Занятасць насельніцтва, заработная плата, цэнаўтварэнне — пытанні эканамічныя, але ў той жа час не ў меншай ступені — сацыяльныя. Менавіта яны павінны быць у цэнтры ўвагі Федэрацыі прафсаюзаў Беларусі. Такую думку выказаў Прэзідэнт Аляксандр Лукашэнка падчас сустрэчы з яе старшынёй Міхаілам Ордам.
Кіраўнік дзяржавы падкрэсліў, што для яго важна, каб зарплата была зароблена, а не выдадзена дарма. «А для гэтага трэба, каб вытворчасць функцыянавала як належыць», — дадаў ён. Беларускі лідар адзначыў, што ёсць узаемасувязь паміж непрацаўладкаванасцю людзей і ростам злачыннасці. Таму варта даць магчымасць забяспечыць сябе кожнаму, а значыць, неабходна паспрыяць стварэнню новых працоўных месцаў. «Чалавек, які працуе, рэдка становіцца злачынцам», — сказаў Аляксандр Лукашэнка.
Што датычыцца цэн, то, па словах Прэзідэнта, падставы для іх росту няма. А калі яны павышаюцца, то гэта робіцца для асабістай нажывы тых, хто павышае. «Там, дзе ёсць вузкія месцы ў цэнаўтварэнні, мы іх бачым, мы іх ведаем, і калі дзяржаўныя органы і ўрад гэта не заўважаюць, прафсаюзы павінны ім дапамагчы», — падкрэсліў Аляксандр Лукашэнка. Цэны павінны напрамую залежаць ад даходаў насельніцтва: калі будзе высокая зарплата, тады і цэны могуць падымацца. А зараз яны растуць за кошт чаго? Напрыклад, на падставе чаго даражэе праезд на грамадскім транспарце, якім карыстаюцца не самыя багатыя людзі? Пошук адказаў на гэтыя пытанні — прамая задача прафсаюзаў.
Таксама кіраўнік дзяржавы пацікавіўся, як адбываецца працэс стварэння прафсаюзных ячэек на прыватных прадпрыемствах, і падняў пытанне аб тым, як пазбавіцца ад празмернасцяў у сістэме прафсаюзаў, як яе варта рэфармаваць. Пажадана, каб не было дублявання паўнамоцтваў і сфер адказнасці ў пэўных галінах, лічыць беларускі лідар.
З мая мінулага года Федэрацыя прафсаюзаў праводзіць маніторынг цэн на сацыяльна значныя тавары і паслугі, які ахоплівае ўсе вобласці і сталіцу. Падчас яго асаблівая ўвага ўдзяляецца суадносінам росту цэн і зарплаты людзей. Так, у сакавіку гэтага года, у параўнанні са снежнем мінулага, кошт набору неабходных прадуктаў харчавання павялічыўся на 1,9 %, а сярэдняя зарплата за гэты час знізілася на 6,9 %. Да таго ж за І квартал 2018 года цэны на жыллёва-камунальныя паслугі выраслі больш чым на 10 %, а праезд у электрычках і дызель-цягніках — на 25 %. Па словах старшыні Федэрацыі прафсаюзаў, людзі скардзяцца і на рост ад 40 да 90 % платы за інтэрнат (асабліва гэта пытанне актуальнае для маладых сем'яў), а таксама на павышэнне кошту больш чым на 300 % перавозкі тэхнікі чыгуначным транспартам для будаўнічых кампаній.
Падчас сустрэчы абмяркоўвалася пытанне і павышэння зарплаты работнікам сацыяльнай сферы. Яго прафсаюзы не раз падымалі ва ўрадзе. Прэзідэнт падкрэсліў, што дадзеныя раней даручэнні павінны быць выкананы, і за іх кіраўнік дзяржавы будзе жорстка патрабаваць. У мінулым годзе на 7 % зарплата для гэтай катэгорыі грамадзян ужо падымалася, але, па словах Міхаіла Орды, такія рашэнні носяць, хутчэй, «касметычны» характар і ў цэлым праблему не здымаюць. «Сёння неабходна цалкам перагледзець мадэль фарміравання заработнай платы», — лічыць старшыня Федэрацыі прафсаюзаў Беларусі. Па яго словах, яна шмат у чым запазычаная яшчэ з савецкіх часоў і на дадзеным этапе занадта ўскладнілася і патрабуе змен.
Вераніка ПУСТАВІТ
Фота БЕЛТА
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
