Вы тут

Відэафільм, які зрабіла Лія


На чарговым конкурсе навукова-тэхнічнай творчасці навучэнцаў Саюзнай дзяржавы “Таленты XXІ стагоддзя” быў адзначаны відэафільм “Ад беларускіх раўнін да вяршыняў Каўказа”


Лія Тхашыгугава з дыпломам

У сваім допісе з Нальчыка Павел Сідарук, старшыня савета Кабардзіна-Балкарскага Грамадскага руху “За яднанне, сябры!”, паведаміў радасную навіну. І мы з ім шчыра парадаваліся за беларусаў Кабардзіна-Балкарыі, за вучаніцу 5‑й школы горада Майскі Лію Тхашыгугаву, якая зрабіла відэафільм. На пачатку яго (тое бачна з дасланага сцэнара) дзяўчына расказвае, што займаецца ў Нальчыку ў Дзіцячай акадэміі творчасці “Солнечный город”, якая ў супрацы з многімі арганізацыямі. Сярод сяброў акадэміі — суполка “За яднанне, сябры!”, якая працуе больш за 10 гадоў. “Рух падтрымлівае культуру й традыцыі беларусаў у Кабардзіна-Балкарыі, а такіх у нас больш за 1000, — расказвае за кадрам Лія. — А яшчэ адна задача суполкі “За яднанне, сябры!”, — падтрымка й развіццё дружалюбных стасункаў з прадстаўнікамі ўсіх народаў і народнасцяў, што жывуць тут”. Беларусы, паведамляе далей, праводзяць сустрэчы, рэалізуюць праекты, у якіх і навучэнцы акадэміі часта ўдзельнічаюць.

Між тым, вынікае з фільма, у Кабардзіна-Балкарскім дзяржуніверсітэце на філалагічным аддзяленні вывучаюць беларускую мову й літаратуру. Заняткі праводзяцца факультатыўна. Студэнты вывучаць мову, чытаюць беларускіх класікаў у арыгінале, праводзяць творчыя сустрэчы, паэтычныя вечарыны. “Такія сустрэчы дапамагаюць нам зразумець, што нашы народы аб’ядноўвае вельмі многае: імкненне да прыгожага, гасціннасць, беражлівае стаўленне да традыцый, працавітасць”, — разважае юная рэжысёрка. Згадвае й пра старонкі гісторыі Вялікай Айчыннай вайны, у часе якой больш за 8 тысяч ураджэнцаў Кабардзіна-Балкарыі ваявалі з ворагам на тэрыторыі Беларусі за агульную тады нашу Радзіму. “Сотні адважных сыноў Кабардзіна-Балкарыі прынялі першы ўдар гітлераўцаў, тысячы вызвалялі Беларусь пасля пералому вайны, — гучыць за кадрам. — Сярод іх былі й вядомыя паэты Алім Кешокаў, Кайсын Куліеў, Алі Шагенцукаў”. Нагадаем, што Алі Асхадавіч — класік кабардзінскай літаратуры. Вайна прывяла яго ў Беларусь, восенню 41‑га ён трапіў у палон пад Бабруйскам, там і загінуў. Пра тое, дарэчы, з наводкай Паўла Сідарука мы раней пісалі — гл. “Няскораны паэт з Баксана” — ГР, 25. 02.2016.

