Вы тут

Каля Манумента Дружбы новы ландшафтны дызайн


Тэрыторыя вакол знакамітага помніка на граніцы трох краін набыла закончаны выгляд. Валанцёры БРСМ актыўна падключыліся да гэтай справы.


На прыграніччы Беларусі, Расіі і Украіны закладзена ландшафтная кампазіцыя, якая стала сапраўдным упрыгожаннем адноўленага Манумента Дружбы. У работах прыняла ўдзел моладзь з Добрушскага раёна і Гомеля.

Аснову зялёнай зоны складаюць серабрыстыя вербы. Начальнік галоўнага ўпраўлення ідэалагічнай работы, культуры і па справах моладзі Гомельскага аблвыканкама Ірына Даўгала адзначае, што самы высокі ўзровень кампазіцыі сімвалізуе старэйшае пакаленне, тых, хто стаяў ля вытокаў традыцый сумесных мерапрыемстваў каля манумента, якія пачалі праводзіць у далёкім 1962 годзе:

— Сучаснасць — кампактныя вытанчаныя вербы, а ярус спірэй сімвалізуе будучыя пакаленні. У трох узроўнях кампазіцыі ўвасоблена ідэя пераемнасці пакаленняў — тых, хто закладваў традыцыі правядзення сустрэч моладзі трох краін каля манумента, тых, хто гэтыя традыцыі павінен захаваць, і тых, каму іх перададуць і хто іх прымножыць. Таму мы вельмі спадзяёмся на тое, што хутка тут зноў будуць гучаць галасы і смех моладзі трох краін.

Добраўпарадкаванне тэрыторыі стала працягам праведзеных сёлета работ па рамонце памятнага знака на мяжы трох краін. Даручэнне давесці да ладу манумент, які пачаў разбурацца за апошнія гады, даў сёлета ў лютым Прэзідэнт Беларусі. На гэтыя работы было накіравана каля Br2 млн.

Над праектам маштабнага аднаўлення знакавага месца працавалі спецыялісты ААТ «Інстытут Гомельграмадзянпраект». Захаваны барэльефы гербаў трох краін, адрамантаваны пілоны, пакладзены новыя гранітныя прыступкі, з'явілася тратуарная плітка, выкладзеная ў выглядзе вышыванкі. Пры добраўпарадкаванні выкарыстоўваліся высакаякасныя матэрыялы.

Нагадаем, што Манумент Дружбы ў гэтым кутку прыгранічнай тэрыторыі быў пабудаваны ў 1975 годзе — у гонар 30-годдзя Перамогі ў Вялікай Айчыннай вайне. Да 2014 года тут праводзіліся сустрэчы моладзі трох краін. Беларусь, Расія і Украіна штогод па чарзе прымалі гасцей. Тут праходзілі сустрэчы першых асоб трох дзяржаў, прыёмы дэлегацый, падпісанне дамоў пра супрацоўніцтва, творчыя і спартыўныя спаборніцтвы...

Пяць гадоў, як мерапрыемства ў трохбаковым фармаце на скрыжаванні трох граніц перастала праводзіцца. Фестываль апошнім часам праходзіць па чарзе ў прыгранічных гарадах Расіі ці Беларусі. І вось зноў з'явіўся шанц згуртаваць усходнеславянскія народы. Пра адраджэнне сустрэч каля манумента, які ў народзе па-ранейшаму называюць «Тры сястры», мараць усе простыя людзі, што жывуць, маючы сваякоў і сяброў па ўсе бакі трох граніц. Беларусы спадзяюцца, што фестываль «Славянскае адзінства» ўжо налета зможа вярнуцца на сваю родную пляцоўку.

Ірына АСТАШКЕВІЧ

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.