Вы тут

Паклікаў Давыд-Гарадок


Старанна працуюць людзі ды ўмеюць і адпачываць хораша на Століншчыне, у палескай глыбінцы


Мікола Котаў і Кацярына Пяршлевіч

Сваёю малою радзімай лічу я ўсё Палессе, а яно ж вялікае! Наведаў нядаўна Століншчыну — мясціны поўдня Брэсцкай вобласці, што сталі мне роднымі. Там у вёсцы Рамель, якая славіцца племяннымі коньмі, аграгаспадаркай “Палесская ніва” (цяпер — адкрытае акцыянернае таварыства, якім кіруе Аляксей Бародзіч), яшчэ ў 70‑я гады заснаваны быў ансамбль танца “Ніва”. Прыемна ўсведамляць, што ўкладзеныя табой намаганні далі, як кажуць, добры ўраджай. І па сёння гурт у цудоўнай творчай форме: гэта ўзорны аматарскі ансамбль народнага танца “Ніва” Рэмельскага цэнтра культуры й адпачынку. Дарэчы, гурт быў трэцім са створаных мной на Палессі. Першым заявіў пра сябе аж на Крамлёўскай сцэне ў Маскве ансамбль “Прыпяць”, другім ствараўся “Верасок” — у вёсцы Верасніца Жыткавіцкага раёна Гомельшчыны. Старэйшаму сёлета — 55. І ўсе яны радуюць палешукоў сваім мастацтвам, перадаюць багатую танцавальную культуру краю нашчадкам у спадчыну.

На гэты раз мяне з сябрамі, самадзейнымі артыстамі, запрасілі на Століншчыну ў святочную пару: Давыд-Гарадок адзначаў 75‑годдзе Вызвалення. Гараджане вельмі душэўна, вялікай грамадою ўшаноўвалі памяць тых, хто абараняў Радзіму ад ворага, хто не вярнуўся з палёў бітваў дадому. Мала цяпер засталося з намі ветэранаў вайны, і ўсе яны — у пашане.

Прыехалі мы на свята з артыстамі Тэатра фальклору “Матуліна хата”. Дапамог нам здзейсніць творчую паездку вядомы прадпрымальнік, пісьменнік Валеры Сарока — чалавек вялікай душы, неабыякавы да народнага мастацтва. Цудоўныя падарункі — пяць кніг аўтара — былі ўручаны гараджанам на сцэне. Іх атрымаў Вячаслаў Стаднік, старшыня гарвыканкама. Ветэран ансамбля “Прыпяць” і афіцэр запасу, удзельнік Тэатра фальклору Іван Матох зачытаў прывітальныя словы.

Наша спеўна-музычная кампазіцыя прыйшлася даспадобы гледачам. На сцэне былі артысткі Кацярына Пяршлевіч, Валянціна Абібок-Барыгіна, Вольга Якушэвіч, гарманіст Сяргей Страх.

Святочны творчы дэсант у Давыд-Гарадку

Свята на галоўнай плошчы Давыд-Гарадка доўжылася да позняй ночы. Эх, умеюць жа весяліцца палешукі! Арганічна, з добрым гумарам вёў канцэртную праграму Міхась Шыкунец — мясцовы, давыд-гарадоцкі талент.

Мікола Котаў, мастацкі кіраўнік Тэатра фальклору “Матуліна хата”.

Ад рэдакцыі. Мікола Конанавіч паведаміў нам, што нядаўна ён атрымаў падарункі з Цюмені — сувенірную дудачку, смачныя цукеркі, буклеты ансамбля “Лянок”. Ім кіруе наша зямлячка, ураджэнка Палесся (з Петрыкава) Клаўдзія Зуева. У тым ансамблі даўно спявае Святлана Рамнёва, яна — дачка Вольгі Якушэвіч, салісткі фальклорнага гурта “Спасаўка” з вёскі Чэрнічы Жыткавіцкага раёна. Праз Святлану ды Вольгу Кірылаўну й дайшло цёплае прывітанне з зямлі Сібірскай.

Мікола Конанавіч перадае падзяку землякам у Цюмень з надзеяй, што Тэатр фальклору “Матуліна хата” яшчэ сустрэнецца з “Лянком” на адной сцэне.

Фота Васіля КУЛІКОВА

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.