Вы тут

Цэны на здымнае жыллё «скокнулі» праз Гульні?


Патэнцыйныя кватаранты паведамляюць у рэдакцыю, што сёлета варыянтаў здымнага жылля ў Мінску стала прыкметна менш. А тыя, хто ўжо арандуе, расказваюць, што гаспадары падымаюць аплату на 30—50 долараў са словамі «ўсё даражэе» ці нават спасылаюцца на блізкасць Еўрапейскіх гульняў. Што сапраўды адбываецца на рынку сталічнай арэнды і які прагноз па цэнах на жыллё можна чакаць да канца года? З гэтымі пытаннямі мы звярнуліся да спецыялістаў.


Запланаванае падаражанне

Кошты арэнды кватэр у галоўным мегаполісе краіны трымаліся нязменнымі два з паловай гады — з пачатку 2016 года, калі іх зніжэнне спынілася, і па лета 2018-га. Сярэдняя цана арэнды жылля стандартных спажывецкіх якасцяў у той час была на ўзроўні 190—200 долараў у месяц для аднапакаёвых кватэр, 240—250 долараў для двухпакаёвых, а трохпакаёвую можна было арандаваць нават за 260 «зялёных». І гэтыя цэны паказаны без уліку камунальных плацяжоў і актуальныя для кватэр, у якіх зарэгістраваны хаця б адзін чалавек. Яны сапраўды вельмі доўга не рухаліся.

А вось летам мінулага года, перад пачаткам навучальнага сезона, цэны сталі падымацца. Спачатку гэтаму не надавалі асаблівага значэння, бо заўсёды знаходзяцца ўласнікі, якія ў гэты перыяд спрабуюць «згуляць» на часовым дэфіцыце. Але прыход зімы не вярнуў цэны на ранейшае месца, а толькі замацаваў іх рост сёлета.

Начальнік аддзела арэнды жылля агенцтва нерухомасці «Твая сталіца» Маргарыта Пачыцкая адзначае, што, сапраўды, цяпер цана арэнды жылля ў параўнанні з аналагічным перыядам мінулага года вырасла на 5—10 %. Акрамя таго, больш за ўсё падаражанне кранула аднапакаёвыя кватэры — за кошт высокага на іх попыту. А трохпакаёвыя, наадварот, менш за ўсё.

Кватарант — уласнік: як зразумець адно аднаго?

Па словах спадарыні Пачыцкай, найбольш тыповы запыт на арэнду гучыць як «аднапакаёвая кватэра, каля метро, у добрым стане і нядорага». Пры гэтым паняцце «ў добрым стане» ў арандатараў і ўласнікаў часта значыць рознае. Напрыклад, кватарант хоча ўбачыць унутры кватэры хай просты і недарагі, але сучасны рамонт. Ён хоча жыць з мінімальным наборам мэблі: кухняй са сталом і крэсламі, канапай на два паўнавартасныя спальныя месцы і як мінімум адной шафай. Акрамя таго, у кватэры павінен быць мінімальны набор хоць бы новай бытавой тэхнікі, прадстаўлены халадзільнікам, пральнай машынай, электрачайнікам і мікрахвалёўкай.

Але супярэчнасць у тым, што кватэры ў акуратным і сучасным стане з падобнай укамплектаванасцю мэбляй і бытавой тэхнікай, ды яшчэ і побач з метро, гаспадарамі ацэньваюцца інакш, чым арандатарамі — значна даражэй.

Напрыклад, мінімальная цана ад здавання ў арэнду аднапакаёвай кватэры роўная 180 долараў у месяц. Як правіла, гэта будзе альбо кватэра ў аддаленым раёне Мінска (такім, як Шабаны), альбо зусім у прыгарадзе Мінска — напрыклад, Соснах, Прывольным, Сокале ды іншых пунктах. Тэарэтычна за гэтыя грошы можна паспрабаваць знайсці варыянты і ў межах МКАД, але іх стан, хутчэй за ўсё, будзе далёка не найлепшы, у той час як у Соснах за гэтыя грошы прапануюцца акуратныя і ўкамплектаваныя кватэры. А, напрыклад, у Фаніпалі за 170 долараў можна арандаваць аднапакаёвую кватэру ў новабудоўлі, са свежым рамонтам і мэбляй.

Цэны выраслі, за якасць — удвая больш

Калі ж прынцыпова шукаецца аднапакаёвая кватэра ў Мінску і ў добрым стане, то варта быць гатовым да кошту ад 220 долараў у месяц. Але нават за гэтыя грошы арандатар наўрад ці атрымае кватэру з сучасным рамонтам і мікрахвалёўкай — найхутчэй за ўсё гэта будзе фармат «дагледжанага жылля з мінулага стагоддзя». Калі свежасць рамонту і бытавая тэхніка прынцыповая, то цана вырастае не менш чым да 250 долараў. Калі дадаць да гэтага яшчэ і метро ў крокавай даступнасці, то менш чым на 280 «зялёных» наўрад ці варта разлічваць. Пры набліжэнні да цэнтра горада гэтая цана будзе толькі павялічвацца. У цэнтры мінімальная цана маленькіх кватэр набліжаецца да 300—350 долараў за месяц. І гэта зусім не мяжа.

