Вы тут

Як камунальнікі Міншчыны ўдасканальваюць свае паслугі


Як працуе жыллёва-камунальная гаспадарка цэнтральнага рэгіёна, што выконваецца, а што не, і што робіцца, каб палепшыць становішча — гэтыя і іншыя пытанні прааналізавалі падчас пасяджэння Мінаблвыканкама.


У межах Дзяржаўнай праграмы «Камфортнае жыллё і спрыяльнае асяроддзе» на 2016—2020 гады Мінскі абласны Савет дэпутатаў зацвердзіў рэгіянальны комплекс мерапрыемстваў.

— Фінансаванне іх ажыццяўляецца рытмічна: за першае паўгоддзе 2019 года накіравана 130,5 мільёна рублёў з бюджэту. Разам з тым з дванаццаці паказчыкаў выкананы сем. У Дзяржынскім, Салігорскім, Чэрвеньскім раёнах не рэалізавана па шэсць запланаваных пунктаў, у астатніх раёнах — па два-тры. Чаму? Справа ў абыякавасці ці ў нечым іншым? — звярнуўся да прысутных старшыня Мінаблвыканкама Анатоль ІСАЧАНКА.

— Вельмі актуальнае пытанне — забеспячэнне жыхароў Міншчыны якаснай пітной вадой. За першы квартал 2019-га пры заданні 91,3 % фактычны паказчык склаў 90,8 %. Але да канца года плануем пабудаваць 40 станцый абезжалезвання ў пятнаццаці раёнах вобласці, што дазволіць палепшыць сітуацыю. Для гэтага прымаюцца неабходныя захады: распрацаваны мерапрыемствы, графікі ўводу ў дзеянне аб'ектаў, — запэўніў начальнік упраўлення жыллёва-камунальнай гаспадаркі, энергетыкі і паліва Мінаблвыканкама Аляксандр ЯХНАВЕЦ. — Што датычыцца замены водаправодных і каналізацыйных сетак, то ў першым паўгоддзі ў некаторых раёнах работы вяліся нізкімі тэмпамі, а ў асобных да іх наогул не прыступалі. Прычына — у зрыве тэрмінаў распрацоўкі праектна-каштарыснай дакументацыі.

Вядома, любы спажывец хоча атрымліваць якасныя паслугі ЖКГ па прымальных цэнах. Мінскай вобласці даведзена заданне па зніжэнні затрат на аказанне жыллёва-камунальных паслуг у 2019 годзе ў памеры 12,02 мільёна рублёў, у тым ліку ў першым паўгоддзі — 6,11 мільёна. За студзень—ліпень эканомія склала 6,5 мільёна рублёў, або 105,9 % ад паўгадавога задання. У далейшым плануецца штогод зніжаць гэты паказчык за кошт устанаўлення планава-разліковых цэн, змяншэння неабгрунтаваных расходаў, вытворчых затрат, аптымізацыі штатаў супрацоўнікаў, патанення электраэнергіі.

Яшчэ адно актуальнае пытанне для Міншчыны — ачышчальныя збудаванні. Іх узвядзенне плануецца ў Заслаўі, Смалявічах, Салігорску ў межах праекта «Павышэнне эфектыўнасці і якасці камунальных паслуг». Фінансаванне будзе ажыццяўляцца за кошт пазыковых сродкаў Міжнароднага банка рэканструкцыі і развіцця. Ачышчальныя каналізацыйныя камунікацыі ў Фаніпалі, Клецку і Любані мяркуецца ўладкаваць у 2020—2025 гадах за кошт крэдытных рэсурсаў Еўрапейскага банка рэканструкцыі і развіцця. Акрамя таго, у цэнтральным рэгіёне запланаваны пуск шасці энергакрыніц на мясцовых відах паліва. Два аб'екты ўжо ўведзены ў дзеянне — у пасёлку Зялёны Бор Смалявіцкага раёна і ў вёсцы Лугавая Слабада Мінскага.

