Вы тут

Як плануецца змяніць Правілы дарожнага руху


На дарогах краіны за апошнія дванаццаць гадоў уратавана больш за 1 200 жыццяў. Тысяча дзвесце чалавек могуць адзначаць другі дзень нараджэння. Праўда, не заўсёды мы ведаем, хто абараніў нас ад п'янага кіроўцы, напалоханага лася ці ўчастка з дрэннай бачнасцю. Дзяржаўтаінспекцыя кіруецца прынцыпам «лепш папярэдзіць, чым потым лячыць».


Шчасліва даехаць дадому

Як паведаміў на пасяджэнні круглага стала «Удасканаленне прававога рэгулявання бяспечнасці дарожнага руху» ў Палаце прадстаўнікоў начальнік упраўлення Дзяржаўтаінспекцыі міліцыі грамадскай бяспекі Дзмітрый КАРЗЮК, дзякуючы ўзмацненню жорсткасці адказнасці нецвярозых кіроўцаў колькасць п'яніц за рулём скарацілася ў два з паловай разы — да дваццаці тысяч. Пасля ўвядзення адміністрацыйнага арышту за паўторную язду без права кіравання транспартным сродкам сёлета да адказнасці прыцягнулі на 42 % менш беларусаў, на 15 % менш зарэгістравана дарожна-транспартных здарэнняў, на 17 % менш чалавек загінула. «ДАІ не карны орган. Асноўная наша задача — стварыць такія ўмовы, пры якіх кіроўцам будзе немагчыма парушыць правілы. Жорстка? Магчыма. Але тое, што датычыцца жыццяў, напэўна, павінна быць жорстка», — адзначыў начальнік упраўлення.

У парламенце агульныя погляды на прававое рэгуляванне шукалі супрацоўнікі міністэрстваў унутраных спраў і транспарту і камунікацый, навукоўцы Беларускага нацыянальнага тэхнічнага ўніверсітэта, прадстаўнікі Беларускай асацыяцыі экспертаў і сюрвеераў на транспарце і Праграмы развіцця ААН.

Бальную сістэму не абмяркоўвалі. Дзмітрый Карзюк адзначыў толькі, што ў краінах, дзе яе ўвялі, за першы год на 27 % знізілася колькасць парушэнняў. У Беларусі тых, хто парушае правілы сістэмна (каго бальная сістэма палохае больш за ўсіх), — восем тысяч на тры мільёны сто тысяч выдадзеных пасведчанняў кіроўцаў. Норма аб укараненні бальнай сістэмы будзе разгледжана з удзелам кіраўніка дзяржавы.

«Правілы таксама павінны з'яўляцца прэвентыўнай мерай, каб дарога стала бяспечным месцам для ўсіх. Пытанне бяспекі датычыцца кожнага, нездарма людзі часта пытаюць: а як самі грамадзяне могуць змагацца з ямай на дарозе, закрытым дрэвам знакам, прыпаркаванымі машынамі», — падкрэсліў старшыня Пастаяннай камісіі па прамысловасці, паліўна-энергетычным комплексе, транспарце і сувязі Андрэй РЫБАК.

Дэпутаты выступаюць за пашырэнне станоўчага досведу, каб удзел у праграме «Добрая дарога» па прыкладзе Мінска ўзялі рэгіёны.

Хай дарога будзе добрай

Канцэпцыя забеспячэння бяспекі дарожнага руху ў Рэспубліцы Беларусь «Добрая дарога» прадугледжвае зніжэнне колькасці загінулых у ДТЗ да 2020 года да лічбы не болей за 500, а ў 2025 — не болей за 350 чалавек. Праграма дасягнення гэтых мэт заснавана на шведскай сістэме: менавіта Швецыя лідзіруе ў свеце па бяспецы дарожнага руху.

Начальнік аддзела арганізацыі дарожнага руху і дарожнай інспекцыі УДАІ МГБ Дзмітрый НАВОЙ падкрэсліў, што сістэма знаходжання вінаватага працуе ідэальна яшчэ з савецкіх часоў, але ніхто не аналізаваў фактары, што прывялі да здарэння. А ў ДТЗ заўсёды ёсць прычына: дзікія жывёлы, слізкасць дарогі, блізкасць крамы, дзе прадаецца алкаголь. Цяпер рабочыя групы аналізуюць гэтыя фактары і прапануюць меры па зніжэнні іх уплыву.

«У гэтую работу павінны ўключацца праекціроўшчыкі, — лічыць начальнік аддзела. — Не толькі выкананне тэхнічных нарматываў важнае пры будаванні шляхоў і развязак. Акрамя таго, распрацоўваецца ацэнка кошту жыцця беларуса».

Дзмітрый Навой лічыць, што неабходна знізіць дазволеную хуткасць у жылых раёнах да 50 км/г, што значна зніжае магчымасць гібелі пры сутыкненні з пешаходам у параўнанні з 60—69 км/г. Іншыя тэхнічныя меры таксама здольныя значна паўплываць на дарожную абстаноўку: напрыклад, «ляжачыя паліцэйскія» практычна выключаюць ДТЗ са смяротным зыходам.

