Вы тут

Трэцяе за год падсумаванне


400 работ ад 250 аўтараў — у Палацы мастацтва 22 лістапада прайшло адкрыццё шостага Беларускага біенале жывапісу, графікі і скульптуры. Тут жа былі названыя пераможцы ў намінацыях «Жывапіс года», «Графіка года» і «Скульптура года». На пляцоўцы пасля «Арт-Мінска» і Восеньскага салона гэта ўжо трэцяе падсумаванне вынікаў мастацкага жыцця краіны за год. З адрозненнямі, канешне: іншы арганізатар, іншы склад шчасліўчыкаў, што трапілі ў выставачную прастору (хаця нейкія аўтары пераскокваюць з адной экспазіцыі ў другую), іншы склад журы, якое выбрала найлепшых.


Работы Уладзіміра Канцэдайлава.

Першае біенале прайшло ў 2008 годзе і прадставіла публіцы 227 работ і 285 аўтараў з ліку членаў Беларускага саюза мастакоў. З тых часоў у арт-жыцці краіны з'явіўся шэраг у прынцыпе падобных ініцыятыў, што таксама «даюць справаздачу», выбіраюць найлепшых, праходзяць у Палацы мастацтва і пры гэтым не абмяжоўваюць сябе членствам у саюзе.

Біенале — адпачатку цудоўная ідэя. Паказваць публіцы, што сабралася на рахунку аб'яднання, мяркуючы, што яно можа прадстаўляць мастацтва краіны ўвогуле, адкуль і назва, што, з аднаго боку, абсалютна лагічная, бо выстаўка праходзіць раз на два гады, а з другога, адсылае не да чаго-небудзь, а да Венецыянскага біенале.

«Да гэтай падзеі мы рыхтаваліся цэлы год, — сказаў намеснік кіраўніка Беларускага саюза мастакоў Леанід Хобатаў. — Мы спадзяваліся, што яна адбудзецца ў поўным аб'ёме і ў традыцыях, якія мы закладалі дзесяць гадоў таму. Біенале мае дасягненні, рэакцыю і асаблівую гісторыю, гэта важная вяха ў беларускім мастацтве, бо ёсць рэчы, без якіх чалавек не абыходзіцца, і яны вядуць яго ў гэтыя залы. Нам не сорамна казаць пра ўзровень, які мы не заяўляем, а дэманструем. Тут ёсць свае знаходкі, новыя формы і тэндэнцыі. Такі матэрыял не можа знікнуць бясследна, таму што без гэтай часткі культуры краіна не жыве, што мы ўсе цудоўна разумеем».

Але каб Беларускае біенале набрала моц, яму патрэбны грошы, піяр-кампанія і адпаведная арганізацыя. Залы Палаца мастацтва настолькі халодныя, што адкрыццё немагчыма было правесці без вопраткі, а вы ўяўляеце, як гэта выглядае. І ўрачыстая частка падвяла: члены журы, што выбіралі пераможцаў, да яе не дайшлі, словы блыталіся, узнагароды не падрыхтаваліся — прызёры проста выходзілі альбо не выходзілі на «сцэну».

І канфлікт інтарэсаў тут назіраецца (а гэта ўвогуле хвароба беларускіх арт-івэнтаў): член журы аказаўся і ў ліку пераможцаў. Прынамсі, склад камісіі — адкрыты. У яе ўвайшлі пераможцы мінулага біенале Андрэй Кошалеў, Андрэй Савіч і Аляксандр Некрашэвіч, вядомы скульптар Канстанцін Селіханаў, старшыня секцыі жывапісу БСМ Уладзімір Ганчарук, народны мастак Уладзімір Тоўсцік, прадстаўнікі Нацыянальнага музея Кацярына Ізафатава і Дзмітрый Салодкі.

Графік Андрэй Басалыга агучыў імёны найлепшых, можна сказаць, літаральна пасля пасяджэння журы. Таму зараз Палац мастацтва цікавы не толькі выстаўкай абраных, але і самімі абранымі. Вось, маўляў, лідары саюза мастакоў, самы выкшталцоны беларускі арт. Праўда, у экспазіцыі наведвальнік убачыць разнастайнасць мастацкіх канцэпцый, а куратарскі падыход да яе структуры — не. Нацюрморты насупраць прысвячэння Рыльке, Генадзь Фалей побач з Зояй Луцэвіч. У выніку біенале хоць і рыхтавалася год, а прадэманстравала больш непадрыхтаванасць, чым падрыхтаванасць. Але каб стаць прадстаўнічым мерапрыемствам, якое б асацыявалася з сезонам і прымушала аматараў мастацтва сябе чакаць, яму патрэбна прынцыпова іншая колькасць увагі хоць бы да подпісаў, гэтым разам неахайных.

Так ці інакш. наведвальнік можа знайсці тут нешта незабыўнае: экспазіцыя біенале будзе працаваць у Палацы да 14 снежня.

  • У намінацыі «Жывапіс года» першае месца журы прызначыла Уладзіміру Канцэдайлаву, другое — Генадзю Козелу, трэцяе — Станіславу Гурскаму. Ганаровымі дыпломамі адзначаны Алег Ладзісаў, Алена Шлегель, Віталь Герасімаў, Зоя Луцэвіч, Васіль Касцючэнка.
  • «Графіка года» разбілася на дзве намінацыі. У «Арыгінальнай графіцы» першае месца заняў Аляксандр Некрашэвіч, другое — Антон Баранаў, трэцяе — Валянціна Шоба. Ганаровыя дыпломы былі прызначаны для Зоі Луцэвіч і Уладзіміра Лавецкага. У «Друкаванай графіцы» першае, другое і трэцяе месцы размеркаваліся паміж Юрыем Тарэевым, Андрэем Басалыгам і Марынай Мароз. Дыпломамі журы адзначыла Андрэя Якубава, Ганну Мельнікаву, Вольгу Нікішыну.
  • У «Скульптуры года» першае месца згодна з меркаваннем журы заслужыла Вольга Орсік, другое — Аляксандр Мінкоў, трэцяе — Аляксандр Шапо. Дыпломы атрымалі Сяргей Сотнікаў, Юрый Пеўнеў, Хрысціна Кулагіна.

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.

Гандаль

Кандытарскія вырабы — брэнд беларускай харчовай прамысловасці

Кандытарскія вырабы — брэнд беларускай харчовай прамысловасці

Напярэдадні Міжнароднага сімпозіума кандытараў эксперты расказалі аб планах і перспектывах кандытарскай галіны.

Сям'я і дэмаграфія

Святлана Клачкова: Чым больш дзяцей, тым больш любові

Святлана Клачкова: Чым больш дзяцей, тым больш любові

Як жа шматдзетная сям’я спраўляецца з хатнімі клопатамі?