Вы тут

Як адсвяткавалі Дні сваіх гарадоў у выхадныя Мінск, Гомель і Гродна


Не памылімся, калі скажам, што гэта быў самы насычаны па колькасці імпрэзаў уік-энд за апошні час: адразу два буйныя абласныя цэнтры і сталіца запрашалі на свае святочныя мерапрыемствы. У Мінску гулі ўсе мікрараёны, здаецца, не было ніводнай пляцоўкі, дзе б не разгарнулася нейкая дзея: і «Дзень танкіста» святкавалі, і па вуліцах (у тым ліку на абцасах) бегалі, і мотасезон закрывалі... У Гомелі арганізавалі свята смачнай і здаровай ежы — першы «Мясмалфэст» у гэтым рэгіёне, у Гродне зрабілі акцэнт на музычную разнастайнасць. Карацей, ад прапаноў у афішы вочы разбягаліся... Зразумела, што апынуцца адначасова ў трох месцах немагчыма фізічна, але чытачы «Звязды» атрымаюць магчымасць даведацца, як прайшлі святочныя мерапрыемствы, з рэпартажаў нашых карэспандэнтаў.


Фота БелТа.

«Мінчанін года» і «Менск старажытны»

«Дзень танкіста», парад байкераў і падарожжа ў антычнасць — чаго толькі не адбывалася ў сталіцы, якая адзначала сваё 952-годдзе... А яшчэ ў Дзень горада на свет з'явілася 33 немаўляці і нарадзілася больш як 200 новых сем'яў.

Святкаванне пачалося ў пятніцу, а ў суботу набрала моц. На фестывалі «Мінск інтэрнацыянальны» гледачы знаёміліся з культурамі іншых краін і спрабавалі замежныя стравы. На мотафестывалі H.O.G. Rally Mіnsk 2019 госці любаваліся шматтысячным парадам байкераў і відовішчным дрыфтынгам на аўто.

Міжнародны гістарычны фестываль «Менск старажытны» запрасіў на рыцарскія турніры, конныя баі і спаборніцтвы лучнікаў.

Трапіць у мінулае маглі і наведвальнікі Цэнтральнага батанічнага сада, адкуль яны выпраўляліся ў Старажытную Грэцыю, каб пабачыць антычных багоў.

Кожны з раёнаў сталіцы прыдумаў да свята сваю асаблівую разынку. У Заводскім раёне, напрыклад, прайшоў забег «Абцасік» у абутку на шпільках не ніжэй за пяць сантыметраў.
У Маскоўскім — высвятлялі, хто лепшы ў велабіятлоне і паркавым валейболе. У Фрунзенскім — арганізавалі фестываль для ўсёй сям'і Famіly Party.

Савецкі раён зладзіў у Камароўскім скверы фестываль «Тэрыторыя здароўя». Прыхільнікі здаровага ладу жыцця частаваліся ласункамі без цукру, хатнім хлебам і фермерскай гароднінай, а адпрацаваныя батарэйкі выменьвалі на мюслі. Цэнтральны раён сабраў гасцей на «Дзень танкіста» ў парку Перамогі і міжнародныя спаборніцтвы агняборцаў «Наймацнейшы пажарны-ратавальнік».

У Ленінскім раёне прымалі фестываль традыцыйнай музыкі Rajok, які сімвалізуе пераход ад лета ў восень, у Партызанскім — прайшоў маладзёжны фестываль вулічнай культуры і спорту MІNSK STREET SUMMІT. А жыхары Кастрычніцкага раёна выраблялі сувеніры ў тэхніцы скрапбукінг.

У Першамайскім раёне пасля рэканструкцыі ўрачыста адкрыўся загс — у гэты дзень тут пажаніліся шэсць пар маладых, а адна пара адзначыла залатое вяселле. Абноўлены будынак павінен стаць стымулам для абрадавай работы і адраджэння народных звычаяў пры стварэнні сям'і. За 50 гадоў у гэтым будынку зарэгістравалі больш як 116 тысяч нараджэнняў і звыш 58 тысяч шлюбаў. Па статыстыцы, беларускі ўпершыню бяруць шлюб у амаль 26 гадоў, а беларусы — у 28.

