Новы атракцыён стаў неад'емнай часткай на розных гарадскіх святах. Не так даўно скарысталіся магчымасцю здзейсніць палёт на верталёце каля 1,5 тысячы гродзенцаў і гасцей горада. Ахапіць такую колькасць аматараў адрэналіну пілоты змаглі за тыдзень — менавіта столькі МІ-2 баразніў паветра над горадам. Такі працяглы тэрмін палётаў у Гродне быў здзейснены ўпершыню. Каб убачыць Гродна з вышыні, да МІ-2 збіраліся вялікія чэргі.
Паветраная вандроўка становіцца новым атракцыёнам на гарадскіх святах, расказваюць супрацоўнікі Віцебскага аэраклуба. І калі раней такія экскурсіі праходзілі адзін дзень, то паступова пілоты затрымліваліся ў горадзе, які іх запрашаў, на два альбо тры дні. Палёты падчас святкавання 890-гадовага юбілею Гродна доўжыліся цэлы тыдзень і сталі для пілотаў своеасаблівым рэкордам.
Многія прыходзілі, каб здзейсніць даўнюю мару — убачыць горад з вышыні птушынага палёту. Самымі напружанымі для пілотаў сталі выхадныя падчас свята горада. У адзін з такіх дзён пракацілася каля 350 чалавек. Раз-пораз уздымаліся новыя пасажыры: моладзь, бацькі з дзецьмі, пенсіянеры. Работнікі аэраклуба расказалі, што самаму малому было тры гады, а сярод сталых — 80-гадовая гродзенка, якая прыйшла з унучкай.
Палёт доўжыўся каля пяці хвілін і адбываўся на вышыні 400 метраў. Месца старту размясцілі каля гандлёвага цэнтра.
— У горадзе не так проста знайсці адпаведнае месца для стартаў, — адзначыла начальнік службы матэрыяльна-тэхнічнага забеспячэння Віцебскага аэраклуба Вольга Бугаева. — Тут шмат абмежаванняў, і мы гэта ўсё ўлічваем, інакш не атрымалі б дазвол.
Каб адправіцца ў паветранае падарожжа, многія чакалі і гадзіну, і дзве. Часам чарга налічвала да ста чалавек. Іх трываласць акупалася новымі незвычайнымі эмоцыямі і ўзрушаным станам.
— Некаторыя сумняваліся: ляцець ці не? Яны прыйшлі са знаёмымі, каб проста паназіраць, але ў апошні момант усё ж такі вырашалі ляцець, — расказвае суразмоўніца.
Дарэчы, палёты, якія падабаюцца аматарам адрэналіну, даюць магчымасць палепшыць матэрыяльную базу аэраклуба, адзначылі арганізатары. А яшчэ садзейнічаюць падрыхтоўцы курсантаў для лётнага факультэта і спартсменаў верталётнага спорту. Аэраклубу ўдалося захаваць сваю базу і методыку работы, што дазваляе і цяпер паказваць добрыя вынікі на чэмпіянатах па верталётным спорце. У той жа час гэта патрабуе значных сродкаў, але аэраклуб абыходзіцца без датацый. Усе нормы эксплуатацыі тэхнікі строга кантралююцца.
— Верталёт, які здзяйсняе палёты, сертыфікаваны, у тым ліку і па шуме. Ён налятаў усяго тры тысячы гадзін, гэта менш чым трэцяя частка агульнага рэсурсу. Верталёт спісваецца, калі яго вылеты складаюць 10,5 тысячы гадзін. Да таго ж ён не выкарыстоўваўся ў агрэсіўным асяроддзі — не быў на хімработах і не падвяргаўся перападам тэмпературы, — адзначыла Вольга Бугаева.
Паветраны шпацыр вядомы ва ўсіх райцэнтрах Віцебшчыны. Уздымаў верталёт аэраклуба паветраных турыстаў у Брэсце, Баранавічах, Салігорску... Некалькі дзён «завісаў» над Лідай і цэлы тыдзень — над Гроднам. У дзень адбывалася і па 50 палётаў. Аднак усіх ахвотных не давялося ахапіць, адзначылі арганізатары, бо з кожным разам аматараў паветранага турызму становіцца ўсё больш.
Маргарыта УШКЕВІЧ
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
