Вы тут

Налета Беларусі і Украіне неабходна выйсці на ўзровень у 8 млрд долараў


У Гомелі актыўна ідзе падрыхтоўка да першага Форуму рэгіёнаў Беларусі і Украіны, які пройдзе 25—26 кастрычніка. Чакаецца, што ўдзел у ім прымуць кіраўнікі дзвюх дзяржаў. А напярэдадні тут, на ХХVІ пасяджэнні міжурадавай беларуска-ўкраінскай камісіі абмеркавалі пытанні гандлёва-эканамічнага супрацоўніцтва паміж дзвюма краінамі і магчымасці павелічэння сумеснага тавараабароту.


Дарэчы, сёлета па выніках 8 месяцаў ён вырас на 20 % і склаў больш за 3,5 мільярда долараў. Але ж прэзідэнтамі Беларусі і Украіны пастаўлена задача налета выйсці на ўзровень у 8 мільярдаў долараў. Намеснік прэм'ер-міністра Ігар Ляшэнка, які ўзначаліў беларускую дэлегацыю, заўважыў, што неабходна рухацца ў бок поўнай адмены бар'ераў ва ўзаемным гандлі і развіцці добрасумленнай канкурэнцыі:

— Пастаўленая кіраўнікамі дзяржаў задача патрабуе пошуку новых кропак росту, пашырэння партнёрскіх сувязяў і перспектыўных сумесных праектаў. Рэалізацыя дамоўленасцяў, дасягнутых на папярэднім пасяджэнні летась у Кіеве, спрыяла развіццю комплексу ўзаемаадносін у гандлёва-эканамічнай сферы. Разам з тым, ёсць значныя рэзервы для далейшага росту. Так, Беларусь зацікаўлена нарошчваць аб'ёмы сумеснай вытворчасці трактароў, камбайнаў для патрэб аграрнай галіны. Акрамя таго, наша краіна гатовая працягваць актыўны ўдзел у абнаўленні парку камунальнай і пасажырскай тэхнікі Украіны, адкрыта для нарошчвання супрацоўніцтва ў сферы мадэрнізацыі дарожнай інфраструктуры, прадстаўнікі беларускіх прадпрыемстваў гатовыя працаваць у сферы нафтавага сэрвісу. Самае галоўнае — мы чуем адно аднаго і бачна, што ў нас атрымаецца вырашыць гэтыя пытанні.

Віцэ-прэм'ер — міністр рэгіянальнага развіцця, будаўніцтва і ЖКГ Украіны Генадзь Зубко падкрэсліў важнасць вызначэння планаў і перспектыў не толькі на 2019 год, але і распрацоўкі дарожнай карты на 2020—2021 гады. У якасці эфектыўнага інструмента рэалізацыі задач названа развіццё міжрэгіянальных і міжгаліновых стасункаў, кааперацыя ў розных сферах — вытворчай, транспартнай, інфармацыйнай і іншых. Генадзь Зубко адзначыў, што Беларусь застаецца надзейным партнёрам для Украіны, і задачу павышэння ўзроўню тавараабароту да 8 мільярдаў долараў можна выканаць, актыўна развіваючы стасункі ў галіне машынабудавання, энергетыкі, аграпрамысловага комплексу:

— Мы ўбачылі вузкія месцы, якія не дазваляюць нам хутка дасягнуць эфекту. У першую чаргу — гэта транспартная сувязь, тарыфы па пастаўцы і, самае галоўнае, — цэнаўтварэнне на нашу прадукцыю. Мы чакаем, што І Форум рэгіёнаў Беларусі і Украіны, на які прыедуць прадстаўнікі 13 абласцей, 60 прадпрыемстваў, пройдзе на вельмі высокім узроўні.

Больш за дзясятак пытанняў разгледжана на пасяджэнні міжурадавай камісіі ў Гомелі. Яны датычыліся развіцця воднага транспарту, будаўніцтва і архітэктуры, супрацоўніцтва ў прамысловасці і вытворчай кааперацыі, нафтахімічным сектары, энергетычнай галіне, сельскай гаспадарцы і харчовай прамысловасці, мытнай і пагранічнай сферах, а таксама ўзмацненні гуманітарнага супрацоўніцтва.

Ірына АСТАШКЕВІЧ

Загаловак у газеце: Павялічыць тавараабарот больш чым у два разы

Выбар рэдакцыі

Грамадства

Выбіраем аптымальную пару года для пахудзення. Спойлер: і гэта не лета!

Выбіраем аптымальную пару года для пахудзення. Спойлер: і гэта не лета!

Жыццё ў «эпоху спажывання» — сур’ёзнае выпрабаванне для чалавека.

Эканоміка

Нашы фінансы павінны прыносіць даход. Які? Вось у чым пытанне

Нашы фінансы павінны прыносіць даход. Які? Вось у чым пытанне

Адукаваныя людзі загадзя плануюць свой паток фінансаў, размяркоўваючы іх па перспектыўных напрамках, тым самым забяспечваючы сабе нябеднае жыццё.

Культура

Мінск 1941. Як гэта было

Мінск 1941. Як гэта было

Неба пачарнела ад самалётаў.