Віншаванні прымаў, дарэчы, не толькі горад. Лаўрэатаў конкурсу «Мінчанін года» узнагароджваў старшыня Мінгарвыканкама Анатоль СІВАК, які заўважыў:

— Мінск заўсёды славіўся сваімі талентамі, якія заўжды ідуць поруч з працавітасцю, і гэтыя людзі — лепшае таму пацвярджэнне. Са 125 прэтэндэнтаў абраныя 13, чые дасягненні — прыклад пошуку, адданасці справе, імкнення зрабіць для горада больш.

Завяршылася святкаванне захапляльным феерверкам і агульнымі спадзяваннямі дачакацца наступнага дня нараджэння сталіцы.

Ірына СІДАРОК

Валяр'ян ШКЛЕННІК


Гомель адзначыў някруглую дату — 877 гадоў з дня заснавання

Прадстаўнікі Акцябрскага раёна рыхтуюцца абараняць свае строі на конкурсе нацыянальнага касцюмы.

З сапраўднымі быкамі і «Дыскатэкай Аварыя»

Паўмільённы Гомель упершыню пачатак Дня горада адзначыў на набярэжнай Сожа. Новая пляцоўка, дзе зманціравалі вялікую сцэну з экранамі для трансляцыі, гараджанам спадабалася. І падарунак ад абласных улад гораду — таксама.

Старшыня аблвыканкама Генадзь САЛАВЕЙ павіншаваў са святам на беларускай мове, а потым падарыў мэру Гомеля Пятру Кірычэнку сімвалічны сертыфікат на суму 2 мільёны 750 тысяч рублёў. Грошы мэтавыя: прызначаны для завяршэння будаўніцтва паліклінікі ў мікрараёне № 17, а таксама ўмацавання матэрыяльна-тэхнічнай базы ўстаноў аховы здароўя абласнога цэнтра. Кіраўнік вобласці падкрэсліў, што пастаянна адкрываюцца новыя грані турыстычнага патэнцыялу горада. Сёння замежнікамі актыўна выкарыстоўваецца медыцынская і аздараўленчая база рэгіёна, ёсць перспектывы не толькі ў медыцынскага турызму:

— Ужо амаль 10 прадпрыемстваў распрацавалі свае прамысловыя экскурсійныя маршруты. Набірае абароты і гастранамічны турызм. Яго галоўны аб'ект і месца прыцягнення аматараў смачнай і здаровай ежы — Першы гомельскі «Мясмалфэст».

Сапраўды, многія гамяльчане аддалі перавагу пляцоўцы ў мікрараёне Валатава. Там прадстаўнікі ўсіх мяса-малочных прадпрыемстваў Гомельшчыны разгарнулі яркае гастранамічнае шоу. На ім знайшлося месца як для дзяцей, якія актыўна ўдзельнічалі ў многіх конкурсах і атрымлівалі за гэта «грошы», так і для дарослых. Яны разам з прафесіяналамі маглі навучыцца гатаваць цірамісу ці проста адпачыць, пакаштаваўшы смачную нацыянальную ежу.

Ну а сапраўдныя каровы, авечкі, трусы, якіх многія дзяці, як высветлілася, ніколі на свае вочы не бачылі, выклікалі самыя бурныя эмоцыі. Дарэчы, экспазіцыю суправаджалі прафесіяналы. І яны пра кожнага гадаванца з радаводам расказвалі цікавыя гісторыі. Мне, напрыклад, жывёлавод Аляксандр Пырх падрабязна расказаў пра тое, як спраўляецца з адным са сваіх гадаванцаў — быком галшцінскай пароды па мянушчы Вілен. Дарэчы, жывёла важыць больш за тону.

Конкурс нацыянальнага касцюма «Палатно стагоддзяў», праведзены ў межах Дня горада над Сожам, сабраў аматараў этнаграфіі і мастацкай самадзейнасці з усёй Гомельскай вобласці. Кожны калектыў не толькі дэманстраваў узноўленыя строі менавіта свайго рэгіёна, але і аўтэнтычныя песні, танцы, абрады, уласцівыя той ці іншай мясцовасці.

Самыя разнастайныя імпрэзы прайшлі ва ўсіх кутках Гомеля. Набярэжную запоўнілі імправізаваныя тэматычныя кварталы — Кветкавы, Рачны, Сямейны... На цэнтральнай плошчы выбіралі самага дужага гамяльчаніна, на плошчы Паўстання — самы гучны аўтамабіль. На стадыёне «Цэнтральны» ўдзельнікі свята паслухалі народную артыстку Украіны Таісію Павалій і ансамбль «Беларускія песняры», а ўвечары пляцоўка каля Лядовага палаца запоўнілася моладдзю. Група «Дыскатэка Аварыя» апраўдала яе чаканні.

