Вы тут

Званы абвясцілі 1000 гадоў


Брэст адсвяткаваў сваё 1000‑годдзе. Урачыстае адкрыццё, карнавал, музычна-­гістарычнае шоу “Міленіўм” і фестывалі сабралі тысячы гледачоў 6–8 верасня


Фота БЕЛТА

У першы дзень свята Прэзідэнт Беларусі Аляксандр Лукашэнка ўручыў гораду арыгінал Берасцейскай Бібліі 1563 года. Кніга была надрукавана па загадзе і на грошы берасцейскага старасты, канцлера Вялікага Княства Літоўскага князя Мікалая Радзівіла Чорнага ў мясцовай друкарні. Вярнуць яе на радзіму дапамаглі прадпрымальнікі Брэста, якія выкупілі кнігу ў калекцыянераў за мяжой. Атрымаць рэдкі, аўтэнтычны фаліянт для Брэста — вялікі поспех: ва ўсім свеце можна адшукаць толькі некалькі арыгінальных асобнікаў Берасцейскай Бібліі. Музеі, бібліятэкі ў многіх краінах хацелі б атрымаць такі рарытэт. Каштоўны фаліянт Прэзідэнт перадаў у рукі дырэктара музея гісторыі Брэста Святланы Тамчук.

У гэтыя дні ўспаміналіся заслугі горада. Менавіта Бярэсце на беларускай тэрыторыі першым атрымала Магдэбургскае права. Тут узнікла першая друкарня. У наш час у горадзе створана першая свабодная эканамічная зона. Адсюль родам першы касманаўт з беларускімі каранямі Пётр Клімук і беларуская лёгкаатлетка, алімпійская чэмпіёнка Юлія Несцярэнка.

На наступны дзень у горадзе над Бугам адбыўся доўгачаканы карнавал. Ён атрымаўся не менш захапляльным, чым бразільскі. (Танцоры, якія ўдзельнічалі ў сапраўдных бразільскіх карнавалах, па чутках, былі і на брэсцкім.) У шэсці ішлі і музыкі з Беларусі, Казахстана, Расіі, Латвіі і Польшчы, якія прыехалі на Міжнародны парад аркестраў краін СНД. Шоу цягнулася каля 2 гадзін. Гледачоў здзівіла разнастайнасць касцюмаў артыстаў, якія прадстаўлялі не толькі Беларусь, але і іншыя краіны.

Музычна-гістарычны канцэрт “Міленіўм”, які адбыўся вечарам на Вяслярным канале, нагадаў гледачам пра ўсе вехі развіцця горада: у XІ стагоддзі гэта быў гандлёвы цэнтр і крэпасць на памежжы з польскімі і літоўскімі ўладаннямі. У XІV — XVІ стагоддзях Бярэсце пераўтварылася ў адзін з буйнейшых гарадоў Вялікага Княства Літоўскага. Магдэбургскае права яно атрымала ў 1390 годзе. У шоу ўдзельнічала каля 400 артыстаў, танцораў, спевакоў, гімнастаў, цыркачоў. У канцы ўсе выступоўцы выйшлі на сцэну, каб праспяваць своеасаблівы гімн гораду “Слаўся, Брэст!”.

У памяць 1000‑годдзя горада ва ўсіх храмах прайшла Боская літургія і падзячны малебен. Велічны юбілей абвяшчалі званы розных канфесій.

На наступны дзень распачалася фестывальная праграма. Фестываль сяброўства, фестываль вулічных тэатраў “Белой Вежи”, фестываль паветраных змеяў — усіх і не пералічыць. Апоўначы на Вяслярным канале разгарнуўся “Фестываль фарбаў”.

Гукі свята заціхлі. Але горад яшчэ доўга будзе памятаць пра юбілей. У напамінак аб ім Брэсту застануцца новы пуцеправод Заходні абыход, першы ў горадзе “Макдональдс”, рэканструяваны тэатр лялек, узноўлены “Гарадскі сад” і шмат іншых новых будынкаў, мастоў і добраўпарадкаваных вуліц.

Ганна Лагун

Выбар рэдакцыі

Грамадства

Сёння пачаў работу УНС у новым статусе

Сёння пачаў работу УНС у новым статусе

Амаль тысяча дзвесце чалавек сабраліся, каб вырашаць найважнейшыя пытанні развіцця краіны. 

Навука

Наколькі эфектыўна працуе сістэма інтэлектуальнай уласнасці?

Наколькі эфектыўна працуе сістэма інтэлектуальнай уласнасці?

Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.

Здароўе

У Нацыянальны каляндар плануюць уключыць новыя прышчэпкі

У Нацыянальны каляндар плануюць уключыць новыя прышчэпкі

Як вакцыны выратоўваюць жыцці і чаго можа каштаваць іх ігнараванне?

Грамадства

Курс маладога байца для дэпутата

Курс маладога байца для дэпутата

Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.