Вы тут

Гродзенцы агучылі свае прапановы па развіцці культурнай прасторы


Гродзенцы агучылі свае прапановы па развіцці культурнай прасторы. Сярод іх — пашырэнне беларускамоўнага асяроддзя, стварэнне ў горадзе мастацкага музея і ўвекавечванне памяці славутых землякоў.


Група гродзенцаў звярнулася з амбіцыёзным праектам — стварыць у горадзе мастацкі музей. Прадстаўнікі творчай інтэлігенцыі бачаць гэтую ўстанову ў былым палацы тэкстыльшчыкаў. У хуткім часе тут пачнецца рэканструкцыя, і будынак будзе перапрафіляваны.

Па словах мастацтвазнаўцы Наталлі Паўленкі, мастацкія музеі ёсць ва ўсіх абласных і некаторых раённых цэнтрах. У Гродне такой установы няма — існуюць асобныя выставачныя залы, некаторыя экспазіцыі месцяцца ў замках, альбо іншых месцах. У той жа час у Гродне ёсць і мастацкая школа, і каледж, і факультэт у ГрДзУ. У Гродне працуе нямала таленавітых мастакоў, тут можна прымаць іх калег з іншых краін з творчымі работамі. З цягам часу мастацкі кірунак мае ўсе падставы стаць такім жа папулярным у горадзе, як музычнае і тэатральнае мастацтва, сцвярджаюць прадстаўнікі творчай інтэлігенцыі. Яны адзначылі, што мастацкі музей — гэта таксама твар горада, свайго роду Эрмітаж для Гродна.

Абласныя і гарадскія ўлады, як паведаміў Уладзімір Краўцоў, бачаць рэалізацыю гэтага праекта больш пашырана. Напрыклад, можна стварыць у былым палацы тэкстыльшчыкаў не проста мастацкі музей, а вялікі культурны цэнтр, дзе будуць размешчаны экспазіцыя гісторыі ХХ стагоддзя і музей прыроды, які цяпер знаходзіцца ў старым замку і павінен адтуль пераехаць. Па словах спецыялістаў аблвыканкама, фондаў для аднаго толькі мастацкага музея недастаткова. Такая ўстанова разлічана на мэтавых наведвальнікаў, а культурны цэнтр у гэтым сэнсе можа прапанаваць больш шырокі дыяпазон.

У горадзе ёсць яшчэ некалькі аб'ектаў, якія могуць прэтэндаваць на мастацкае напаўненне. Гэта гістарычны будынак першай на Беларусі медыцынскай акадэміі, які зараз пустуе і чакае інвестара. Такі ж лёс і яшчэ аднаго архітэктурнага помніка перыяду канструктывізму, — былога Дома афіцэраў. Усе названыя будынкі могуць стаць прыдатнымі для гэтых мэт, адзначыў Уладзімір Краўцоў.

Яшчэ некалькі прапаноў агучылі гродзенцы Аляксандр Місцюкевіч і Віктар Парфёненка. На думку грамадскіх актывістаў, у горадзе недастаткова візуальнай інфармацыі на беларускай мове. Дарэчы, заяўнікі паведамілі, што зараз актыўная работа ў гэтым кірунку вядзецца з адміністрацыяй Гродзенскага заапарка.

Таксама прагучала прапанова ўшанаваць памяць пісьменніка Васіля Быкава, які жыў і працаваў у Гродне. Гродзенцы не ўпершыню звяртаюцца да ўлад з гэтым пытаннем. Абласная арганізацыя Таварыства беларускай мовы гатова знайсці сродкі на шыльду, але на гэта павінна быць згода мясцовых улад.

Уладзімір Краўцоў паведаміў, што гэтае пытанне не застаецца па-за ўвагай. Вызначаны пэўныя месцы ў Гродне, дзе зафіксавана дзейнасць Васіля Быкава. Ёсць музей у рэдакцыі газеты «Гродзенская праўда», дзе ён працаваў, ёсць асобныя экспазіцыі. У гэтым кірунку ўжо прынята рашэнне: мемарыяльны пакой будзе арганізаваны ў доме-музеі Максіма Багдановіча, у той частцы, якая пакуль жылая. Калі яна вызваліцца, а жыхары пераселяцца, гэтая палова адыдзе пад музей Васіля Быкава. Было таксама ўзнята пытанне па ўвекавечванні памяці Кастуся Каліноўскага. Асобы, якія пакінулі свой след у гісторыі, будуць цікавы для турыстаў, лічаць гродзенцы.

— Тэмы духоўнага развіцця, падтрымкі гісторыка-культурнай спадчыны, на якія багатая наша вобласць і горад, — гэта свайго роду сігналы, якія дазваляюць уладам правільна зарыентавацца ў сваіх дзеяннях і больш разумна, кампрамісна рэалізоўваць тыя дзеянні, якія мы таксама трымаем у цэнтры увагі, — гэта культурнае развіццё рэгіёна. Тым больш што ў наступным годзе Ліда будзе культурнай сталіцай Беларусі. У Слоніме сёлета пройдзе Дзень беларускага пісьменства. Гэта сугучна з тымі прапановамі, якія прагучалі адносна пашырэння беларускамоўнага і культурнага асяроддзя, — падкрэсліў Уладзімір Краўцоў.

Маргарыта УШКЕВІЧ

Загаловак у газеце: Звароты з культурным акцэнтам

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.