Тры нагоды ўключыць тэлевізар

За горадам

Ужо ў гэтую нядзелю, 25 жніўня, на тэлеканале МІР стартуе шоу «ФазэндаЛайф» — рэінкарнацыя ўлюбёнай дачнікамі за 11 гадоў перадачы «Фазэнда», адрасаваная ўсім тым, хто на сезон альбо пастаянна збягае з гарадскога тлуму на прыроду і хоча напоўніць загараднае жыццё творчасцю і камфортам. Дапамагае ўдзельнікам у гэтым каманда вопытных дызайнераў, будаўнікоў і дэкаратараў, а таксама вядучы — артыст Цімафей Пронькін (і не, вам не падалося, гэта насамрэч былы ўдзельнік расійскага музычнага гурта Hі-Fі).

Дарэчы, ён таксама ўдзельнічае ў майстар-класах па дызайне, бярэцца, калі трэба, за пэндзлі і шпаталі і майструе мэблю. І не ён адзін! «Калі не хапала рук, а здымачны графік ідзе, я прыехала з офіса на будоўлю, пераапранулася і разам з дызайнерам і памочнікамі шэсць гадзін фарбавала фасад», — зазначае крэатыўны прадзюсар праграмы Вольга Алюшына. Наогул, расказваюць тэлевізійнікі, кожны загарадны рамонт займае ад 20 да 30 дзён у залежнасці ад аб'ёму работ. Але галоўную сваю задачу стваральнікі праграмы бачаць нават не ў тым, каб зрабіць канкрэтным героям утульна і прыгожа, а каб паказаць астатнім, што дачны рамонт — гэта не страшна і далёка не заўжды дорага, калі ўключыць фантазію і прыслухацца да парад прафесіяналаў.

Праверка на кемлівасць

1 верасня ў эфіры сацыякультурнага канала Беларусь 3 прэм'ера — тэлевіктарына «Сваімі словамі». Гэта зноў рэінкарнацыя ранейшай папулярнай віктарыны «Размаўляем па-беларуску» з Аленай Трацэнкай. Яна ж вядзе і гульню «Сваімі словамі».

Праграма здымаецца творчымі сіламі тэлерадыёкампаніі «Гомель» і прапануе ўсім ахвотным праверыць сябе ў веданні беларускай мовы і літаратуры, а таксама гісторыі, культуры і мастацтва нашай краіны. У інтэлектуальным спаборніцтве ўдзельнічаюць па дзве каманды, а вось ці мудрагелістыя заданні для іх падрыхтавалі рэдактары і ці будуць гледачы шчоўкаць гэтыя пытанні, нібы арэшкі, даведаемся акурат у Дзень беларускага пісьменства.

Запішыце рэцэпт

Папулярнасць кулінарных тэлешоу — з'ява паўсюдная і пастаянная, незалежна ад часу і геаграфіі, гэтыя праграмы запоўнілі эфір большасці краін свету і займелі мільёны прыхільнікаў, якія ведаюць на памяць імёны і рэцэпты Джэймі Олівера, Гордана Рамзі, Барыса Бурды, Юліі Высоцкай і іншых гуру тэлекулінарыі. Таму не дзіва, што ў новым сезоне канал Беларусь 1 працягне традыцыю гатавання перад камерамі — у праекце «Усе за стол!».

Стартуе ён таксама 1 верасня. Як расказалі «Звяздзе» ў Белтэлерадыёкампаніі, «за стол» у кожным выпуску праграмы сядуць дзве сям'і вядомых беларусаў — артыстаў, музыкантаў, спартсменаў і г. д. А гледачы даведаюцца, якія стравы даюць натхненне і сілы і ацэняць кулінарныя здольнасці сваіх папулярных асоб. Так, у прэм'ерным выпуску спаборніцтва на кухні адкрыюць сем'і заслужанага артыста Беларусі Аляксандра Саладухі і алімпійскага чэмпіёна па веславанні на байдарках і каноэ Аляксандра Багдановіча.