Мазыр — адзін з самых буйных прамысловых цэнтраў Гомельскай вобласці

Мазыр — адзін з самых буйных прамысловых цэнтраў вобласці. Тут дзейнічаюць прадпрыемствы, якія прадстаўляюць практычна ўсе галіны народнай гаспадаркі: нафтаперапрацоўку, вытворчасць малочных і мясных прадуктаў, солі, машын і абсталявання, кабеляў, швейных вырабаў... Увогуле, Мазыршчына аказвае значны ўплыў на сацыяльна-эканамічнае развіццё як Гомельскай вобласці, так і краіны ў цэлым. Цяпер перад гэтым райцэнтрам пастаўлена задача знайсці тыя пункты росту, якія дазволяць вывесці яго эканоміку на новы ўзровень.

Дарэчы, узровень жыцця тут і сёння высокі. За студзень — жнівень гэтага года аб'ём вытворчасці прамысловай прадукцыі ў фактычных цэнах склаў 6,8 мільярда рублёў, ці 111,2 %. Сярэдні заробак па раёне зараз — 909 рублёў. І ўсё ж магчымасці для далейшага дынамічнага развіцця ёсць.

Цяпер у Мазырскім раёне распрацаваны і паспяхова рэалізуецца план комплекснага сацыяльна-эканамічнага развіцця да 2020 года. Перспектыўныя задачы — павялічыць эфектыўнасць эканомікі раёна, сфарміраваць доўгатэрміновую аснову яе ўстойлівага росту, палепшыць дабрабыт грамадзян і стварыць камфортныя і бяспечныя ўмовы для іх жыцця. У комплексным плане адлюстраваны і праблемы, якія неабходна вырашыць на асобных прадпрыемствах. Таксама прадугледжана добраўпарадкаванне тэрыторый, будаўніцтва новых аб'ектаў, што пацягне стварэнне новых рабочых месцаў.

Многія прадпрыемствы Мазыра вядомыя не толькі на Гомельшчыне, але і ва ўсёй краіне. Завяршэнню інвестыцыйных праектаў, якія ўжо распачаты, павышэнню эфектыўнасці работы, забеспячэнню загрузкі вытворчых магутнасцяў і нарошчванню аб'ёмаў вытворчасці прадукцыі цяпер аддаецца асаблівая ўвага, адзначае старшыня Мазырскага райвыканкама Алена Паўлечка:

— Мазырскі нафтаперапрацоўчы завод працягвае рэалізацыю праекта па будаўніцтве комплексу гідракрэкінгу цяжкіх нафтавых рэшткаў. «Мазырсоль» праводзіць мадэрнізацыю, машынабудаўнічы завод плануе абнаўленне парку абсталявання, працягваюць тэхналагічнае пераўзбраенне «Беларускабель» і Мазырская швейная фабрыка «Надэкс»... Адначасова важныя праекты рэалізуюцца ў аграпрамысловым комплексе раёна, у сацыяльнай сферы і іншых галінах.

Інвестараў на Мазыршчыну прыцягвае выгаднае геаграфічнае становішча і развітая транспартная інфраструктура. З аўкцыёнаў прадаюцца аб'екты, якія не выкарыстоўваліся ў гаспадарчым абароце. Сёння ўлады Мазыра стварылі максімальна камфортныя ўмовы для бізнесу. На 1 верасня ў раёне працавалі 3493 суб'екты гаспадарання, у тым ліку 2707 індывідуальных прадпрымальнікаў, 786 малых і сярэдніх арганізацый. Дарэчы, доля паступленняў падатковых плацяжоў у кансалідаваны бюджэт ад малога і сярэдняга бізнесу складае каля 7,4 %.

