Усе беларускія вобласці і 14 украінскіх прымуць удзел у прадстаўленні патэнцыялу эканамічнага супрацоўніцтва падчас І Форуму рэгіёнаў Беларусі і Украіны, які адбудзецца 25—26 кастрычніка ў Гомелі.
Экспазіцыя разгорнецца на дзвюх пляцоўках у горадзе над Сожам. Свае магчымасці прадэманструюць 57 украінскіх і 89 беларускіх кампаній. Пройдуць прэзентацыі рэгіёнаў, прадпрыемстваў, кампаній і арганізацый, а таксама перамовы і кансультацыйныя саветы з удзелам звыш 250 прадстаўнікоў бізнесу і дзелавых колаў.
На пасяджэнні, напрыклад, Дняпроўскага басейнавага савета абмяркуюць распрацоўку праекта плана кіравання басейнам ракі Днепр. Стратэгіяй будуць вызначаны дзеянні беларускага і ўкраінскага бакоў, якія датычацца маніторынгу водаў, кантролю якасці вады, выканання гідралагічнага рэжыму і гэтак далей. Таксама будуць вывучацца вынікі інвентарызацыі водных аб'ектаў Гомельскай вобласці. Плануецца абмеркаваць каардынацыю пытанняў аховы і ўстойлівага выкарыстання трансгранічных прыродаахоўных тэрыторый.
Беларускія і ўкраінскія навукоўцы будуць весці размову пра новыя метады барацьбы з усыханнем хваёвых лясоў на канферэнцыі «Перспектыўныя кірункі і механізмы развіцця супрацоўніцтва ў галіне навукі і тэхналогій». У ёй прымуць удзел па дзевяць навуковых інстытутаў Украіны і Беларусі. Будзе разглядацца ў тым ліку магчымасць касмічнага зандзіравання насаджэнняў для выяўлення пашкоджання на ранніх стадыях, а таксама супрацоўніцтва ў вобласці генетыкі, селекцыі, лесааднаўлення, прыродакарыстання. Яшчэ адной актуальнай тэмай, якую абмяркуюць спецыялісты дзвюх краін, стане ўзаемадзеянне па барацьбе з ляснымі пажарамі трансгранічнага характару.
На працягу двух дзён больш за 100 прадстаўнікоў вышэйшай школы Беларусі і Украіны будуць абмяркоўваць актуальныя пытанні ўзаемадзеяння і пашырэння партнёрскіх стасункаў.
У гэтыя дні будзе працаваць кірмаш прадукцыі і вырабаў дэкаратыўна-прыкладнога мастацтва. Свае работы на ім прапануюць рамеснікі з Чарнігаўшчыны і Гомельшчыны, а таксама з іншых рэгіёнаў Беларусі. Унікальныя абрады і традыцыі прадэманструюць на падворках у горадзе майстроў. Больш за 500 артыстаў з Беларусі і Украіны прымуць удзел у канцэрце дружбы 25 кастрычніка.
Ірына АСТАШКЕВІЧ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
