Вы тут

На сталічным праспекце Пераможцаў адчынілася абноўленая крама «Светач»


Учора ў сталіцы па адрасе праспект Пераможцаў, 11 пачала працаваць абноўленая, цяпер ужо найбуйнейшая кнігарня, «Дом кнігі «Светач». Шэрагі з выданнямі разгарнуліся на вялізнай светлай прасторы, якая займае некалькі паверхаў. Ёсць тут і прэзентацыйная зала для сустрэч з пісьменнікамі, і кавярня, дзе можна выпіць кубачак кавы.


— Як чалавек, які вельмі моцна любіць свой горад, які нарадзіўся і рос непадалёк ад «Светачы», адзначу, што гэта кнігарня заўсёды была маім любімым месцам, — гаворыць першы намеснік старшыні Адміністрацыі Прэзідэнта Максім РЫЖАНКОЎ. — У маім жыцці кніга адыгрывала важную ролю. Я перачытаў усё, што было ў дамашняй бібліятэцы; хадзіў у кнігарню, а паколькі грошай лішніх не было, то часам проста, каб пачытаць, а не набыць. Таму я вельмі рады адкрыццю новай крамы, такой рэінкарнацыі «Светачы» ў сучасным хай-тэк стылі. Важна, што яна не толькі прыгожая, але і светлая, адкрытая сонечным промням, адсюль можна бачыць наш горад. Істотна тое, што крама дае чытачу новыя магчымасці: можна прыйсці, пасядзець у кавярні, узяць кнігу, вырашыць, падабаецца яна ці не. Маецца спецыяльная апаратура, якая дазваляе знайсці пэўную кнігу ў каталозе.

Адразу каля ўвахода ў памяшканне размясціўся стэнд з кнігамі тых аўтараў, якіх стваральнікі экспазіцыі лічаць выбітнымі пісьменнікамі, пра што сведчаць і адпаведныя шыльды, — «Алексіевіч», «Караткевіч», «Чаргінец». Далей ідуць шэрагі выданняў, прысвечаных беларускім песнярамі, сярод якіх Уладзімір Мулявін, Міхал Клеафас Агінскі. Прадстаўлены якасныя сучасныя кнігі ў раздзеле «Гісторыя». Тут жа шмат добрых выданняў, прысвечаных беларускім мастакам.

— Адкрыццё такой кнігарні — знакавая падзея. Яна мае вялікае значэнне для развіцця айчыннага кнігагандлю, — упэўнены міністр інфармацыі Аляксандр КАРЛЮКЕВІЧ. — Адметна, што ў «Белкнігі» з'явіўся такі праект, які паказвае, як па-сучаснаму ўзаемадзейнічаць з чытачом. Я ўдзячны супрацоўнікам кнігарні (а іх тут працуе крыху больш чым 30 чалавек), якія вытрымалі гэты націск перабудовы і рамонту, што часова ўскладніў іх працу з пакупнікамі. Але ўсё будзе вернута да жыцця і актыўнай дзейнасці. Выдатна, што гандлёвыя плошчы пашырыліся і сталі адчыненыя для сучасных твораў. Да таго ж у новай кнігарні цудоўная лагістыка: можна знайсці адказы на пытанні, звязаныя з жыццём грамадства ва ўсіх сферах.

Дызайн кнігарні сапраўды ўражвае. У столь умантаваныя вялізныя светлавыя панэлі. Адмысловая канфігурацыя распрацавана для мэблі — яна мае незвычайную форму, у тым ліку зроблена ў выглядзе колаў і паўколаў. Аўтары інтэр'ера адзначаюць, што яны ўзялі за аснову скандынаўскі стыль. Але прыбралі «халоднасць», дадалі беларускай цеплыні і ўтульнасці.

Частка гандлёвай плошчы вылучана пад дзіцячы аддзел. Тут можна, напрыклад, убачыць шыльды з надпісамі «Для самых маленькіх», «Лагічныя гульні. Галаваломкі», «Гульні. Цацкі». Прыемна, што ўсе ўказальнікі ў «Светачы» зроблены на беларускай мове.

— Мяняецца свет. Але не змяняецца якасць кніг, — перакананы старшыня Саюза пісьменнікаў Беларусі Мікалай ЧАРГІНЕЦ. — Змяняецца цікавасць да выданняў. Быў час, калі чытачы рынуліся ў інтэрнэт, думалі, што знойдуць у ім усё, што патрэбна. Але жыццё паказала вялікую розніцу: адна справа, калі ты прачытаў у інтэрнэце, а іншая, калі трымаеш у руках папяровае выданне, разважаеш, вяртаешся да прачытанага, думаеш, а як бы ты паступіў у той ці іншай сітуацыі. Раней вельмі шмат казалі пра талент пісьменніка, што, безумоўна, важна; але мы лічым, што пісьменнік павінен узбагачацца ведамі, якія, з аднаго боку, дазваляюць яму лепш пісаць, а з іншага — дапамагаюць людзям лепш жыць. Такую краму мы разглядаем як выдатную магчымасць зблізіць чытача з пісьменнікам, даць магчымасць прыхільніку нейчага таленту прыйсці не толькі паглядзець на аўтара, але і задаць яму пытанні.

У прэзентацыйнай зале першай сваё новае выданне прадставіла пісьменніца Наталля Батракова. І адначасова ва ўсёй сетцы «Белкнігі» пачала прадавацца яе кніга «Бясконцасць любові, бясконцасць суму». Таму ў гэты дзень у «Светачы» было не толькі шмат кніг, аўтараў, чытачоў, але і вельмі шмат кветак, падораных Наталлі Батраковай.

Зала для прэзентацый будзе дзейнічаць на пастаяннай аснове. Яна разлічана на 60 пасадачных месцаў і адчынена для ўсіх творцаў і іх чытачоў.

Ніна ШЧАРБАЧЭВІЧ

Фота Кастуся ДРОБАВА

Выбар рэдакцыі

Грамадства

Беларуская Амазонка​. Ці стане Палессе аб'ектам сусветнай спадчыны?

Беларуская Амазонка​. Ці стане Палессе аб'ектам сусветнай спадчыны?

Адзін з найбуйнейшых рэгіёнаў, які захаваўся ў некранутым стане і які за разнастайнасць азёр, рэк і балот празвалі Еўрапейскай Амазонкай (ці морам Герадота), усё яшчэ застаецца невядомым шырокаму колу турыстаў

Грамадства

Дружалюбнасць да сем'яў і моладзі — важны крытэрый сацыяльна арыентаванай дзяржавы. Круглы стол

Дружалюбнасць да сем'яў і моладзі — важны крытэрый сацыяльна арыентаванай дзяржавы. Круглы стол

Нацыянальным брэндам Беларусі па праве лічыцца сацыяльная падтрымка сем'яў дзяржавай, і таму напярэдадні Міжнароднага дня сям'і прадстаўнік

Калейдаскоп

Хутка выпускны! Што выбраць, каб выглядаць годна на галоўным школьным свяце?

Хутка выпускны! Што выбраць, каб выглядаць годна на галоўным школьным свяце?

Пачнём, зразумела, з дзяўчынак, бо менавіта іх мамы ўжо цяпер ламаюць галаву над выпускным уборам дачок.