У Мінску праходзіць Беларускі тыдзень моды

Сёлета мерапрыемства змяніла фармат. Паказы арганізавалі ў будынку былога цэха, дызайнерам прапанавалі друкаваць калекцыі на 3D-прынтары, а гасцей чакала лекцыя пра крыптавалюту.

Раней тыдзень моды праходзіў у выставачным цэнтры БелЭкспа. Гэтым разам 30-метровы подыум размясціўся ў культурнай прасторы «ОК16», якая знаходзіцца ў адным са старых будынкаў па вуліцы Кастрычніцкай. Такая тэндэнцыя назіраецца цяпер і на замежных модных мерапрыемствах: замест таго каб узводзіць для паказаў дарагія і складаныя канструкцыі, іх праводзяць у закінутых памяшканнях.

Яшчэ адна адметнасць — гэта спалучэнне моды і тэхналогій. Удзельнікі мерапрыемства могуць убачыць і пратэсціраваць інавацыйныя рашэнні для дызайну. Напрыклад, хутка стварыць элементы абутку і адзення з дапамогай 3D-друку, распрацаваць у праграме прататып аксесуара. Усё гэта прадставіла вытворчая лабараторыя FabLab Garage пры Мінскім гарадскім тэхнапарку. Дырэктар тэхнапарка Уладзімір ДАВІДОВІЧ мяркуе, што новыя тэхналогіі будуць карысныя дызайнерам, дазволяць ім эксперыментаваць і ўдасканаліць многія працэсы вытворчасці.

У галіне моды, дарэчы, хочуць запусціць сваю лічбавую валюту — Fashіon Coіn. У будучыні пакупнікі змогуць разлічвацца ёй за брэндавыя рэчы, а на кошт змогуць уплываць эксперты індустрыі.

Беларускі тыдзень моды праходзіць 16-ы раз. Ці змянілася што за гэты час? Кіраўнік Belarus Fashіon Week Яніна ГАНЧАРОВА ўпэўненая, што так, і адзначае некалькі пазітыўных тэндэнцый. Калі восем гадоў таму многія нашы фабрыкі адзення нават не глядзелі ў бок айчыннага рынку, усё шылі на Расію, то цяпер пашыраюць сетку крамаў у Беларусі. Развіваецца дзіцячая мода. У аднаго з брэндаў, напрыклад, абарот дзіцячых рэчаў на 80 працэнтаў большы, чым дарослых. А ўсяго ў сферы вытворчасці адзення працуе 1600 юрыдычных асоб.

Але ёсць яшчэ да чаго імкнуцца.

— Нам не хапае крэатыву, смеласці. Але гэта залежыць і ад пакупнікоў. Дызайнеры не рызыкуюць выпускаць тое, што не прадасца, — тлумачыць Яніна Ганчарова.

Сёлета ў тыдні моды ўдзельнічае больш за 30 дызайнераў. Калекцыі прадстаўляюць таксама замежныя мадэльеры — з Украіны, Італіі. А што прапануюць насіць наступнай восенню і зімой беларускія творцы? Дызайнер Ларыса Балунова робіць стаўку на жакеты з гіпертрафіраванымі плячыма, сукенкі з тоўстага трыкатажу, камбінезоны з карункамі. А традыцыйную для халоднай пары года шэра-чорна-карычневую гаму разбаўляе фіялетавым і цёмна-чырвоным колерамі. Спалучаць класіку і спорт-шык у адным вобразе прапануюць маркі Devur і Femme. А яшчэ — насіць увосень лёгкія шоўкавыя сукенкі «ў падлогу» пад джэмперы і паліто. Модная парада ад брэнда Lakbі — перавязвайце сукенкі, кашулі і жакеты скуранымі рамянямі, каб падкрэсліць талію, і не бойцеся аб'ёмных плашчоў і паліто, бо яны толькі падкрэсліваюць жаноцкасць.

Ксенія Раманава стварыла калекцыю ў футурыстычна-спартыўным стылі, а Наталля Гайдаржы пашыла яркія ўборы з ільну Аршанскага льнокамбіната.

Погляд на мужчынскую моду прадставіла Людміла Тараканава. Наступнай зімой віцебскі мастак-мадэльер прапануе моцнай палове прымерыць футра і футровыя курткі. А схавацца ад ветру можна ў аб'ёмным шаліку ручной вязкі.

Паказы дзіцячай моды — гэта традыцыйна яшчэ і сацыяльны праект. Усе грошы, атрыманыя ад продажу квіткоў, пойдуць на падтрымку сем'яў з Беларускай асацыяцыі дапамогі дзецям-інвалідам і маладым інвалідам.