Вы тут

Тэхналогіі супраць анкалогіі


Дзве бальніцы Гомеля пачалі карыстацца новым абсталяваннем, якое дазваляе паспяхова змагацца з анкалагічнымі захворваннямі.


У гомельскім абласным клінічным анкалагічным дыспансеры прэзентавалі новую тэхналогію лазернага лячэння раку. Аналагаў гэтаму паўправадніковаму лазеру для фотадынамічнай тэрапіі пакуль няма ў іншых рэгіянальных спецыялізаваных медустановах. Да нядаўняга часу тэхналогія прымянялася толькі ў сталічных клініках.

Працэдура лазернага лячэння займае ўсяго 10—20 хвілін. Урач-анколаг-хірург Ірына Канцавенка кажа, што яна дазваляе забіць менавіта злаякасныя клеткі:

— Фотадынамічная тэрапія — перспектыўная методыка. Перавага ў лакальным уздзеянні лазера на пухлінную тканку. Папярэдне пацыенту ўводзіцца прэпарат, які назапашваецца ў ракавых клетках. Падчас уздзеяння лазерам адбываецца фотахімічная рэакцыя. У выніку пухліна гіне, здаровыя тканкі захоўваюцца. На месцы ўмяшання застанецца незаўважны рубчык. Часцей за ўсё працэдура праводзіцца аднакратна. Пацыенты застаюцца сацыяльна актыўнымі, здольнымі да працягу працы. У 95—98 % выпадкаў хвароба не вяртаецца.

Апарат УПЛ-ФДТ закуплены за кошт пазабюджэтных сродкаў, заробленых дыспансерам пры аказанні платных паслуг насельніцтву, гаворыць галоўны ўрач гомельскага анкадыспансера Дзмітрый Лось:

— Само абсталяванне і лекавы прэпарат «Фаталон» беларускай вытворчасці. У апарата шырокі спектр магчымасцяў. Абсталяванне запатрабавана ў дэрматаанкалогіі, отарыналарынгалогіі, гінекалогіі, дэрматалогіі, стаматалогіі, афтальмалогіі. Немалаважна, што лячэнне выконваецца ў амбулаторным рэжыме, пасля працэдуры пацыент ідзе дадому.

Тым часам у Гомельскую гарадскую бальніцу № 4 урачыста перададзена эндаскапічнае абсталяванне ў межах грантавай дапамогі ўрада Японіі «Карані травы». Выкарыстанне абсталявання дазваляе своечасова выявіць захворванні кішэчніка і выдаліць небяспечныя новаўтварэнні, якія выяўляюцца прыкладна ў 6 % пацыентаў. Ранняя дыягностыка прадухіляе развіццё анкалогіі і літаральна ратуе жыцці людзей. Як адзначыў пасол Японіі ў Рэспубліцы Беларусь Хірокі Такунага, з 2004 года ў межах праграмы «Карані травы» было рэалізавана 42 праекты на суму амаль $3,5 млн:

— Дапамога накіравана на пераадоленне наступстваў чарнобыльскай катастрофы. Японскі народ глыбока суперажывае пацярпелым беларусам, паколькі жыхароў нашых краін аб'ядноўвае горкі досвед ядзерных катастроф.

Грант-кантракт паміж пасольствам Японіі ў Рэспубліцы Беларусь і гэтай лячэбнай установай быў падпісаны ў сакавіку 2017-га. І ўжо праз некалькі месяцаў урачы прыступілі да працы на новых гастрадуадэнаскопе і відэакаланаскопе. За гэты перыяд праведзена больш за 2500 абследаванняў. Дарэчы, падтрымку акрамя гомельскай бальніцы атрымалі яшчэ Чачэрская ЦРБ і Мінскі гарадскі клінічны анкалагічны дыспансер. Пасольства і надалей плануе ажыццяўляць падобныя праекты, каб падтрымаць жыхароў Беларусі і дапамагчы ім пераадольваць наступствы аварыі.

Ірына АСТАШКЕВІЧ

Выбар рэдакцыі

Фінансы

Як банкі абараняюць ад махляроў грашовыя пераводы

Як банкі абараняюць ад махляроў грашовыя пераводы

За чатыры месяцы 2024 года раскрывальнасць цяжкіх кіберзлачынстваў у параўнанні з аналагічным перыядам мінулага года павысілася на 19%. 

Спорт

Настасся Касцючкова: Чалавек у калясцы не павінен быць зачынены ў чатырох сценах

Настасся Касцючкова: Чалавек у калясцы не павінен быць зачынены ў чатырох сценах

Фехтаваць наша гераіня ўмее трыма відамі зброі: шабляй, шпагай і рапірай. 

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.