная акцыя яшчэ раз пацвярджае, што Прэзідэнт Беларусі Аляксандр Лукашэнка клапоціцца ў першую чаргу пра дзяцей — будучае нашай краіны. Невыпадкова ўзвядзенне новага комплексу дзіцячай абласной бальніцы ў Гомелі знаходзіцца пад пільным кантролем кіраўніка дзяржавы.
Ірына АСТАШКЕВІЧ
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