У вобласці пераймаюць усё найлепшае, новае ў сваіх калег. Напрыклад, цяпер на Міншчыне выбіраюць выканаўцаў работ і паслуг на канкурэнтнай аснове, як у сталіцы, з улікам рэгіянальных асаблівасцяў і эканамічнай мэтазгоднасці. Тут стварылі службы заказчыкаў паслуг ЖКГ. На першапачатковым этапе такія структуры з'явіліся ў гарадах, дзе пражывае 100 тысяч і больш чалавек. Напрыклад, у Салігорску. Затым — у Жодзіне, Барысаўскім, Маладзечанскім і Слуцкім раёнах. Яны кантралююць якасць і працэс аказання асноўных і дадатковых паслуг жыллёвымі і эксплуатуючымі арганізацыямі, цякучы і капітальны рамонт жыллёвага фонду, добраўпарадкаванне тэрыторый. У далейшым на базе існуючых структур плануецца стварыць міжрэгіянальныя дзяржаўныя службы заказчыкаў.

Станоўча паўплывала на сітуацыю ў сферы ЖКГ увядзенне адзінай дыспетчарскай службы.

— Грамадзяне могуць патэлефанаваць на кароткі нумар 115 са сваёй праблемай, заяўку зарэгіструюць дыспетчары, унясуць даныя ў праграмную базу. І чалавека абавязкова праінфармуюць аб выніках, — адзначыў Аляксандр Яхнавец. — Раней здаралася, што звароты маглі не зафіксаваць, забыць пра іх. Цяпер наладжана дакладная сістэма, пры якой такое выключана.

— У вобласці таксама працягваецца планамерная работа па замене ліфтавага абсталявання паводле ўказа кіраўніка дзяржавы, — канстатаваў генеральны дырэктар дзяржаўнага аб'яднання «ЖКГ Мінскай вобласці» Васіль ШАШОК. — У канцы 2018-га назіралася пэўнае адставанне. За першае паўгоддзе планавалася ўстанавіць 141 адзінку новага абсталявання, але заменена толькі 126 зношаных пад'ёмнікаў. Цяпер усё ідзе ў штатным рэжыме. Праўда, у розных раёнах праблему вырашаюць па-рознаму. У Маладзечанскім і Слуцкім заданні перавыкананы. Салігорскі, Вілейскі і Пухавіцкі адстаюць.

Разам з тым Васіль Шашок запэўніў, што ў трэцім квартале камунальнікі выйдуць на прагнозныя паказчыкі і да канца года заменяць 230 ліфтаў.

Таццяна ЛАЗОЎСКАЯ

Фота БЕЛТА

Загаловак у газеце: Адзіны нумар 115 і службы заказчыкаў

Выбар рэдакцыі

Тэатр

Барыс Цяцёркін: Я аднолькава ўлюбёны і ў тэатр, і ў кіно

Барыс Цяцёркін: Я аднолькава ўлюбёны і ў тэатр, і ў кіно

Артыст Купалаўскага тэатра —  пра дзяцінства, шлях да сцэны і вывучэнне беларускай мовы.

Грамадства

Праўда і міфы аб паўфабрыкатах

Праўда і міфы аб паўфабрыкатах

У Год якасці мы задалі навукоўцам нязручныя пытанні аб тым, што «ўнутры» магазіннай пельмешкі або катлеткі.

Калейдаскоп

Усходні гараскоп на наступны тыдзень

Усходні гараскоп на наступны тыдзень

Для Блізнятаў надыходзіць тыдзень сур’ёзных змен у асабістым жыцці.

Адукацыя

Беларуская мадэль дашкольнай адукацыі: якасць, даступнасць, адказнасць

Беларуская мадэль дашкольнай адукацыі: якасць, даступнасць, адказнасць

У нашай краіне амаль 90 працэнтаў дзяцей ад года да шасці атрымліваюць дашкольную адукацыю.