Вы тут

Мінпрацы распрацуе Стратэгію актыўнага даўгалецця


Пра гэта паведаміла журналістам міністр працы і сацыяльнай абароны Ірына Касцевіч перад рэспубліканскай нарадай «Роля тэрытарыяльных цэнтраў сацыяльнага абслугоўвання насельніцтва (ТЦСАН) у вырашэнні сацыяльных праблем».


Ірына Касцевіч адзначыла, што старэнне насельніцтва — гэта сур'ёзны выклік, які стаіць перад усімі краінамі, у тым ліку і перад Беларуссю. Доля асоб ва ўзросце 65 гадоў і старэй, у нас перавышае 14 %, а да 2030 года, па прагнозах, павялічыцца да 20 %.

— Таму мы разумеем, што колькасць грамадзян, якія будуць мець патрэбу ў сацыяльных паслугах, будзе павялічвацца, але, акрамя гэтага, наша задача — паляпшаць і якасць гэтых паслуг, — сказала міністр. — Як мы плануем гэта рабіць? Ужо распрацаваны стандарт якасці сацпаслуг. У 2018—2019 гадах плануем разгарнуць маніторынг якасці гэтых паслуг. Таксама правядзём ранжыраванне тэрытарыяльных цэнтраў па згаданым крытэрыі. Хтосьці будзе на першым месцы, хтосьці апынецца на апошнім. І нават калі цэнтр сацабслугоўвання апынецца на 146-м месцы — планка якасці сацыяльных паслуг усё роўна павінна быць высокай.

Акрамя таго, Ірына Касцевіч адзначыла: «Мы павінны ў найбліжэйшыя гады адысці ад заяўнага прынцыпу, калі чалавек сам просіць нас аб дапамозе, і перайсці на выяўляльны прынцып. Нам трэба ўбачыць кожнага чалавека, дакладна ведаць, колькі ў канкрэтным рэгіёне адзінокіх пажылых людзей ці тых, якія адзінока пражываюць, колькі інвалідаў і якой групы, каб прапаноўваць людзям нашы сацыяльныя паслугі і нікога не выпусціць з-пад увагі».

Таксама найбліжэйшым часам Міністэрства працы і сацыяльнай абароны ставіць перад сабой задачу распрацаваць Стратэгію актыўнага даўгалецця — дакумент, які вызначыць прыярытэтныя напрамкі актыўнага здаровага даўгалецця беларусаў. «Каб людзі, якія выйшлі на пенсію, жылі, а не дажывалі...», — сказала Ірына Касцевіч.

У рэалізацыі гэтай стратэгіі цяжка пераацаніць ролю тэрытарыяльных цэнтраў сацабслугоўвання, якія аказваюць усе неабходныя паслугі пажылым людзям. А таксама людзям, якія трапілі ў цяжкую жыццёвую сітуацыю, інвалідам, шматдзетным і сем'ям, якія маюць непаўналетніх дзяцей...

Развіццё ТЦСАН у нашай краіне пачалося з 2004 года, і за гэтыя 14 гадоў ужо назапашаны вялікі вопыт работы. «Ёсць база сацыяльных паслуг, якія ТЦСАН абавязаны прадастаўляць грамадзянам. Але, разумеючы асаблівасць гэтай галіны, а таксама творчы і крэатыўны падыход многіх рэгіёнаў, якія пайшлі далей, мы маем інавацыйныя падыходы ў працы з грамадзянамі, — заявіла кіраўнік міністэрства. — Мэта сённяшняй нарады — абмеркаваць, чаго мы дасягнулі за гэтыя гады, які атрымалі вынік, вызначыць асноўныя напрамкі далейшай працы».

  • Зараз у Беларусі функцыянуюць 146 цэнтраў тэрытарыяльнага абслугоўвання насельніцтва.
  • Паводле міжнародных крытэрыяў, насельніцтва краіны лічыцца старым, калі доля асоб ва ўзросце 65 гадоў і старэй складае 7 % і больш.

Святлана БУСЬКО

Загаловак у газеце: Каб жыць паўнавартасна, а не дажываць

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.