Што вядома пра конкурс “Таленты XXІ стагоддзя? З дасланых Паўлам Сідаруком матэрыялаў вынікае, што праводзяць яго Міністэрства асветы Расіі сумесна з Мінадукацыі Беларусі пры падтрымцы Пастаяннага Камітэта Саюзнай дзяржавы раз у два гады, пачынаючы з 2009‑га, за кошт сродкаў бюджэту Саюзнай дзяржавы. Сёлета конкурс праходзіў з 14 па 19 мая ў горадзе Каралёў Маскоўскай вобласці. Паўдзельнічала ў ім 218 чалавек з Расіі, 109 — з Беларусі. Конкурс спрыяе пашырэнню расійска-беларускай інтэграцыйнай супрацы ў сферы адукацыі, умацаванню сяброўскіх сувязяў між тымі, хто займаецца тэхнічнай творчасцю. Ён дапамагае выявіць і падтрымаць таленавітых і адораных дзяцей у галіне навукова-тэхнічнай творчасці, развіць у іх цікавасць да інжынерна-тэхнічных прафесій, даследчай дзейнасці. У складзе журы — вядомыя навукоўцы, вядучыя выкладчыкі ВНУ, педагогі-наватары з Беларусі ды Расіі. Па традыцыі ў якасці ганаровых гасцей запрашаюць вядомых дзеячаў навукі, тэхнікі й вытворчасці, вядомых канструктараў, лётчыкаў-касманаўтаў. Праграма конкурсу — гэта 8 навуковых секцый. Акрамя тэарэтычнай падрыхтоўкі каманды выконваюць практычную частку заданняў: удзельнікі абараняюць уласныя вынаходкі, праекты, мадэлі ці ўзоры.

Даніла Елісееў (справа) і Тамірлан Нагоеў — пераможцы конкурсу

Правядзенне конкурсу — гэта клопаты супрацоўнікаў Рэспубліканскага цэнтра інавацыйнай ды тэхнічнай творчасці Беларусі, Федэральнага цэнтра тэхнічнай творчасці навучэнцаў Расіі. Раней конкурсы праходзілі ў Беларусі (2009, 2013, 2017) і ў Расіі (2011, 2015), сёмы ў маі 2021‑га будзе прымаць Беларусь. Кожны конкурс — гэта, вядома ж, незабыўная падзея ў жыцці хлопчыкаў і дзяўчынак. На гэты раз у ім, піша Павел Сідарук, паўдзельнічалі 7 каманд з Беларусі ды 15 каманд з федэральных адміністрацыйных акругаў Расіі — гэта пераможцы, прызёры абласных і рэгіянальных конкурсаў. Каля 300 юных даследчыкаў, рацыяналізатараў, вынаходнікаў, астраномаў, праграмістаў ва ўзросце 14–18 гадоў прывезлі на суд журы, абмеркаванне аднагодкаў свае навуковыя распрацоўкі, праекты. Ладзілася выстава навукова-тэхнічнай творчасці, тэматычныя Дні Беларусі, Расіі, Навукі. Канцэртныя праграмы, творчыя вечары, майстар-класы навукоўцаў і вядомых вынаходнікаў, займальныя сустрэчы з цікавымі людзьмі, экскурсіі — усё гэта было ў праграме конкурсу.

Кабардзіна-Балкарскую Рэспубліку, удакладняе Павел Сідарук, прадставілі 12 хлопчыкаў і дзяўчынак з Дзіцячай акадэміі творчасці “Солнечный город”, камандай кіравалі заслужаная работніца адукацыі КБР Таццяна Наўяніс і загадчыца аддзела навукова-даследчай і канструктарскай работы ў акадэміі Элена Наўяніс. Цікава, што абсалютнымі пераможцамі конкурсу сталі Даніла Елісееў з 6‑й гімназіі Мінска з праектам “Рабочая станцыя D3D” і навучэнец згаданай Дзіцячай акадэміі творчасці “Солнечный город” з Нальчыка Тамірлан Нагоеў з праектам “Мабільныя міні-ГЭС колавага й гірлянднага тыпу для забеспячэння электраэнергіяй у цяжкадаступных горных раёнах”. А відэафільм “Ад беларускіх раўнін да вяршыняў Каўказа”, які зрабіла Лія Тхашыгугава, на секцыі “Відэафільм” заняў ганаровае трэцяе месца.

Іван Іванаў

Фота soyuz.by

Выбар рэдакцыі

Жыллё

Па якіх крытэрыях дамы ўваходзяць у праграму па капрамонце?

Па якіх крытэрыях дамы ўваходзяць у праграму па капрамонце?

Пра ўсе тонкасці правядзення капітальнага рамонту расказалі спецыялісты.

Рэгіёны

Самы працяглы ўрок гістарычнай праўды і сяброўства

Самы працяглы ўрок гістарычнай праўды і сяброўства

Удзельнікі «Цягніка Памяці» папярэдніх гадоў дзеляцца сваімі ўражаннямі ад праекта.

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.