Вы тут

Самадзейныя: родныя, надзейныя


Выйшаў першы том кнігі “Творчыя калектывы беларусаў замежжа”. Ён падрыхтаваны супрацоўнікамі Рэспубліканскага цэнтра нацыянальных культур.


Складальнікі выдання — начальнік аддзела народнай творчасці, кандыдат філалагічных навук Алесь Лозка і намесніца дырэктара РЦНК Валянціна Грышкевіч. Яны правялі вялікую даследчую працу, высветлілі: у свеце дзейнічае каля 200 творчых беларускіх калектываў. Адшукаць іх дапамагалі ў тым ліку й дыпламаты з беларускіх амбасадаў. Дарэчы, варта мець на ўвазе: многіх мастацкіх кіраўнікоў тых суполак РЦНК мае магчымасць запрашаць на творчыя стажыроўкі, а самі гурты — на фэсты беларусаў свету на Бацькаўшчыну.

Гэта звычайна беларускія ансамблі песні, танца, ёсць нават самадзейныя тэатры. Найбольш творчых гуртоў, як сведчыць выданне, у Расіі, Польшчы, Латвіі, Літве, Эстоніі, Украіне, Казахстане, ЗША, Малдове, Італіі. Асобныя творчыя групы ёсць у Аргенціне, Арменіі, Аўстраліі, Ізраілі, Канадзе, Сербіі, Узбекістане, Францыі, нават у Паўднёва-Афрыканскай Рэспубліцы. Некаторым з іх супрацоўнікі аддзела народнай творчасці РЦНК ужо дапамаглі з набыццём беларускіх нацыянальных касцюмаў, музінструментаў, перадаюць супляменнікам-энтузіястам і метадычную літаратуру.

Ансамбль “Купалінка” з Тальяці на нядаўнім фэсце ў Самары

У навукова-папулярным выданні апісаны этапы развіцця й станаўлення творчых суполак беларусаў за мяжой. Вялікая ўвага надаецца ў першую чаргу мастацкім калектывам, якія актыўна прэзентуюць беларускую культуру ў розных краінах. У выданні можна знайсці шмат цікавых звестак пра жыццё нашых супляменнікаў па-за межамі Бацькаўшчыны ў розныя гістарычныя перыяды.

Кніга выйшла дзякуючы падпраграме “Беларусы ў свеце” Дзяржпраграмы “Культура Беларусі” на 2016-2020 гады. Цяпер у Рэспубліканскім цэнтры нацыянальных культур працуюць над другім томам выдання. Яго плануецца прысвяціць непасрэдна вядомым творчым калектывам беларускіх суполак замежжа.

Ганна Лагун

Выбар рэдакцыі

Спорт

«Нават праз 40 гадоў сямейнага жыцця рамантыка застаецца...»

«Нават праз 40 гадоў сямейнага жыцця рамантыка застаецца...»

Інтэрв'ю з алімпійскім чэмпіёнам па фехтаванні.