Рашэнне актуальных пытанняў сацыяльна-эканамічнага развіцця, павышэнне дабрабыту насельніцтва ў многім залежаць і ад дэпутацкага корпуса. Сёння мясцовае самакіраванне Мазырскага раёна прадстаўлена раённым Саветам дэпутатаў і дзесяццю сельскімі. Шмат залежыць ад ініцыятыўнасці і адказнага стаўлення да справы як дэпутатаў усіх узроўняў, так і ўпаўнаважаных сельскіх населеных пунктаў і грамадзян у камітэтах тэрытарыяльнага грамадскага самакіравання. Гэта яны першымі аператыўна рэагуюць і задавальняюць патрэбы людзей, ад іх часцяком залежыць канструктыўнае ўзаемадзеянне з мясцовымі органамі ўлады, падкрэслівае старшыня Мазырскага раённага Савета дэпутатаў Валянціна Назаранка:

— Для мабілізацыі чалавечага патэнцыялу, фінансавых і матэрыяльных сродкаў і магчымасцяў па рашэнні пэўных пытанняў развіцця тэрыторый выкарыстоўваюцца розныя формы і метады. У нас створаны і працуюць «грамадскія прыёмныя», куды людзі могуць звярнуцца па тэлефоне, электроннай пошце ці асабіста. Асаблівая ўвага аддаецца прыёму грамадзян і кантролю за выкананнем іх запытаў. Усе дэпутаты раённага Савета дэпутатаў вядуць прыём згодна з графікам. У прыватнасці, за 2019 год праведзены 351 прыём. 229 грамадзянам дадзены тлумачэнні ці аказана садзейнічанне ў рашэнні іх пытанняў.

Дарэчы, сустрэчы па месцы жыхарства даўно сталі традыцыяй. Яны дазваляюць найбольш поўна вывучаць хвалюючыя пытанні на вёсцы. Сёлета такія сустрэчы адбыліся ў вёсках Барбароўскага, Крынічнага, Козенскага сельскіх Саветаў. У жніўні прайшло выязное пасяджэнне прэзідыума райсавета і райвыканкама з наведваннем мікрараёна Чыгуначны. Размова ішла пра сумесную дзейнасць мясцовага камітэта тэрытарыяльнага грамадскага самакіравання, жыллёва-эксплуатацыйнага ўчастка № 8 Мазырскага райжылкамгаса, грамадскіх арганізацый па пытаннях добраўпарадкавання і навядзення парадку на зямлі.

— У сістэму работы ўвайшло і штоквартальнае правядзенне сходаў грамадзян у сельскіх населеных пунктах, — адзначае Валянціна Аляксееўна. — Праблемы, закранутыя на сходах, ставяцца на кантроль мясцовай уладай і накіроўваюцца ў адпаведныя раённыя службы для разгляду. Актуальна і карысна ва ўсіх адносінах правядзенне практычных семінараў — Дзён сельсаветаў. Сёлета яны прайшлі ў пяці: Прудкоўскім, Крынічным, Махнавіцкім, Скрыгалаўскім, Козенскім. Такім мерапрыемствам абавязкова папярэднічае добраўпарадкаванне тэрыторыі населеных пунктаў. Інфармаваннем насельніцтва аб дзейнасці дзяржаўных органаў і тлумачэннем дзяржаўнай палітыкі займаюцца інфармацыйна-прапагандысцкія групы. Таксама пры Мазырскім раённым Савеце дэпутатаў створаны Маладзёжны парламент. Узрост яго ўдзельнікаў — ад 13 да 19 гадоў. Гэты орган самакіравання дазваляе падлеткам расказваць пра свае праблемы так, каб іх чулі дарослыя, якія прымаюць рашэнні.

Мазырскі раён — адзін з самых буйных у Гомельскай вобласці. Не толькі па плошчы (яна складае 160 тысяч гектараў), але і па наяўнасці горадаўтваральных прадпрыемстваў, якія вызначаюць узровень развіцця рэгіёна ўвогуле і дабрабыту кожнага са 134 тысяч яго жыхароў у прыватнасці.

Ірына АСТАШКЕВІЧ, фота аўтара