У некаторых яшчэ толькі заканчваецца зімовая паслясвяточная хандра, але ёсць і тыя, хто ўжо аб'ездзіў практычна ўвесь Паўднёваамерыканскі кантынент па самых цяжкапраходных маршрутах трох краін. Каманда «МАЗ-СПОРТаўта» з 6 па 20 студзеня ўдзельнічае ў 40-м ралі-марафоне «Дакар-2018» у Перу, Балівіі і Аргенціне. Гонка набліжаецца да завяршэння і ўвесь гэты час здзіўляла гледачоў і ўдзельнікаў сваёй складанасцю і непрадказальнасцю. Пілоты беларускай каманды са сваімі экіпажамі вядуць жорсткае змаганне за трэцяе месца ў агульным заліку.
Натуральны адбор
У заліку грузавікоў адбываецца барацьба за выжыванне. У самым пачатку ў Ліме стартавалі 42 машыны, а ўжо на пятым спецучастку выйшлі толькі 20 аўтамабіляў. З-за розных перашкод больш за палову ўдзельнікаў сышло з дыстанцыі, многія з іх зарабілі штрафны час. «Прагназаваць тут нічога немагчыма», — пра гэта неаднаразова казаў пілот каманды «МАЗ-СПОРТаўта» экіпажа № 512 Сяргей Вязовіч. Самы складаны, на думку гоншчыкаў, пяты этап ралі-марафону «Дакар» у заліку грузавікоў завяршыўся перамогай Эдуарда Мікалаева з каманды «КАМАЗ-майстар». Другое месца заняў пілот каманды «МАЗ-СПОРТаўта» Сяргей Вязовіч, адстаўшы ад лідара дня ўсяго на шэсць хвілін. На пятым этапе гоншчыкам трэба было праехаць амаль 1000 км. Менавіта гэтая частка гонкі стала фатальнай для двух фаварытаў: Себасцьяна Лёба з каманды Реugеоt і леташняга пераможцы ў катэгорыі квадрацыклаў Сяргея Каракіна. І гэты ж этап ледзьве не змяніў расстаноўку сіл у катэгорыі грузавікоў.
Далей экіпаж беларускай каманды Сяргея Вязовіча змог захаваць трэцяе месца ў заліку грузавікоў пасля шостага этапу ралі. Кожны дзень арганізатары робяць сюрпрызы, і чарговы спецучастак не быў выключэннем. Грузавік Сяргея Вязовіча апошнія 20 кіламетраў аж да фінішу ішоў у поўнай цемры. Як вынік, фінішавалі пятыя. На сёмым этапе найлепшы беларускі экіпаж на сваім МАЗе фінішаваў шостым, а экіпаж Аляксандра Васілеўскага трапіў у прамоіны і выбіраўся з іх з дапамогай Сяргея Вішнеўскага. У выніковым заліку грузавік Вязовіча па-ранейшаму ўтрымліваў трэцяе месца. Але ўжо ў ходзе восьмага этапу ралі-рэйду яго адсунулі на чацвёртую пазіцыю ў агульным заліку. Два іншыя экіпажы «МАЗ-СПОРТаўта» — Аляксандра Васілеўскага і Сяргея Вішнеўскага — займаюць 15-ы і 17-ы радкі генеральнай класіфікацыі.
Страсці па Балівіі і прагнозы
Каманды ўспаміналі не самымі добрымі словамі надвор'е ў Балівіі — ліўневыя дажджы, размытыя дарогі, цяжкія пераправы цераз рэкі. У цэлым балівійскія этапы па рэльефе не ўяўляюць складанасцяў для іх фарсіравання, але з-за клімату тэхніка паводзіла сябе непрадказальна. У панядзелак каманды сэрвіснай падтрымкі працавалі без перадышкі, падрыхтоўваючы баявыя машыны да наступнага спецучастка. У мінулым — двухдзённы марафонскі этап, дзе экіпажы знаходзіліся без тэхнічнай падтрымкі. Для каманды «МАЗ-СПОРТаўта» марафонскі этап склаўся не самым лепшым чынам. Першы марафонскі дзень прайшоў нядрэнна — экіпаж Сяргея Вязовіча без праблем пераадолеў спецучастак, яму нават удалося павялічыць адрыў ад Дзмітрыя Сотнікава і Айрата Мардзеева. Таксама беларусы літаральна дзве хвіліны прайгралі «ЛіАЗу». Але другі марафонскі дзень усё змяніў: на старце спецучастка Вязовіч трохі памыляецца і трапляе ў саланчакі, адкуль самастойна выбрацца ўжо не можа. Дзякуючы дапамозе экіпажа «КАМАЗ-майстар» Антона Шыбалава беларусы працягнулі «Дакар».
«Калі б не ён, мы чакалі б нашых хлопцаў вельмі доўга, улічваючы іх месца ў стартавым лісце на дзень. Мы вядзём барацьбу з іншымі экіпажамі «КАМАЗ-майстар», але ўчынак экіпажа Шыбалава быў вельмі высакародны, ён нас не пакінуў у бядзе», — адзначыў Сяргей Вязовіч.
Другая частка заключнага спецучастка прайшла амаль гладка, але прыкладна за дзевяць кіламетраў да фінішу ў грузавіка № 512 выбухае левае пярэдняе кола. Але і гэта яшчэ не ўсё. Гоншчыкаў абвінавацілі ў пашкоджанні чужой машыны Tоуоtа і пакаралі на 20 хвілін, якія вельмі важныя ў барацьбе за трэцяе месца. Таксама ў выглядзе «бонусу» выпісалі 300 еўра штрафу.
«Вельмі крыўдна. Тыя, хто ўважліва сочыць за табліцай вынікаў, заўважылі штраф у 20 хвілін, які мы зараз спрабуем аспрэчыць. Гэта наступствы 9 студзеня, калі быў інцыдэнт у дзюнах. Прадастаўленае відэа ан-борд ёсць у арганізатараў, і работа па спрэчцы вядзецца», — расказаў Сяргей Вязовіч.
Наперадзе пяць этапаў, але сапраўдная барацьба, хутчэй за ўсё, разгорнецца на трох з іх. Складана прагназаваць ва ўмовах «Дакару», але спецучастак «Фіямбола» можа стаць сапраўды хвалюючым, бо там ўдзельнікаў зноў чакаюць пяскі! А спецучастак працягласцю 522 кіламетры адназначна ўнясе свае карэктывы.
Ілья КРЫЖЭВІЧ
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