Ірына АСТАШКЕВІЧ


#Гроднагучыць!

grodnonews.by

Тут была музыка на любы густ — ад сімфанічнай да цыганскай. Адмысловыя пляцоўкі размяшчаліся па ўсім горадзе, але найбольш ажыўлена было, вядома, у цэнтральнай яго частцы горада. Але не толькі, бо падчас Дня горада, які святкаваў 891-ю гадавіну, адбыліся прэзентацыі, выстаўкі і нават з'явіліся новыя аб'екты.

Новы жылы мікрараён Альшанка атрымаў добры спартыўны падарунак — футбольнае поле ў СШ № 41. Першая гульня адбылася паміж камандай гродзенскіх чыноўнікаў і ветэранаў футбола.

У раёне паркавай зоны Занёманскай часткі пачаў дзейнічаць парк актыўнага адпачынку. У яго складзе — першы ў Беларусі музей вузлоў, вяровачныя трасы, скаладром, 100-метровая тарзанка. Есць палігон для гульні ў лазертаг і магчымасць скокнуць з вежы.

Урачысты канцэрт прайшоў у Гродзенскім драматычным тэатры. Тут адкрылі выстаўку «Музычны Гродна» і ўручылі пасведчанні новым ганаровым грамадзянам горада і лаўрэатам Кнігі гонару.

Старт святочных мерапрыемстваў у суботу быў дадзены роўна апоўдні на плошчы Тызенгаўза перазвонам. А з самага ранку гродзенскія гісторыкі і краязнаўцы правялі пазнавальныя экскурсіі па гістарычнай частцы горада.

Цікавасць гараджан выклікала пляцоўка рэтратэхнікі, дзе былі прадстаўлены 12 рарытэтных аўтамабіляў і матацыклаў. Самым відовішчным і захапляльным можна назваць дэфіле роты ганаровага каравула ваеннага факультэта ГрДУ імя Янкі Купалы.

Музыка пакаленняў гучала з пляцоўкі на плошчы Леніна. Сваю праграму прадставіў эстрадна-сімфанічны аркестр абласной філармоніі, выступілі народныя хоры і ансамблі Гродна. Яскравыя нумары прадставіў музычны тэатр «Рада». Цёпла сустракалі гродзенцы сталічных гасцей — Вікторыю Алешку, Ларысу Грыбалёву, Аляксея Хлястова, Аляксандра Саладуху. У лютаранскай кірсе адбыўся канцэрт арганнай музыкі ў выкананні Аляксандра Ісакава з Літвы.

Пляцоўка каля Маладзёжнага цэнтра была насычана адпаведна. Тут пад акампанемент рок-музыкантаў, якія выступалі амаль цэлы дзень, можна было атрымаць майстар-клас па нанясенні татуіровак, агледзець выстаўку байк-тэхнікі, набыць эксклюзіўныя скураныя вырабы. Працягнута новая традыцыя — праводзіць у гэты дзень абласны фестываль кнігі. Сёлета ён адбыўся трэці раз.

Стала ўжо традыцыйным і правядзенне ў Дзень горада брэндавага мерапрыемства — Свята сыру. Сёлета ён пашырыў межы і перамясціўся з гарадскога парку на цэнтральны спартыўны стадыён. У фестывалі прынялі ўдзел 20 вытворцаў сыру, якія прадставілі 75 гатункаў смачнай прадукцыі.

Уражвалі разнастайныя вырабу з сыру — ад кніг да архітэктурных аб'ектаў. Але самым хвалюючым для вытворцаў стаў конкурс на лепшы смак. У вызначэнні маглі ўдзельнічаць усе прысутныя. Канчатковую ацэнку дало экспертнае журы. Самым дыпламаваным аказалася прадпрыемства «Малочны свет». Свята сыру суправаджалі шматлікія канцэрты і атракцыёны. Вечарам адбылося выступленне папулярнага спевака Макса Барскіх.

Маргарыта УШКЕВІЧ

Загаловак у газеце: Гучна! Ярка! Смачна!

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.