Сёння ў Мінскім сувораўскім ваенным вучылішчы адбылася цырымонія пасвячэння. Праз яе ў Дзень ведаў прайшлі 73 новаспечаныя першакурснікі. Яны атрымалі алыя пагоны з рук колішніх навучэнцаў — усё згодна з даўняй традыцыяй.
— Пагоны ўручаюць генералы — міністр абароны Андрэй Раўкоў, намеснік міністра абароны Сяргей Патапенка і іншыя колішнія выпускнікі Сувораўскага вучылішча, якія дамагліся значных прафесійных вышынь, — расказвае начальнік навучальнай установы генерал-маёр Аляксандр Навуменка. — Першыя пагоны юным сувораўцам прышываюць навучэнцы выпускнога курсу. Тым самым яны дэманструюць узаемадапамогу.
У бліжэйшы час іх чакае асваенне па агульнаадукацыйнай праграмы. Але акцэнт будзе рабіцца на спецыяльную падрыхтоўку. Вялікую ўвагу нададуць стралковай падрыхтоўцы, плаванню. Адкрыўся і новы спартыўны гарадок.
Акрамя таго, з гэтага года сувораўцы змогуць наведваць Мінскі палац дзяцей і моладзі, каб мець такія ж магчымасці для ўсебаковага развіцця, як і іх равеснікі, якія вучацца ў звычайных школах. Мяркуецца, што яны будуць наведваць заняткі па робататэхніцы, авіямадэляванні, шахматах. Гэта дазволіць рыхтаваць сувораўцаў да ўдзелу ў міжнародных конкурсах, якія праходзяць у Расіі на базе тамтэйшых кадэцкіх і сувораўскіх вучылішчаў.
— Гэты дзень вам запомніцца на ўсё жыццё, — сказаў міністр абароны Беларусі Андрэй Раўкоў. — То — пачатак жыцця, станаўлення вас як мужчын, якое прывядзе вас да вышынь. Вы мусіце дакладна памятаць, што вучыцца заўжды цяжка. Напрыканцы гэтага шляху вы зробіце выбар — або і надалей звязваць сваё жыццё з арміяй, або стаць грамадзянскім спецыялістам. Але ў любым разе, вам тут дадуць адукацыю, якая адкрые перад вамі ўсе дарогі.
Арцёму Жукаву споўнілася 12 год. Хлопчык выглядае развітым не па гадах. І нягледзячы на хвалявальны момант, трымаецца вельмі годна.
— Я сам родам з Мінска. У Сувораўскае вучылішча вырашыў паступаць, калі ўпершыню ўбачыў рэкламу. Пасля схадзіў на дзень адчыненых дзвярэй. І мне вельмі спадабалася! Мой бацька і дзед — лётчыкі, служылі ў паветрана-дэсантных войсках. Пра армейскае жыццё ведаю з маленства. Конкурс сёлета быў вялікі — восем чалавек на месца! Але падчас здачы іспытаў я не напружваўся. Трэба было прайсці праз выпрабаванні па беларускай і рускай мовах, матэматыцы і фізкультуры. Па ёй мы здавалі бег на паўтара кіламетры, шэсцьдзесят метраў і падцягванне. Тут мы ўжо знаходзімся тыдзень. За гэты час мяне навучылі прышываць падкаўнерык, крыху асвоіўся і са страявой падрыхтоўкай.
Пасля ўручэння пагон у сувораўцаў наступіў вольны час. Але ён непрацяглы — ужо а 19-й яны мусяць знаходзяцца ў падраздзяленнях. Наперадзе ў іх доўгія гады вучобы. Дык пажадаем ім удачы!
Валяр’ян ШКЛЕННІК
Фота аўтара
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.