Код радзімы

Беларусь прымае II Еўрапейскія гульні, дзякуючы якім госці з розных краін свету не толькі будуць сачыць за спартыўнымі падзеямі, але і змогуць пазнаёміцца з культурай, традыцыямі беларускага народа. Так, напярэдадні гульняў было арганізавана шмат мерапрыемстваў, якія ўвайшлі ў праграму спартыўнага свята, адным з якіх стала адкрыццё маштабнага артпраекта ў Нацыянальным гістарычным музеі «Наш край любімы — Беларусь».

У экспазіцыі прадстаўлены ўнікальныя прадметы са збору Нацыянальнага гістарычнага музея: народныя промыслы і рамёствы, прадметы этнаграфіі, творы станковага і дэкаратыўна-прыкладнога мастацтва знакамітых беларускіх мастакоў, якія развіваюць глыбінныя народныя традыцыі ў кантэксце сучаснага мастацтва. Арганізатары падкрэсліваюць, што кожны музейны прадмет, прадстаўлены на выстаўцы, — неад’емны кампанент нацыянальнай беларускай культуры. Мастакі прадэманстравалі творчыя пошукі ў галіне жывапісу, графікі, скульптуры, мастацкага тэкстылю, керамікі і металу. Сярод аўтараў праекта такія прызнаныя майстры, як Леанід Шчамялёў, Уладзімір Тоўсцік, Мікалай Кузьміч, Уладзімір Слабодчыкаў, Рыгор Сітніца, Уладзімір Васюк, Ала Непачаловіч, Тамара Васюк, Наталля Сухаверхава, Алена Обадава і іншыя.

— Наша краіна багатая на таленты. І для нашага грамадства гэта не навіна, — падкрэсліў на адкрыцці выстаўкі куратар праекта Уладзімір Тоўсцік. — Але ж у межах спартыўнага свята ў нас ёсць магчымасць дэманстраваць нашы таленты вялікаму колу зацікаўленага грамадства. У знакавых аўтарскіх работах мастакоў адлюстраваны духоўны свет беларускага народа, яго каштоўнасці і традыцыі, а таксама ўяўленні пра светабудову, беларускія міфы і легенды.

Для кожнага аўтара гэтая выстаўка стала своеасаблівым паглыбленнем у асабістую творчасць. Тут нельга сустрэць выпадковых твораў, экспазіцыя будавалася па прынцыпе прысвячэння краіне. Па словах Уладзіміра Тоўсціка, у кожным чалавеку закладзены код пад назвай «Радзіма» і кожны мастак паказвае і развівае яго па-свойму. Уладзімір Антонавіч з самага пачатку стварэння экспазіцыі падкрэсліваў, што ідэя выстаўкі якраз і заключаецца ў тым, каб прадэманстраваць грамадству, як выглядае той самы беларускі код.

Вікторыя АСКЕРА