Учора і сёння замежныя дэлегацыі з 20 краін — удзельніц конкурсу змаглі бліжэй пазнаёміцца з нацыянальнай беларускай культурай і традыцыямі. У Дзяржаўным літаратурным музеі Янкі Купалы для іх падрыхтавалі адмысловую інтэрактыўную праграму на англійскай мове. У прыватнасці, такі культурны праменад зрабілі прадстаўнікі Уэльса, Украіны, Аўстраліі і Ірландыі.
Пакуль госці праходзяць у першую залу, загадчык аддзела культурна-адукацыйнай работы літаратурнага музея Янкі Купалы Вольга Пархімовіч, якая распрацоўвала для іх спецыяльную праграму, тлумачыць: "Мы сыходзілі з таго, каб прадставіць нашу культуру і расказаць, хто такі Янкі Купала, але зрабіць гэта за даволі кароткі час і такім чынам, каб было цікава, не сумна, абавязкова інтэрактыўна і зразумела для замежнікаў, якія, магчыма, наогул нічога не ведаюць пра нашу краіну. І, канешне, па традыцыях гасціннасці не абыходзіцца без пачастункаў: у сценах музея мы не мелі магчымасці правесці нейкі кулінарны ўрок, скажам, па прыгатаванні дранікаў, таму вырашылі падарыць кожнаму наведніку на памяць салодкі гасцінец — пернік з выявай купальскага кола і агню, які так дарэчы пераклікаецца з дэвізам "Еўрабачання" — "Запальвай!". Але ласункі з'ядуць, і на ўспамі нічога не застанецца, таму ў дадатак мы падрыхтавалі прыгожы набор падставак пад кубачкі, які атрымаў назву "Ад сэрца": на вокладцы — партрэт нашага паэта, а на саміх падстаўках — элементы нацыянальнага арнаменту, якія абазначаюць рэчы, важныя ў жыцці кожнага чалавека: шчасце, каханне і гэтак далей, таксама з перакладам на англійскую".
Замежным наведнікам прапаноўвалі паглядзець невялікі, але змястоўны 3D-ролік пра тое, як святкуецца Купалле, навучылі танцаваць сярэднявечны танец "Маразуля". Як нам падалося, з асаблівым імпэтам і пачуццём яго вытанцоўвалі ірландцы — Тэйлар Хайнс з бацькам, малодшым братам і сястрой, а таксама бабуляй, якім відавочна спадабаліся завадныя рытмы вядомага беларускага гурта "Стары Ольса".
Ад вясёлага да сур'ёзнага: вялікае ўражанне на канкурсантаў зрабіла знаёмства з самім Янкам Купалам — праз экспазіцыю працоўнага кабінета і аўдыязапіс, на якім гучаць вершы паэта ў выкананні аўтара.
— А цяпер давайце ўсе разам развучым беларускую народную песню, — запрасіла гасцей на імправізаваныя "вячоркі" экскурсавод Вольга, — не хвалюйцеся, мы падрыхтаваліся, каб спяваць яе змаглі ўсе — і раздала аркушы з надрукаванымі ў англійскай транскрыпцыі радкамі. "Тая кура-шчабя-тура па садочку хо-одзіць", — старанна выводзілі аўстралійцы, а следам за імі рагаталі ірландцы, паўтараючы "Тая гуся, сюся-сюся". Напрыканцы, не ўтрымаўшыся, некаторыя прасілі дазволу "спісаць словы" на смартфон і жартавалі: "Цяпер мы ведаем, якую песню выканаем на наступным "Еўрабачанні!".
Спадабаліся ўсім без выключэння і гульня-танец "Явар", і майстар-клас па вырабу саламянай лялькі-абярэга — змайстраваўшы кожны свой талісман, замежнікі з гонарам дэманстраваў яго астатнім і перапытвалі: "Праўда, праўда прыносіць удачу? — Ну, не ведаем, як наконт перамогі на "Еўрабачанні", — адказвалі супрацоўнікі музея, — але па жыцці шанцаванне дакладна прыцягвае!".
— Поспех любой дзеі залежыць ад таго, наколькі ў яе ўцягнутыя гледачы. Таму ў адну з экскурсій, калі прыйшлі толькі дарослыя ўдзельнікі замежных дэлегацый, мы крыху спалохаліся — усё ж разлічвалі на падлеткаў, — расказалі "Звяздзе" супрацоўнікі музея. —- Аднак яны настолькі жыва і натуральна рэагавалі на прапанаваныя песні і танцы — аўстралійцы наогул зрабілі з гэтага асобнае шоу, якое здымалі на камеры. А дзецям, натуральна, спадабалася ўласнаручна майстраваць лялькі і атрымліваць салодкія гасцінцы.
Вікторыя ЦЕЛЯШУК
Фота Ганны ЗАНКАВІЧ
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
