Ветэранам акажуць матэрыяльную дапамогу

У Беларусі па стане на 1 красавіка пражываюць 6250 ветэранаў Вялікай Айчыннай вайны. Пра гэта паведаміў журналістам намеснік міністра працы і сацыяльнай абароны Аляксандр Румак. У адпаведнасці з Указам Прэзідэнта № 118 ад 28 сакавіка 2019 года ветэранам акажуць аднаразовую матэрыяльную дапамогу. Памер выплат складзе ад 650 і да 2000 рублёў.

Калі браць канкрэтныя лічбы, то дапамога будзе аказана ў наступных памерах:

• 2000 рублёў — Героям Савецкага Саюза;
• 1500 рублёў — інвалідам і ўдзельнікам Вялікай Айчыннай вайны, асобам, якія прымалі ўдзел у абароне Айчыны да 3 верасня 1945 года, а таксама тым, хто прымаў удзел у складзе спецыяльных фарміраванняў у размініраванні тэрыторый і аб'ектаў пасля вызвалення ад нямецкай акупацыі ў 1943—1945 гадах;
• 800 рублёў — работнікам тылу;
• 650 рублёў — тым, хто пацярпеў ад наступстваў вайны.

Выплата аднаразовай матэрыяльнай дапамогі будзе праводзіцца ў перыяд з 1 чэрвеня да 1 ліпеня ў парадку, устаноўленым для выплаты пенсій.

У цэлым атрымальнікамі такой дапамогі стануць амаль 22 тысячы чалавек. На яе выплату ў рэспубліканскім бюджэце прадугледжана 18 млн рублёў.

На сённяшні дзень у жывых засталося толькі два Героі Савецкага Саюза — Васіль Мічурын, якому ў ліпені споўніцца 103 гады, і Іван Кустаў, якому ідзе 96-ы год. Абодва яны пражываюць у Мінску.

Святлана БУСЬКО