Сёння Мінск па бяспецы дарожнага руху знаходзіцца на ўзроўні самых прасунутых гарадоў свету і з'яўляецца адным з самых бяспечных гарадоў Еўропы. У доказ старшыня праўлення Беларускай асацыяцыі экспертаў і сюрвеераў на транспарце Юрый ВАЖНІК прывёў лічбы: «У 2006 годзе ў Мінску ў ДТЗ загінулі 128 чалавек, у 2018-м — 28. У краіне ў цэлым у 2006 годзе было 1650 загінулых, у 2018-м — 580».

Як падкрэсліў старшыня праўлення БАЭС, усе простыя меры ўжо выкарыстаныя, досвед узорных краін пераняты. Каб паляпшаць статыстыку надалей, давядзецца прыдумваць нешта інавацыйнае. Дарэчы, назваў Юрый Важнік і прыкладны кошт жыцця беларуса: ён складае каля 350 тысяч долараў. У ЗША — тры мільёны долараў. Такую суму дзяржава гатовая патраціць на ўратаванне жыцця аднаго грамадзяніна.

Тры галоўныя навіны

«Правілы дарожнага руху не паспяваюць за развіццём самога транспарту», — прызнаў начальнік аддзела забеспячэння правапрымяняльнай дзейнасці УДАІ МГБ Аляксандр ЗАНІМОН. Размова, перш за ўсё, пра гіраскутары, электравеласіпеды, скейтборды з электрарухавіком.

Начальнік аддзела паведаміў, што ў праекце Указа аб унясенні змяненняў у Правілы дарожнага руху гэты транспарт вызначаны як «сродак персанальнай мабільнасці». Іх кіроўцаў прапанавана аднесці да пешаходаў і абавязаць рухацца па вылучанай веладарожцы, а калі яе няма — па тратуары, але не ствараць перашкод пешым удзельнікам руху.

Скутары, мапеды, матацыклы, аўтамабілі з электрарухавіком — фактычна тыя ж самыя транспартныя сродкі, а значыць, павінны рухацца па агульнай праезнай частцы па агульных правілах. Адзіная прэферэнцыя: прадугледжана магчымасць руху электрамабіляў па паласе для маршрутных транспартных сродкаў.

Шматлікія скаргі і заявы веласіпедыстаў звязаны з патрабаваннем спешвацца перад праезнай часткай. ДАІ прапануе дазволіць веласіпедыстам не злазіць з веласіпеда на пешаходных пераходах на рэгулюемых скрыжаваннях, але запавольвацца і рухацца з хуткасцю тых, хто ідзе. Абавязак злазіць на пешаходных пераходах, дзе няма святлафора, застаецца.

Для зручнасці і інтуітыўнага разумення плануецца таксама пашырэнне магчымасці выкарыстання дарожнай разметкі, у прыватнасці, веладарожак і пешаходных зон.

Нарэшце, паведаміў Аляксандр Занімон, вырашана замацаваць «правіла дзвюх палос» пры перасячэнні пешаходнага перахода, згодна з якім кіроўца павінен саступіць дарогу пешаходу, калі між імі застаецца дзве паласы (ці паласа і трамвайныя шляхі, ці паласа і «астравок бяспекі»).

Каментуючы пытанні дэпутатаў, начальнік аддзела праінфармаваў, што знак «Фотакантроль» аднесены да папераджальных і павінен устанаўлівацца загадзя: за 50—100 метраў да радара ў населеным пункце, 150—300 метраў па-за ім; пад знакам «Прыпынак (стаянка) забаронены».

Падчас пасяджэння супрацоўнікі ДАІ звярнулі ўвагу, што думаць пра «сёння» — гэта ўжо позна. У сваім планаванні інспектары жывуць 2035-м годам, улічваючы перспектывы і патрабаванні будучыні, ставячы перад сабой адпаведныя мэты.

Варвара МАРОЗАВА

Фота Анатоля КЛЕШЧУКА

Загаловак у газеце: На самакаце? Значыць, пешаход

Выбар рэдакцыі

Эканоміка

Як абараняцца ад рыэлтараў, якія не хочуць працаваць па законе

Як абараняцца ад рыэлтараў, якія не хочуць працаваць па законе

Лiцэнзiя агенцтва «Гатовыя рашэннi» скасавана, «Iмперыi нерухомасцi» — прыпынена, а «Тваёй сталiцы» выпiсана прадпiсанне.

Палітыка

Аляксандр Лукашэнка: Гэта адна з самых складаных выбарчых кампаній

Аляксандр Лукашэнка: Гэта адна з самых складаных выбарчых кампаній

Кіраўнік дзяржавы прагаласаваў на выбарах Прэзідэнта.

Палітыка

У Рэспубліцы Беларусь прайшоў асноўны дзень выбараў Прэзідэнта

У Рэспубліцы Беларусь прайшоў асноўны дзень выбараў Прэзідэнта

Сёлетнія выбары кіраўніка дзяржавы — шостыя па ліку.

Грамадства

Медыцынскі агляд у віцебскіх газавікоў ажыццяўляе... робат

Медыцынскі агляд у віцебскіх газавікоў ажыццяўляе... робат

А наведвальнiкаў крамы кансультуе выява спецыялiста.