У Віцебскім раёне мядзведзь пакусаў беспрацоўнага

У інтэрнэце актыўна абмяркоўваецца навіна пра тое, што мядзведзь у Віцебскім раёне пакусаў мужчыну. З укусамі рук, бока, спіны і г. д. беспрацоўны, якому за 40, быў шпіталізаваны. Незвычайнае надзвычайнае здарэнне адбылося ноччу на выхадных у вёсцы Пукшына, дзе жывуць 72 чалавекі. Яна прыкладна за 12 км ад Расіі, на тэрыторыі Янавіцкага сельсавета.

Кіраўнік сельсавета Аляксандр Ізобаў, каб высветліць падрабязнасці, ездзіў у населены пункт.

Паводле слоў суразмоўцы, верагодна, той мядзведзь ужо не першы раз выходзіў да людзей. І аднакласнік старшыні нават зрабіў фота касалапага, вельмі падобнага на таго, якога бачылі вяскоўцы. Версій, як сустрэліся жывёла і чалавек незадоўга да здарэння, у інтэрнэце існуе некалькі. Але старшыня сельсавета пацікавіўся дробязямі на месцы. Таварыш пацярпелага, які прагнаў мядзведзя, кінуўшы ў яго рондаль, сцвярджаў, што аднавясковец абдымаўся з мядзведзем. Апошні яго лізаў. Наваспечаны сябар жывёлы нават прапанаваў разам выпіць "на траіх"... Справа скончылася тым, што мядзведзь падмяў пад сабе чалавека і пачаў кусаць.

Пацярпелага цяпер лечаць у Віцебску. У сельскім выканкаме яго характарызуюць адмоўна. Напрыклад, ён на ўліку ў грамадскім пункце правапарадку. Пры жаданні мог бы працаваць на ферме, дзе дастойны заробак, але не хоча.

У дзень напісання артыкула ў Віцебскім райвыканкаме адбылося мерапрыемства па лініі МНС. Абмяркоўвалі і інцыдэнт. Як сцвярджаюць вопытныя паляўнічыя, калі мядзведзь напаў на чалавека, сітуацыя можа і паўтарыцца. А забіць жывёлу нельга, бо мядзведзь занесены ў Чырвоную кнігу. Для гэтага неабходны дазвол ў адпаведных інстанцыях па ахове жывёльнага свету. Як варыянт, мядзведзя можна было б злавіць і перасяліць падалей ад людзей.

Дарэчы, візіты мядзведзяў у вёскі Віцебскага раёна не рэдкасць. Старшыня Янавіцкага сельсавета, дарэчы, раней працаваў майстрам у лясгасе. Ён адзначыў, што мядзведзі часта падыходзяць да месцаў, дзе жывуць людзі, а яшчэ прыгадаў, што ўпершыню мядзведжыя сляды ўбачыў каля 20 гадоў таму. А вось мінулым летам з-за лясных пажараў у Расіі касалапых у раёне стала болей. Аднаго бачылі жыхары вёскі Лазаватка ў суседнім Задуброўскім сельсавеце. Як канстатавалі тады ў Віцебскай раённай інспекцыі прыродных рэсурсаў і аховы навакольнага асяроддзя, канешне, у пошуках ежы ён не вернецца ў расійскія лясы. І пры неабходнасці паабяцалі адлавіць звера...

Што будзе з мядзведзем, які параніў чалавека, пакажа час.

Аляксандр ПУКШАНСКІ