Пра ўзаемадзеянне Беларусі і Казахстана напярэдадні саміта Еўразійскага эканамічнага саюза ў Нур-Султане і пазачарговых выбараў у Казахстане ішла размова Аляксандра Лукашэнкі і Надзвычайнага і Паўнамоцнага пасла гэтай краіны Ермухамета Ертысбаева.
«Я ўпершыню буду ў сталіцы з новай назвай. А ўвогуле, я вельмі часта бываў у Казахстане, добра ведаю гэтую краіну. Выдатная краіна, дынамічна развіваючаяся. Няпростыя працэсы адбываюцца ў палітычнай вобласці —прэзідэнцкія выбары са зменай кіраўніка. Яны заўсёды пэўным чынам адлюстроўваецца на жыцці, грамадстве. Ды што там казаць, нават на эканоміку ўплываюць», — сказаў Прэзідэнт Беларусі.
Па словах кіраўніка дзяржавы, у плане гандлю ў краін няма праблем. Праўда, станоўчае сальда ў таваразвароце ў Беларусі. «Але вы павінны ведаць, што ў Казахстане ствараюць масу тавараў, якія нам вельмі патрэбныя, пачынаючы ад бавоўны і заканчваючы металамі», — запэўніў Аляксандр Лукашэнка і акрэсліў новыя напрамкі для сумеснага гандлю.
Беларусь гатова пакупаць у Казахстане зерне. Яго ў краіне лішкі, дзякуючы высокай ураджайнасці і вялікай колькасці пасяўных плошчаў цвёрдых сартоў пшаніцы. Таму праблема дысбалансу ў гандлі — толькі пытанне часу. Яго вырашэнне Прэзідэнт даручыў міжурадавай камісіі дзвюх краін.
Пакуль сустаршыня гэтага органу з казахскага боку адсутнічае — мінулы, Аскар Мамін, заняў пасаду прэм’ер-міністра. «Гэта таксама для нас добра. Чалавек, які ведае добра праблематыку Беларусі, стаў прэм’ер-міністрам Казахстана. Гэта, шчыра кажучы, нас вельмі задавальняе»,— пракаментаваў лідар краіны.
Справа тут, па словах Прэзідэнта, не ў персаналіях — у краін заўсёды былі добрыя сувязі, лідары выбудавалі дакладную сістэму ўзаемаадносін. Патэнцыял развіцця супрацоўніцтва ў краін маштабны, садзейнічае яму і ініцыятыва «Адін пояс і адзін шлях».
«У вас усходнія вароты, у нас «Вялікі камень», свабодныя эканамічныя зоны. Я думаю, тут большае спалучэнне павінна быць», — падкрэсліў Аляксандр Лукашэнка.
Звярнуў ён увагу і на тое, што Беларусь дыверсіфікуе пастаўкі вуглевадароднай сыравіны. «Мы маем некалькі кропак судакранання і вядзём перамовы пра пастаўку нафты ў Беларусь з іншых крыніц. У гэтым годзе мы, у асноўным, скончым мадэрнізацыю нафтапераапрацоўчых заводаў. Нам будзе крыху лягчэй пакупаць з сусветных рынкаў нафту. У сувязі з гэтым мы ўжо вядзём перамовы і хацім, каб яны (па пастаўках казахстанскай нафты ў Беларусь) былі актывізаваны», — адзначыў Прэзідэнт.
Пытанне транзіту «чорнага золата» тычыцца не толькі дзвюх краін, але і Расіі. «Думаю, што з блізкай нам краінай мы зможам дамовіцца аб пэўных аб’ёмах пастаўкі нафты з Казахстана», — упэўнены беларускі лідар.
На палях юбілейнага саміта ў Нур-Султане Прэзідэнт плануе абмеркаваць двухбаковыя адносіны краін са сваім дзеючым і былым калегамі з Казахстана.
