Вы тут

Рэйтынгавая сістэма — не «селекцыя», а шанц для выкладчыкаў


«Наша задача — навучыць студэнта творча думаць, задаваць пытанні, ставіць мэты і аналізаваць вучэбныя вынікі, каб атрымаць на выхадзе спецыяліста, гатовага дзейнічаць ва ўмовах нявызначанасці, у сітуацыі, калі няма гатовых рэцэптаў», — такую думку выказаў падчас відэабрыфінгу на сайце Нацыянальнага прэс-цэнтра рэктар Беларускага дзяржаўнага ўніверсітэта Андрэй КАРОЛЬ.


Андрэй Кароль. Фота: bsu.by

«Выкладчыкам таксама трэба навучыцца па-іншаму выстройваць свае стасункі са студэнтамі. Неабходна навучыць іх ствараць свой прадукт, забяспечыць умовы, каб кожны з іх мог рэалізаваць сябе ў вучэбнай дзейнасці», — падкрэсліў Андрэй Кароль.

Па словах рэктара, у БДУ распрацаваная стратэгія развіцця ўніверсітэта, якая ўключае асноўныя стратэгічныя і тактычныя мэты і задачы па кожным з ключавых для ўніверсітэта кірункаў дзейнасці — адукацыйным, навуковым, выхаваўчым... Адна з фундаментальных мэт — кадравая палітыка ва ўніверсітэце.

— Мы перагледзелі многія нашы нарматыўныя прававыя акты ва ўніверсітэце, узгаднілі іх з прафкамам і зацвердзілі на канферэнцыі працоўнага калектыву. Прывязалі заработную плату работнікаў да прадукцыйнасці іх працы, — паведаміў Андрэй Кароль. — Для гэтага ёсць канкрэтныя механізмы. Калі браць прафесарска-выкладчыцкі склад, то была распрацаваная рэйтынгавая сістэма матывацыі і стымулявання прадукцыйнасці працы, і кожны выкладчык ведае арыенціры, якіх ён можа дасягнуць.

У рэйтынгавай сістэме вынікі ацэньваюцца па аб'ектыўных крытэрыях, якія адлюстроўваюць вучэбна-метадычную, навуковую, арганізацыйную і выхаваўчую работу выкладчыкаў. Гэтыя крытэрыі будуць штогод карэктавацца ў залежнасці ад прыярытэтных задач развіцця БДУ. Тэхнічная ўнікальнасць рэйтынга ПВС заключаецца ў поўнай аўтаматызацыі працэсаў выстаўлення рэйтынгавай ацэнкі, разліку і прызначэння прэмій. Гэта дазваляе мінімізаваць суб'ектыўны фактар пры аналізе паказчыкаў эфектыўнасці работы выкладчыкаў. Усе справаздачы, якія яны прадстаўляюць, запаўняюцца і верыфікуюцца ў электронным выглядзе ў асабістых кабінетах супрацоўнікаў. Перад укараненнем рэйтынгавай сістэмы яна на працягу чатырох месяцаў абмяркоўвалася ў працоўных калектывах факультэтаў БДУ.

— Штомесяц выкладчык мае магчымасць атрымліваць больш, чым той, хто менш эфектыўны ў сваёй рабоце. Дадатковая прэмія па выніках рэйтынгавых ацэнак у залежнасці ад індывідуальных паказчыкаў можа вагацца ад 69 да 320—350 рублёў. Гэта не значыць, што праводзіцца «селекцыя», — падкрэслівае Андрэй Кароль. — Проста мы ўвасабляем у жыццё прынцып: «Калі хочаш быць шчаслівы — будзь ім». Стаўленне выкладчыкаў да перамен мы ўжо бачым. Яны цяпер разумеюць неабходнасць паўдзельнічаць у тым ці іншым міжнародным праекце, падрыхтаваць і апублікаваць свой артыкул у часопісе Scopus або базе даных Web of Scіence. І гэта ўсё працуе на агульную скарбонку дасягненняў універсітэта. Гэты працэс быў досыць скрупулёзны, і тут няма нейкага дырэктыўнага ціску. Сёння мы маем абсалютна выразны па змесце і працэдуры механізм ацэньвання, які вызначае паспяховасць працы любога выкладчыка. Рэалізуецца прынцып празрыстасці і адкрытасці, а галоўнае, мы істотна скарацілі зусім непатрэбны дакументаабарот, калі кожны кіраўнік спрабаваў даказаць, што яго супрацоўнік — выключны. Цяпер з'явіліся дакладныя крытэрыі паспяховасці і эфектыўнасці кожнага.

Для ўсіх іншых катэгорый работнікаў універсітэта — кіраўнікоў службаў і аддзелаў, лабарантаў, спецыялістаў, метадыстаў — таксама ўстаноўлены крытэрый эфектыўнасці. Ёсць дакладны парадак, за што прэміруюць супрацоўнікаў. Кіраўнік падраздзялення сам прымае рашэнне аб выніковасці іх працы, а кіраўнікоў прэміруе спецыяльна створаная камісія ва ўніверсітэце.

«Праз рэалізацыю кадравай палітыкі мы маем унікальныя і для БДУ, і для ўсёй краіны вынікі ў навуковай дзейнасці, — дадаў Андрэй Кароль. — Летась ва ўніверсітэце была абаронена і зацверджана 71 кандыдацкая дысертацыя і 8 доктарскіх».

Таксама ў 2019 годзе ў БДУ заснаваны конкурс на атрыманне грантаў рэктара для падрыхтоўкі кандыдацкіх і доктарскіх дысертацый. Мэта — павелічэнне колькасці спецыялістаў з вучонай ступенню. У прыватнасці, сродкі гранта будуць вылучацца на публікацыі вынікаў навуковай працы, набыццё матэрыялаў і абсталявання, аплату ўдзелу ў навуковых мерапрыемствах і іншыя выдаткі, звязаныя з падрыхтоўкай і абаронай дысертацыі. Конкурс будзе праводзіцца штогод са студзеня да сакавіка. Для падрыхтоўкі кандыдацкай дысертацыі прадугледжаны грант на тэрмін да двух гадоў, а для доктарскай — да трох. Усяго будуць вызначаны тры ўладальнікі з ліку патэнцыяльных кандыдатаў навук і пяць — з тых, хто рыхтуе доктарскую дысертацыю.

Надзея НІКАЛАЕВА

Выбар рэдакцыі

Жыллё

Па якіх крытэрыях дамы ўваходзяць у праграму па капрамонце?

Па якіх крытэрыях дамы ўваходзяць у праграму па капрамонце?

Пра ўсе тонкасці правядзення капітальнага рамонту расказалі спецыялісты.

Рэгіёны

Самы працяглы ўрок гістарычнай праўды і сяброўства

Самы працяглы ўрок гістарычнай праўды і сяброўства

Удзельнікі «Цягніка Памяці» папярэдніх гадоў дзеляцца сваімі ўражаннямі ад праекта.

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.