Вы тут

Навагодні зварот Прэзідэнта Рэспублікі Беларусь да беларускага народа


Дарагія сябры!


Надыходзіць самы дзівосны час у годзе, калі мінулае, сучаснае і будучае зліваюцца ў адно імгненне. І застаюцца ўсяго толькі секунды, каб ацаніць тое, што зроблена, падумаць аб тым, што чакае.

Гэты час сагравае і радуе сэрцы, аб'ядноўвае нас у самых лепшых пачуццях і чаканнях.

Традыцыйна сем'ямі, разам з роднымі, блізкімі, сябрамі вы сабраліся за святочным сталом.

Вядома ж, самыя шчаслівыя сярод нас - нашы дзеці. У школьнікаў доўгачаканыя канікулы.

І мая просьба да вас, хлопчыкі і дзяўчынкі: не забывайце, што ў вас ёсць бацькі, бабулі, дзядулі. Запрасіце іх на культурныя, спартыўныя мерапрыемствы. Ну проста правядзіце час разам. Гэтым вы падорыце ім нямала шчаслівых хвілін.

Разам з намі ў гэты святочны час наша будучыня - моладзь. Тое, якой мы ўбачым Беларусь заўтра, залежыць ад кожнага з вас. Гэта вы павінны захаваць і прымножыць створанае.

Сёння краіне асабліва патрэбны вашы інтэлект і энергія.

Помніце: ніхто, ніколі і нідзе не будзе любіць і берагчы вас так, як дома.

Але асаблівую цеплыню сваіх слоў я накіроўваю вам, працаўнікам палёў і заводаў, нашай інтэлігенцыі, абаронцам Айчыны, старэйшаму пакаленню і старым. Усім, хто стварыў на жыватворнай беларускай зямлі першую суверэнную і незалежную дзяржаву, прадаўжае ствараць яе сучаснасць. Мы павінны ўмацаваць сваю дзяржаўнасць на прынцыпах сумленнасці і справядлівасці і менавіта такой захаваць краіну для дзяцей і ўнукаў.

Адыходзячы год дапамог нам асабліва адчуць сувязь з роднай зямлёй.

Ён стаў першым у трылогіі "Малой радзімы". Нагадаў, дзе тыя крыніцы, што даюць нам сілу і энергію.

Вярнуў да вытокаў. Туды, дзе па-асабліваму б'ецца сэрца, дзе ўспамінаецца самае запаветнае.

Мы аб'ядналіся ў імкненні зрабіць кожны куток Беларусі не проста прыгожым, а ўзорным.

І ў надыходзячым годзе нам трэба будзе зрабіць усё, каб краіна патанала ў зеляніне і кветках, натхняла на творчасць і стварэнне, каб нам заўсёды хацелася вярнуцца дадому.

Я не магу абысці ўвагай тых, хто цяпер на пасту: ахоўнікаў нашых жыццяў, людзей, якія забяспечваюць ваенную і эканамічную бяспеку Беларусі. Вялікі вам дзякуй за службу і адданасць справе!

Адыходзіць 2018 год...

Для кожнага з нас ён склаўся па-рознаму. Мы страчвалі родных і блізкіх, знаходзілі новых сяброў, нараджалі і гадавалі дзяцей. Усё, як звычайна ў жыцці. Але галоўнае - мы захавалі мірнае неба для беларусаў і ў вачах нашых дзяцей няма страху і бязвыхаднасці ад вайны.

Давайце ўсе разам берагчы гэту найвялікшую каштоўнасць.

У адыходзячыя імгненні старога года мы ўглядаемся ў абрысы новага, 2019 года.

Гэта год 75-годдзя вызвалення Беларусі ад нямецка-фашысцкіх захопнікаў.

Гэта год 25-годдзя Асноўнага Закона Беларусі.

Гэта год II Еўрапейскіх гульняў.

Гэта будзе год цяжкай працы, перамог і паражэнняў. Разам мы здольныя рабіць немагчымае. Мы абавязкова пераадолеем перашкоды і забяспечым будучыню нашай Радзімы.

Дарагія беларусы, госці нашай краіны!

Шчасця і дабра вам, вашым блізкім, вашым дзецям!

Няхай наша родная Беларусь, прыгожая сваімі прыроднымі багаццямі, велічная сваёй высокадухоўнай і культурнай спадчынай, моцная сваім мудрым, добрым, працавітым народам, заўсёды працвітае, жыве ў міры і згодзе.

З Новым годам, дарагія сябры!

Выбар рэдакцыі

Эканоміка

У Мінску прадаецца больш за 10 тысяч кватэр

У Мінску прадаецца больш за 10 тысяч кватэр

На другасным рынку жыллё працягвае таннець (у глабальным плане без перапынкаў) ужо з верасня мінулага года.

Грамадства

Падмануць Альцгеймера. Як захаваць ясны розум да глыбокай старасці?

Падмануць Альцгеймера. Як захаваць ясны розум да глыбокай старасці?

Няўжо гэтую цяжкую хваробу так лёгка абвесці вакол пальца?

Калейдаскоп

Разбіраем модныя мастхэвы надыходзячага сезона: чым папоўніць гардэроб?

Разбіраем модныя мастхэвы надыходзячага сезона: чым папоўніць гардэроб?

Мода вясны — 2021 прапануе некалькі глабальных кірункаў: мінімалізм, унісекс і 1990-я.