Вы тут

Выставачны праект у Нацыянальным цэнтры сучасных мастацтваў «Разам мы сіла!» прыехаў з Азербайджана


Выставачны праект у Нацыянальным цэнтры сучасных мастацтваў «Разам мы сіла!» прыехаў з Азербайджана. Паколькі ў Баку прайшлі I Еўрапейскія гульні, гэтая выстаўка была створана спецыяльна да спартыўных падзей Мінска — II Еўрапейскіх гульняў. 23 скульптары прынялі ў ёй удзел і стварылі ўнікальныя работы па 20 відах спартыўных дысцыплін.


Фрагмент экспазіцыі.

Мастацтва і спорт спрадвек звязаны. У Старажытным Рыме і Грэцыі спорт з’яўляўся неад’емнай часткай выхавання юнакоў. Адну з найважнейшых роляў для стварэння ў грамадстве спартыўнай атмасферы і здаровага ладу жыцця займалі рознага кшталту гульні — алімпійскія, істмійскія, піфійскія, панафінейскія і іншыя. Першапачаткова на гэтых гульнях атлеты спаборнічалі толькі ў кіданні дыска і бегу, але пазней колькасць дысцыплін павялічылася, з’явілася больш відаў бегу, барацьба, кіданне дзіды і ег на калясніцах.

Мастацтва старажытных грэкаў дэманстравала, якім, па іх уяўленні, мусіць быць кожны чалавек: фізічна добра складзеным, прыгожы целам, душой і гарманічна развітым. І такі вобраз атлета ў антычнай Грэцыі з’яўляўся распаўсюджаным у скульптуры. У вядомых творах старажытнагрэчаскага скульптара Паліклета «Дзіадумен» і «Дарыфор» быў створаны кананічны вобраз атлета, які пазней стаў узорам для пераймання. Паліклет у дадатак да скульптуры напісаў «Канон», у якім былі разлічаны ідэальныя прапорцыі чалавечага цела. Па яго сістэме скульптуры выходзілі трохі прысадзістымі, але выдатна развітымі фізічна і з прыгожымі рысамі твару.

Яшчэ адным вядомым старажытнагрэчаскім скульптарам быў Мірон. Ён праславіўся работай «Дыскабол», на якой намаляваны грэчаскі атлет у імгненне найвышэйшага напружання перад тым, як кінуць дыск. У такім статычным мастацтве, як скульптура, Мірон змог адлюстраваць у бронзе вельмі дынамічнае дзеянне.

За доўгі час ад першай Алімпіяды да II Еўрапейскіх гульняў разнавіднасці спартыўных дысцыплін змяніліся і з’явіліся новыя. Але скульптары працягваюць, як і ў Антычнасці, звяртацца да відаў спорту. Толькі цяпер мастакі ставяць перад сабой іншыя мэты: не стварэнне «кананічнасці» або анатамічна правільнага атлета, а больш глабальна пераасэнсаваць спартыўныя дысцыпліны. Часам гэта можа выяўляцца ў больш абстрактным разуменні, напрыклад, як у творы Цеймура Гарпыбава «Фехтаванне» або Заміка Рзаева «Лёгкая атлетыка», дзе па сілуэце і вуглаватых элементах ці, наадварот, плаўных можна вызначыць від спорту. Таксама трактоўка можа быць абсалютна рэалістычнай, як у работах Фархада Дадашзадзэ «Стральба з лука», Іслама Гасаналізадзэ «Настольны тэніс» і Саміра Качаева «Баскетбол». Мастакі, хоць і адышлі ад рэалізму і знайшлі новыя пластычныя стылістычныя рашэнні, але вобраз усё роўна выразна счытваецца.

У ХХІ стагоддзі скульптура не загнаная ў рамкі, мастакі вольныя інтэрпрэтаваць рознымі спосабамі рэчаіснасць, перадаваць яе з дапамогай розных матэрыялаў. Наведаўшы выстаўку ў НЦСМ, глядач не застанецца абыякавым да такой колькасці мастацкіх варыянтаў спартыўных дысцыплін. Бо аўтары стварылі не проста скульптуры, яны зразумелі дух выбранага віду спорту.

Алена ШАЎЧЭНКА

Загаловак у газеце: Пераасэнсаванне

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.