Вы тут

Што хвалюе маладых спецыялістаў?


У канцы года райвыканкамы традыцыйна праводзяць сустрэчы з тымі спецыялістамі, якія скончылі навучальныя ўстановы і прыехалі на работу ў арганізацыі, прадпрыемствы, установы раёна. Недзе арганізоўваюць мерапрыемствы ў форме вучобы-семінара, як, напрыклад, было ў Кобрыне. Там з моладдзю сустрэліся кампетэнтныя спецыялісты, якія расказалі пра льготы і магчымасці, што гарантуе дзяржава пры працаўладкаванні па размеркаванні, пазнаёмілі з асаблівасцямі раёна, яго дасягненнямі ў розных галінах гаспадаркі.


Удзель­ні­кі су­стрэ­чы  ў Ган­ца­ві­чах.

У іншых раёнах, асабліва там, дзе сустрэчы ладзіліся перад Новым годам, яны праходзілі ў форме «агеньчыка». На мерапрыемствах юнакі і дзяўчаты ў нефармальнай абстаноўцы за чаем абмяркоўвалі з кіраўнікамі і спецыялістамі раённага звяна тыя ж праблемы, задавалі пытанні, якія іх цікавяць.

Адным словам, сустрэчы ў любых формах атрымліваюцца карыснымі, дзейснымі, і не толькі ў плане інфармавання маладых спецыялістаў. Яны даюць магчымасць пазнаёміцца, каб потым больш цесна камунікаваць, удзельнічаць у агульных грамадска карысных праектах, якія абавязкова прапаноўваюцца грамадскімі арганізацыямі. Звычайна ў такіх сустрэчах актыўны ўдзел прымаюць кіраўнікі БРСМ, прафсаюзных, іншых арганізацый.

Скажам, у Пружанах старшыня прафсаюза АПК Іван Ярома найперш расказаў аб прававой дапамозе, на якую могуць разлічваць члены арганізацыі, а таксама пра культурныя, спартыўныя мерапрыемствы, якія праводзяцца ў сельгаспрадпрыемствах, пра тое, як цікава можна бавіць вольны час, нават калі ты прыехаў на працу ў вёску. А вось старшыня райвыканкама Міхаіл КРЭЙДЗІЧ зрабіў упор на сацыяльную падтрымку, якая гарантавана з боку дзяржавы. Кіраўнік раёна таксама нагадаў маладым работнікам, што іх паспяховасць у жыцці ў многім будзе абумоўлена іх стаўленнем да працы.

Сёлета на Пружаншчыне прыступілі да работы 250 выпускнікоў вышэйшых, сярэдніх спецыяльных і прафесійна-тэхнічных устаноў адукацыі. З іх 120 чалавек прыйшлі ў аграпрамысловы комплекс.

У Ганцавіцкі раён у адпаведнасці з яго маштабамі выпускнікоў прыехала на парадак меней. Паводле слоў старшыні раённага Савета Юрыя ШАПЕЛЯ, пытанні работы з маладымі спецыялістамі заўсёды знаходзяцца ў полі зроку кіраўніцтва раёна. Іх разглядалі на сесіі райсавета ў мінулым скліканні, будуць яны разгледжаны і цяперашнім складам дэпутатаў. Перад згаданай сустрэчай спецыялісты райвыканкама выязджалі на месцы, знаёміліся з умовамі пражывання былых выпускнікоў, абагульнялі іх пажаданні і прапановы. І як заўсёды, гэтыя тэмы ўзнімаліся падчас сустрэчы.

Нярэдка на падобныя мерапрыемствы запрашаюць тых з учарашніх маладых спецыялістаў, якія ўжо зрабілі пэўныя поспехі ў прафесіі, вызначыліся з месцам далейшага пражывання, пра якіх кажуць, што яны замацаваліся. Вось з такімі давялося гутарыць не так даўно аўтару гэтых радкоў на Ганцаўшчыне.

Аліна Сапун прыйшла ў родную школу летась пасля заканчэння Пінскага каледжа мастацтваў, стала настаўніцай харэаграфіі. Работа ёй падабаецца, з жыллём праблем няма, бо дзяўчына жыве дома з бацькамі. Аліна сказала, што ведае дакладна: харэаграфія назаўсёды стане яе прафесіяй.

