Вы тут

Калядны турнір па хакеі у самым разгары


Калядны турнір, або чэмпіянат свету сярод аматараў, як яго даўно прывыклі называць прыхільнікі хакея, у самым разгары

Удзельнікі ўжо паспелі правесці па некалькі гульняў і нядрэнна пазнаёміцца з сапернікамі не толькі на лёдзе, але і па-за яго межамі. Бо ў першую чаргу Калядны турнір не спартыўнае спаборніцтва, а свята для аматараў спорту.


Для былых гульцоў — магчымасць успомніць ранейшыя часы і яшчэ раз атрымаць асалоду ад выдатных момантаў гульні, а для балельшчыкаў — шыкоўны шанц стаць часткай вялікага шоу, бо ў Мінск прыехалі вядомыя гульцы. Напрыклад, у варотах зборнай Славакіі можна заўважыць сярэбранага прызёра чэмпіянату свету 2000 года Марціна Ліпоўскі, у складзе зборнай Фінляндыі тры гульцы, якія паспелі пагуляць у НХЛ, у чэхаў — прызёр Алімпіяды-1992 Радэк Тоўпал, у латышоў — уладальнік Кубка Стэнлі і мноства іншых узнагарод Сандзіс Озалінш. І ўсе яны ветла ўсміхаюцца трыбунам «Чыжоўка-Арэны», раздаюць аўтографы, фатаграфуюцца.

Адзначаецца цяперашні турнір і шэрагам новаўвядзенняў, у першую чаргу павялічылася колькасць камандаў, што кажа аб добрай рэпутацыі Каляднага турніру ў свеце. Сёлета ў сталіцу Беларусі прыехала ўжо дванаццаць хакейных дружын. Адна з новых — зборная ІІНF (Міжнароднай федэрацыі хакея). Пакуль яна ўкамплектавана ў асноўным прадстаўнікамі федэрацый хакея Аўстрыі, Венгрыі, Украіны, але ў далейшым плануецца, што да яе будзе далучацца ўсё больш прадстаўнікоў і іншых краін. Дарэчы, менавіта ў складзе каманды ІІНF у Калядным турніры ўпершыню прымае ўдзел жанчына — Сюзанна Колбенхаер, член савета Міжнароднай федэрацыі хакея і кіраўнік камітэта па жаночым хакеі гэтай арганізацыі. Менавіта яна ў стартавай сустрэчы для беларускай каманды тройчы паразіла вароты гаспадароў і была прызнана найлепшым гульцом у складзе сваёй каманды.

Як заўсёды акрамя спартыўнай праграмы для гледачоў Каляднага турніру арганізавана яшчэ і забаўляльная. А ўдзельнікі, хакеісты-аматары, не толькі атрымаюць асалоду ад спартыўных баталій, але і традыцыйна пазнаёмяцца з Беларуссю, яе гісторыяй і культурай.

Замежныя ўдзельнікі падзяліліся сваімі першымі ўражаннямі.

Капітан зборнай Славакіі Ёзэф Штумпел:

— Прыемна, што мяне запрасілі ў ветэранскую каманду Славакіі. Тут у Мінску гуляў за «Дынама», таму магу многае сваім партнёрам расказаць і паказаць. Мы рады першай перамозе над Швейцарыяй, а ў дзень адпачынку паглядзелі горад. Сёння важны матч у групе з Расіяй. На гэтым турніры мы ў кожным матчы будзем гуляць на перамогу. Пасля завяршэння прафесійнай кар'еры даўно хацеў прыехаць у Мінск. Цікава паглядзець і на «Чыжоўка-Арэну», у дынамаўскім клубе мы выступалі на «Мінск-Арэне», а тут іншы комплекс, цікава.

Капітан зборнай ААЭ Джума аль-Дахеры:

— Для нас выступаць у Мінску вельмі важна, рады перамозе ў стартавым матчы. З кожным годам мы вучымся ў сталіцы Беларусі. Наша каманда бачыць на гэтым турніры сур'ёзных гульцоў, якія ў мінулым дамагаліся гучных перамог, глядзім арганізацыю спаборніцтваў, як усё ўладкавана. Гэта вельмі важна і для развіцця хакея ў ААЭ. Удзячныя Прэзідэнту Беларусі і арганізатарам турніру, якія кожны год запрашаюць нашу зборную на Калядны турнір. Падняць узровень майстэрства нам дапамагаюць і беларускія спецыялісты, якія працуюць з нашымі камандамі ў ААЭ. У ранейшыя гады ў Мінску мы змаглі пазнаёміцца з многімі прафесіяналамі, якія працуюць цяпер у ААЭ. Гэта вядомыя ў Беларусі гульцы Арцём Сянькевіч, Сяргей Задзялёнаў. Мы выбудавалі дакладную сістэму падрыхтоўкі маладых хакеістаў. Мяне радуе, што дзеці ў нашай краіне актыўна ідуць у хакей.

Гулец зборнай Расіі Іван Навасельцаў:

— На такі навагодні турнір заўсёды прыемна прыехаць, сустрэць сяброў, з якімі раней гуляў, і пагутарыць. Вельмі прыгожа, вельмі добра ўсё. Навокал чысценька, прыемна пахадзіць, пагуляць. Таму ўражанні самыя добрыя.

Дар'я ЛАБАЖЭВІЧ

Загаловак у газеце: Больш за дзесяць камандаў, пяць дзён і адзін кубак

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.