Двухпакаёвыя кватэры карыстаюцца попытам у асноўным сярод сямейных кватарантаў з дзецьмі. Хтосьці шукае кватэру без мэблі, але з акуратным рамонтам, а хтосьці гатовы заехаць толькі ў выпадку «поўнага камплекта». Суадносіны падобных запытаў прыкладна 50 на 50. Мінімальны кошт «двушак» у Мінску — каля 250 долараў у месяц. За гэтую цану можна разлічваць на кватэру без глянцу сучаснасці, якая знаходзіцца ў аддаленым раёне горада і не мае мэблі. Хоць бываюць і выключэнні — калі гаспадары не ганяюцца за цаной, а хочуць здаць кватэру ў арэнду прыстойнай сямейнай пары на працяглы тэрмін.

Сярэдняя цана арэнды сучасных і ўкамплектаваных мэбляй і бытавой тэхнікай двухпакаёвых кватэр знаходзіцца на ўзроўні бліжэй да 300 долараў. Усё залежыць ад якасці рамонту і складу мэблі і бытавой тэхнікі. Блізкасць да метро дадае да цаны яшчэ 30—50 долараў.

Трохпакаёвыя кватэры карыстаюцца значна меншым попытам, чым адна- і двухпакаёўкі. Больш за тое, нярэдкія выпадкі, калі трохпакаёвыя адмаўляюцца арандаваць нават па цане «двушак». Прычына ў высокім кошце камунальных паслуг. Таму мінімальная цана арэнды шматпакаёвага жылля цалкам можа быць на ўзроўні двухпакаёвай кватэры.

Для арандатараў важнае значэнне мае, ці зарэгістраваны ў кватэры хто-небудзь, бо ад гэтага залежыць велічыня камунальных плацяжоў. Прычым розніца плацяжоў можа быць двухразовай і нават большай. Напрыклад, калі ў аднапакаёвай кватэры ёсць зарэгістраваныя, то сума камунальных плацяжоў без уліку электрычнасці складае каля 35 рублёў. А вось калі кватэра «пустая», то плацяжы могуць дасягаць 100 рублёў і больш. У выніку гэтага часцяком кватэры, у якіх ніхто не зарэгістраваны, здаюцца ў арэнду танней — каб кампенсаваць арандатарам розніцу ў «камуналцы». Таму калі вы знаходзіце сімпатычную кватэру па цане ніжэй за рынкавую, то пацікаўцеся наяўнасці зарэгістраваных у ёй людзей.

Гульні тут ні пры чым

Чаму цана арэнды вырасла і ці працягвае яна расці і цяпер? На думку нашага эксперта, прычына падаражэння арэнды ў памяншэнні колькасці кватэр стандартных спажывецкіх якасцяў, або так званага эканом Сегмента. У апошнія гады стала здавацца ў арэнду прыкметна менш новых кватэр. Асабліва гэта заўважна ў параўнанні з 2012—2013 гадамі, калі на рынак у вялікай колькасці выходзілі кватэры ў новабудоўлях мікрараёна Каменная Горка.

Цяпер новыя кватэры таксама з'яўляюцца, але зусім у іншай колькасці. Напрыклад, з Новай Баравой. Але там агульны ўзровень якасці зусім іншы — як правіла, такія кватэры здаюцца ўжо гатовымі да пражывання: з мэбляй і тэхнікай. Таму, адпаведна, і цана высокая.

Кватэр з бюджэтным цэннікам робіцца менш і таму, што гаспадары кватэр паблізу метро лічаць, што месцазнаходжанне ўсё вырашае, і ўжо на падставе гэтага ўстанаўліваюць высокую цану. Пры гэтым якаснага рамонту можа і не быць. Альбо адваротная сітуацыя — уласнікі робяць дарагі рамонт у надзеі, што змогуць высокай цаной арэнды яго апраўдаць. Тэарэтычна гэта магчыма, але тады кватэра павінна знаходзіцца ў новым сучасным доме з такімі атрыбутамі, як абгароджаная тэрыторыя, відэаназіранне і многае іншае.

Што датычыцца ўплыву Еўрапейскіх гульняў, то наш эксперт да гэтай прычыны павелічэння кошту арэнды ставіцца скептычна і з усмешкай. Хоць і прызнае, што некаторыя ўласнікі сапраўды разглядаюць гэтую падзею ў якасці падставы для ўзняцця цэн. Наконт устанаўлення цаны арэнды існуе адно даказанае на практыцы правіла: нават калі і знойдзецца кліент, якога задаволіць відавочна завышаная цана — то не варта радавацца. У большасці выпадкаў падобныя кватаранты з'язджаюць з кватэры, як толькі знойдуць варыянт з адэкватным рынку коштам, і таму ставяцца да кватэры як да вымушанага перавалачнага пункта.

Да канца года яшчэ большага павелічэння кошту арэнды, на думку экспертаў рынку, чакаць не варта. Зрэшты, як і зніжэння. Што датычыцца Еўрапейскіх гульняў, то скасоўваць існуючыя дагаворы арэнды дзеля заўзятараў і турыстаў наш эксперт не раіць: вялікая рызыка страціць тое, што ўжо ёсць. Але калі кватэра цяпер без кватарантаў — тады чаму б і не паспрабаваць. І пачынаць пошук кліентаў можна ўжо цяпер. Бо заяўкі на пошук кватэры ў арэнду ад ахвотных наведаць Еўрапейскія гульні ўжо паступаюць.

Сяргей КУРКАЧ

Загаловак у газеце: Ці «скок­ну­ла» арэн­да пе­рад Гуль­ня­мі?

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.