Варта адзначыць, што ва ўстановах адукацыі, культуры, аховы здароўя пасля абавязковай адпрацоўкі ў раёне застаецца больш за палову маладых спецыялістаў. Пагутарыла я і з двума ўрачамі, якія прыехалі па размеркаванні ў Ганцавічы і засталіся тут. Уладзімір Цанда — урач лабараторнай дыягностыкі, працуе загадчыкам лабараторыі. З жонкай, урачом-педыятрам, гадуюць дваіх дзяцей. Жывуць у службовай кватэры, якую атрымалі пасля прыезду на працу. Потым узялі ўчастак і сталі будаваць дом. Аналагічныя жыллёвыя ўмовы і ў калегі — доктара Дзяніса Саладухі. Яны з жонкай таксама будуюць уласнае жыллё. Медыкі з гонарам адзначалі, што ў іх бальніцы ўстаноўлена сучаснае дыягнастычнае абсталяванне, якое не саступае аналагам у Баранавічах або ў Брэсце. Адзін з іх у якасці набытку адзначыў шырокія магчымасці для практыкі, якую не атрымаеш у клініцы вялікага горада, дзе вузкая спецыялізацыя. А тут ты — амаль земскі доктар.

Вось як Андрэй Халецкі — выпускнік Віцебскага медыцынскага ўніверсітэта мінулага года. Андрэй прыехаў на работу і адразу стаў галоўным урачом Малькавіцкай сельскай участковай бальніцы. Прыём у паліклініцы, абслугоўванне выклікаў, выезд на два ФАПы, якія знаходзяцца ў зоне абслугоўвання ўчастка, стацыянар на 25 ложкаў — адным словам, работы маладому ўрачу хапае. Андрэй Аляксандравіч адразу зразумеў, што тут ён атрымае ўнікальны вопыт.

Нават тым, хто адпрацаваў год, не кажучы пра больш сталых калег, ёсць чым падзяліцца з сёлетнімі выпускнікамі медыцынскіх устаноў.

Работа ў глыбінцы для маладога спецыяліста гэта яшчэ і магчымасць для росту, часам імклівага прасоўвання па службовай лесвіцы, адзначалі на сустрэчы. Прыкладам можа паслужыць, пэўна, кар'ера Аляксея Дзічкі, ляснічага Хатыніцкага лясніцтва. За тры гады ён прайшоў розныя службовыя прыступкі і стаў кіраўніком калектыву з 16 чалавек, адказным за амаль 13 тысяч гектараў лясных угоддзяў. Аляксей мясцовы, жыве з бацькамі, на работу ездзіць з райцэнтра. Ён з дынастыі леснікоў, у лесе ў свой час працавалі дзяды і па бацькавай, і па матчынай лініі, дзядзькі. Таму хлопец з маленства не бачыў сябе ў іншай прафесіі, адказна рыхтаваўся да паступлення, паспяхова скончыў ВНУ.

Менавіта на сваіх, мясцовых выпускнікоў школ тут робяць стаўку. Дарэчы, з сёлетняй сотні маладых спецыялістаў 82 чалавекі — ураджэнцы Ганцаўшчыны. Ад імя ўлады старшыня райсавета Юрый Шапель выказаў намер усяляк падтрымліваць маладое папаўненне. Прыклад ёсць з каго браць, у каго вучыцца ёсць. Застаецца напрацоўваць уласны досвед, станавіцца сапраўдным майстрам сваёй справы, абзаводзіцца сям'ёй, жыллём і... заставацца.

Святлана ЯСКЕВІЧ

Выбар рэдакцыі

Грамадства

Ігар Петрышэка: «ЦТ — спаборніцтва, і перамога ў ім павінна быць чэснай!»

Ігар Петрышэка: «ЦТ — спаборніцтва, і перамога ў ім павінна быць чэснай!»

Сацыяльнае дыстанцыраванне і напаўняльнасць да 50 чалавек — такія патрабаванні да аўдыторый ЦТ.

Культура

22 чэрвеня 1941 года раздзяліла жыццё беларусаў на «да» і «пасля»

22 чэрвеня 1941 года раздзяліла жыццё беларусаў на «да» і «пасля»

Яны яшчэ не ведалі, што наперадзе — доўгія тры гады жыцця пад акупацыяй. 

Грамадства

Ва ўсім вінаваты... заяц. Як не падхапіць інфекцыю на прыродзе і падчас сельгасработ

Ва ўсім вінаваты... заяц. Як не падхапіць інфекцыю на прыродзе і падчас сельгасработ

Выпадак захворвання тулярэміяй зарэгістраваны ў чэрвені.