Вы тут

Асноўная частка беларускіх алімпійцаў адправілася ў Пхёнчхан


Да старту Гульняў-2018 застаецца роўна тыдзень. Напярэдадні ў Пхёнчхане адбылася цырымонія адкрыцця алімпійскай вёскі, у ёй прынялі ўдзел кіраўнік аргкамітэта Лі Хі Бом і прэзідэнт Нацыянальнага алімпійскага камітэта Рэспублікі Карэя Лі Кі Хын. Над алімпійскай вёскай былі паднятыя сцягі ўсіх краін — удзельніц Гульняў.


Прэзідэнт Міжнароднага алімпійскага камітэта Томас Бах адзначыў, што алімпійская вёска ў Пхёнчхане — адна з найлепшых, калі не найлепшая ў гісторыі Алімпійскіх гульняў. «Гэта не толькі месца, дзе будуць жыць спартсмены, гэта месца, дзе яны могуць адчуць дух Алімпійскіх гульняў, знайсці сяброў», — заявіў Бах на адкрыцці.

Большасць нашых спартсменаў ужо там, першымі з алімпійцаў у вёсцы з'явіліся біятланісты. Учора ў Паўднёвую Карэю адправіўся гарналыжнік Юрый Данілачкін, канькабежцы, каманда па лыжных гонках у поўным складзе, прадстаўнік шорт-трэка — Максім Сяргееў, а таксама трэнерскі склад, адміністрацыйная і медыцынская групы. Гарналыжніца Марыя Шканава адправіцца ў алімпійскі Пхёнчхан з Аўстрыі, дзе цяпер праводзіць трэніроўкі. Апошнімі ў вёску прыбудуць фрыстайлісты, якія да 8 лютага рыхтуюцца да стартаў у японскім горадзе Біфук.

Адзначым, што нашы спецыялісты таксама ўжо завяршылі падрыхтоўку медыцынскага блока, які знаходзіцца ў Алімпійскай вёсцы. Ён займае тры прасторныя пакоі, там члены беларускай дэлегацыі змогуць аператыўна атрымліваць неабходныя кансультацыі, фізіятэрапеўтычныя працэдуры, масаж, а таксама псіхалагічную дапамогу. «Па вопыце ведаю, падчас Алімпіяды спартсмены нярэдка звяртаюцца да нашых спецыялістаў. І не толькі таму што дзесьці кальнула, але і для прафілактыкі захворванняў, а таксама для аднаўлення пасля фізічных нагрузак. Прыходзяць і для таго, каб проста расслабіцца, адарвацца ад трывожных думак, пачытаць, пагаварыць па душах — для гэтага ў складзе групы ёсць псіхолаг», — расказаў кіраўнік медыцынскай групы, дырэктар Рэспубліканскага навукова-практычнага цэнтра спорту Генадзь ЗАГАРОДНЫ.

На калегіі Міністэрства спорту і турызму, якая прайшла на гэтым тыдні, кіраўнік ведамства Аляксандр ШАМКО адзначыў, што беларусам у камандным заліку па сілах увайсці ў лік 25 лепшых краін на зімовай Алімпіядзе і Параалімпіядзе ў Пхёнчхане. Міністр падкрэсліў, што праграма падрыхтоўкі да галоўных стартаў зімовага сезона была цалкам выкананая і цяпер слова за атлетамі і іх трэнерамі. Галоўныя надзеі беларускіх балельшчыкаў звязаны з выступленнем біятланістаў і майстроў лыжнай акрабатыкі, ёсць нядрэнныя перспектывы і ў прадстаўнікоў канькабежнага спорту.

Чакаецца, што ў Пхёнчхан прыбудзе 2943 спартсмены з 92 краін, што з'яўляецца самай вялікай колькасцю атлетаў у гісторыі зімовых Алімпійскіх гульняў. Раней рэкорд быў усталяваны ў Сочы — 2800 спартсменаў з 88 краін свету.

Нагадаем, што ў Пхёнчхане ўпершыню будуць уключаны ў праграму Алімпійскіх гульняў спаборніцтвы па снаўбордзе ў катэгорыі біг-эйр, мас-старт у канькабежным спорце, камандныя спаборніцтвы ў гарналыжным спорце і дабл-мікст у кёрлінгу. Усяго будзе разыграна 102 камплекты медалёў, што таксама з'яўляецца рэкордам.

Арганізатары адзначылі, што ўжо рэалізавана каля 74 % білетаў на спаборніцтвы Гульняў, у продажы засталося 278 тысяч з 1,07 мільёна, у тым ліку білеты на ўрачыстую цырымонію адкрыцця. Пры гэтым на спаборніцтвы першых трох дзён Алімпіяды прададзена амаль 80 % білетаў.

Раней Нацыянальны алімпійскі камітэт Карэі паведаміў, што амаль цалкам распрададзены ўсе месцы на спаборніцтвы фігурыстаў (мужчынскае адзіночнае катанне), па кёрлінгу і матчы з удзелам аб'яднанай жаночай хакейнай каманды КНДР і Рэспублікі Карэя.

Дар'я ЛАБАЖЭВІЧ

Загаловак у газеце: Спадарожнага ветру!

Выбар рэдакцыі

Грамадства

Выбіраем аптымальную пару года для пахудзення. Спойлер: і гэта не лета!

Выбіраем аптымальную пару года для пахудзення. Спойлер: і гэта не лета!

Жыццё ў «эпоху спажывання» — сур’ёзнае выпрабаванне для чалавека.

Эканоміка

Нашы фінансы павінны прыносіць даход. Які? Вось у чым пытанне

Нашы фінансы павінны прыносіць даход. Які? Вось у чым пытанне

Адукаваныя людзі загадзя плануюць свой паток фінансаў, размяркоўваючы іх па перспектыўных напрамках, тым самым забяспечваючы сабе нябеднае жыццё.

Культура

Мінск 1941. Як гэта было

Мінск 1941. Як гэта было

Неба пачарнела ад самалётаў.