Беларускія баскетбалісткі пачалі выступленне на ІІ Еўрапейскіх гульнях з перамогі

Спаборніцкую частку Гульняў адкрылі ўдзельнікі турніру па баскетболе 3х3. Першымі на пляцоўку Palova Arena выйшлі жаночыя зборныя Германіі і Румыніі, якія выступаюць у папярэдняй групе В. У гэтым жа квартэце згулялі каманды Венгрыі і Чэхіі. Беларускія баскетбалісткі (у складзе Анастасіі Сушчык, Дар'і Магаляс, Марыны Івашчанкі і Наталлі Дашкевіч) свой першы паядынак у групе А правялі сёння супраць італьянак і атрымалі першую перамогу з лікам 21:7.

«Уражанне ад першай гульні вельмі добрыя, першая гульня - першая перамога. Мы максімальна рыхтаваліся да яе, таму што кожны матч тут вельмі важны і далей будзем старацца. Вельмі прыемна, што за нас хварэе столькі людзей, дзякуй за падтрымку», - пракаментавала Анастасія Сушчык.

Саперніцамі беларусак у групе будуць таксама каманды Расіі і Сербіі. Мужчынская зборная Беларусі ў папярэдняй групе С увечары стартуе матчам з баскетбалістамі Славеніі. На групавым этапе II Еўрапейскіх гульняў наша мужчынская зборная сустрэнецца таксама са зборнымі Літвы і Эстоніі.

Пасля турніраў у групах па дзве найлепшыя каманды выйдуць у плэй-оф. Пары чвэрцьфінальнага раўнда складаюцца па прынцыпе: А1-С2 (1-ы матч), D1-B2 (2), В1- D2 (3), С1-А2 (4). Першую пару паўфіналістаў складуць пераможцы першага і другога чвэрцьфіналаў. У другім паўфінале сыдуцца трыумфатары трэцяй i чацвёртай чвэрцьфінальных гульняў. Пераможцы паўфінальных матчаў, разыграюць узнагароды вышэйшай вартасці, а прайграўшых чакае матч за «бронзу».

Нагадаем, на І Еўрапейскіх гульнях у Баку і ў жаночым і ў мужчынскім турніры залатыя медалі выйгралі расіяне. Акрамя таго, мужчынская зборная Расіі ўзначальвае агульны сусветны рэйтынг па баскетболе 3х3, а таксама мужчынскі рэйтынг у катэгорыі U23, згодна з Міжнароднай федэрацыяй баскетбола (FIBA). Расія дэлегавала ў Мінск маладую каманду, дзе ўсе гульцы знаходзяцца ва ўзроставай катэгорыі да 24 гадоў. Разам з расіянамі на медалі будуць прэтэндаваць бронзавыя прызёры Еўрапейскіх Гульняў 2015 года ў Баку сербы.

У жаночым турніры фаварыткамі лічацца расіянкі, сярэбраныя медалісткі Баку - украінкі і бронзавыя прызёркі іспанкі, а таксама зборная Румыніі, якая займае цяпер другое месца ў еўрапейскай класіфікацыі.

Адзначым, што адначасова з II Еўрапейскімі гульнямі праходзіць чэмпіянат свету па баскетболе 3х3 у Амстэрдаме. Таму Мінск-2019 прадастаўляе выдатную магчымасць маладым камандам прадэманстраваць свае таленты.

Дар’я ЛАБАЖЭВІЧ

Фота Ганны ЗАНКАВІЧ