Вы тут

Эканамічны форум у Смаргоні завяршыўся шэрагам падпісаных кантрактаў


Эканамічны форум аб'ядноўвае тры паўночныя раёны Гродзеншчыны — Астравецкі, Смаргонскі і Ашмянскі. Сёлета прадстаўнікі бізнес-колаў Беларусі, Расіі, Літвы, Польшчы, Латвіі і Украіны сабраліся ў Смаргоні, каб абмеркаваць магчымасці супрацоўніцтва ў сферах энергетыкі, лагістыкі і турызму. Упершыню форум стаў пляцоўкай прэзентацыі школьных стартап-праектаў і святам для аматараў пачаставацца арыгінальнымі абаранкамі.


Астравец — з перспектывай АЭС

Усе тры паўночныя раёны паспяхова развіваюцца, не спыняюцца на дасягнутым, а шукаюць новыя магчымасці і перспектывы для супрацоўніцтва.

Самым дынамічным можна назваць Астравец — горад атамшчыкаў. Будаўніцтва першай беларускай атамнай станцыі літаральна пераўтварыла маленькі гарадок. Ён значна вырас, развіваецца інфраструктура. Для замежных інвестараў раён прывабны яшчэ і тым, што знаходзіцца на мяжы з Еўрасаюзам і мае шырокую транспартную сетку — чыгунку і аўтатрасу, якая злучаецца з міжнароднай. Гэты кірунак — адзін з самых перспектыўных для прыцягнення інвестыцый.

— Генеральным планам развіцця горада энергетыкаў закладзена будаўніцтва лагістычнага комплекса побач з чыгункай, — адзначыў старшыня Астравецкага райвыканкама Ігар Шалудзін. — Замежны інвестар рэалізаваў адзін такі праект побач з міжнародным пунктам пропуску «Катлоўка», дзе працуе электронная чарга. Прывабным з'яўляецца інвеставанне ў аб'екты прыдарожнага сэрвісу. На ажыўленай развязцы ў Астраўцы ёсць магчымасць пабудаваць такі шматфункцыянальны аб'ект.

Ёсць перспектывы для размяшчэння буйных вытворчых прадпрыемстваў. Сваіх інвестараў чакаюць дзве пляцоўкі са зручнымі пад'язнымі шляхамі.

Знаёмства з рэгіёнам падчас форуму прынесла свае вынікі. Так, паміж Астравецкім райвыканкамам і фондам развіцця расійска-беларускага супрацоўніцтва «Белыя росы» Санкт-Пецярбурга падпісаны дагавор аб сумеснай рабоце.

Як адзначыла прэзідэнт фонда Ірына Рогава, форум вельмі спрыяльны для беларуска-расійскага эканамічнага ўзаемадзеяння. Дзякуючы такім сустрэчам абодва бакі падпісалі пагадненне аб пастаўках беларускай прадукцыі ў Расію.

Ашмяны — не толькі край легендаў і паданняў

Сапраўды, раён валодае высокім гісторыка-культурным патэнцыялам. Але не толькі. Як паведаміў падчас прэзентацыі раёна яго кіраўнік Міраслаў Сарасек, выгаднае геаграфічнае становішча дало падставу шырокаму спектру супрацоўніцтва.

— У нас падпісана 12 пагадненняў з рознымі рэгіёнамі шасці краін. Чарговы міжнародны форум дае новы імпульс для ўсталявання далейшых бізнес-кантактаў, — адзначыў Міраслаў Сарасек.

У рэгіёна нямала цікавых прапаноў для інвестараў у розных сферах дзейнасці. І дзелавыя партнёры адгукаюцца. Так адбылося і гэтым разам. У рамках эканамічнага форуму «Паўночны вектар» гравійна-сартавальны завод «Баруны» знайшоў партнёра на пастаўку будматэрыялаў. Кантракт на пастаўку крухмалу падпісаны паміж гальшанскім прадпрыемствам і літоўскай фірмай. Сума кантракта складае 120 тысяч долараў, а гэта 10 працэнтаў ад усёй гадавой выручкі прадпрыемства.

Падчас форуму адбылося падпісанне пагаднення аб супрацоўніцтве паміж Ашмянскім райвыканкамам і польскай гмінай Сувалкі.

Форум плюс абаранкі

Новыя кантакты з'явіліся падчас міжнароднага форуму і ў гаспадароў — смаргонцаў. Нядаўна гарады-пабрацімы — Арзамас і Смаргонь — заключылі пагадненне аб супрацоўніцтве. Цяпер разглядаецца пытанне сумеснай работы Арзамаскага машынабудаўнічага і Смаргонскага агрэгатнага заводаў. Плануецца адкрыццё філіяла беларускага прадпрыемства ў Расіі. Падпісаны пагадненні паміж Смаргонскім райвыканкамам і гмінай Востраў Мазавецка Польскай Рэспублікі.

Сёлета ў праграме форума з'явіліся дзве новыя секцыі. На адной з іх былі прадстаўлены найлепшыя стартап-праекты моладзі трох раёнаў. Яшчэ адна секцыя была прысвечана вытворчасці абаранкаў у краіне. У ёй прынялі ўдзел хлебапёкі з усёй Беларусі, прадстаўнікі прыватнага бізнесу.

«Паўночны вектар» становіцца не толькі месцам для дзелавых кантактаў, але і сапраўдным святам. Падчас форуму прайшоў фестываль-кірмаш «Смаргонскія абаранкі» — новае брэндавае свята аднаго з прамысловых раёнаў Гродзеншчыны. Горад прэтэндуе на тое, каб стаць сталіцай абаранак. Калісьці слава пра гэты беларускі пачастунак разляталася па ўсёй Еўропе. Цяпер у раёне ўзнаўляюць гэтыя традыцыі.

Іван Жук, першы намеснік старшыні Гродзенскага аблвыканкама:

— У трох паўночных раёнах вобласці — Астравецкім, Ашмянскім і Смаргонскім — засяроджаны значны вытворчы патэнцыял. Тут размешчаны прадпрыемствы цяжкай, харчовай, лёгкай, дрэваапрацоўчай прамысловасці, будаўнічыя арганізацыі. Памежнае становішча спрыяе развіццю міжнароднай кааперацыі з суседзямі — літоўскімі і польскімі партнёрамі. У цэлым паўночны рэгіён вельмі перспектыўны, і ў будучыні яго чакае бурнае развіццё, асабліва з улікам будаўніцтва АЭС, першы блок якой увойдзе ў строй у канцы гэтага года.

Маргарыта УШКЕВІЧ

Загаловак у газеце: «Паўночны вектар» з новымі брэндамі

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.