У сваю чаргу, Ермухамет Ертысбаеў звярнуў увагу на цікавую заканамернасць: «Сустаршыня міжурадавай казахска-беларускай камісіі папрацаваў і стаў прэм’ер-міністрам. Касым-Жамарт Кемелевіч [Такаеў, былы старшыня сената — Зв.] 30 кастрычніка сустрэўся з вамі тут, у Беларусі, стаў прэзідэнтам».
Пасол у размове з журналістамі таксама адзначыў праблему адмоўнага сальда Казахстана, пра якую казаў Аляксандр Лукашэнка. «У мінулым годзе на 900 мільёнаў долараў мы нагандлявалі і 700 мільёнаў долараў на карысць Беларусі. Для нас, Казахстана, гэта рэзка адмоўнае сальда і мы хацелі б, каб Беларусь шырока адкрыла рынак для казахстанскіх тавараў. Мы можам 44 віда таварнай прадукцыі пастаўляць у Беларусь», — сказаў Ермухамет Ертысбаеў.
Выправіць гэту сітуацыю плануюць да восені, калі адбудзецца афіцыйны візіт Прэзідэнта Беларусі ў Казахстан.
Чалавечы капітал і вытворча-тэхнічны вопыт Беларусі, па словах кіраўніка казахскай дыпмісіі, дазволіць выправіць памылкі, калі падчас рэформаў у краіне дэмантавалі прадпрыемствы. «Напрыклад, Паўладарскі трактарны завод быў адным з буйнейшых у саюзе. Але зараз мы збіраем беларускую сяльгастэхніку ў многіх гарадах, машынныя камплекты і іншае прыходзіць з Беларусі і не толькі — кар’ерная, шахтавая, ліфтавая тэхніка», — канстатаваў Ермухамет Ертысбаеў.
Казахстанскі бок у сваю чаргу гатоў пастаўляць нафту ў Беларусь, учора гэту тэму з галіновымі ведамствамі абмяркоўваў беларускі пасол у Казахстане Анатоль Нічкасаў.
«Паміж намі ляжыць Расія. Яна з’яўляецца важным партнёрам і для Беларусі, і для Казахстана. Гэта наш галоўны, стратэгічны партнёр. Таму гэта прадмет перамоўнага працэсу, я думаю, мы пастараемся знайсці агульнадапушчальнае. Канечне, для Расіі гэта будзе нявыгадна. У іх сваёй нафты дастаткова. Але мы хацелі бы, каб Еўразійскі эканамічны саюз быў выгадны для ўсіх удзельнікаў. І на этапе станаўлення нашага саюза вельмі важна падтрымліваць усіх, — адзначыў пасол. — У нас адна праблема — як запусціць нафту ў трубу. Там чарга ёсць, груба кажучы. Канечне, мы можам чыгуначнымі саставамі пастаўляць і гэтак далей. Але эфектыўнасць некалькі іншая будзе».
Новае кіраўніцтва Казахстана разгледзіць пытанне і набыцця пакету акцый «Гомсельмаша», каб наладзіць вытворчасць беларускай сяльгастэхнікі.
Палітыка заўсёды ідзе поруч з эканомікай. Беларусь і Казахстан — саюзнікі па АДКБ, ЕАЭС.
Па словах пасла, падчас размовы Прэзідэнт высока ацаніў дзеючага лідара Касым-Жамарта Такаева: «Сказаў, што ведае яго як удумлівага, граматнага, інтэлегентнага, універсальнага чалавека. Усе-такі ён быў намеснікам Генеральнага сакратара Арганізацыі Аб’яднаных Нацый. Тры гады папрацаваў. Мае магутную падтрымку і ўнутры Казахстана, і на міжнароднай арэне».
Расказаў пасол пра ідэю заснаваць пасаду «Ганаровага старшыні Еўразійскага эканамічнага саюза», аддаючы пашану Нурсултану Назарбаеву за аўтарства ініцыятывы. Аляксандр Лукашэнка падтрымаў гэту думку.
Марыя ДАДАЛКА
Фота БЕЛТА
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.
