Навошта гарадам распрацоўваць прасторавыя стратэгіі развіцця

Дзякуючы чаму ў гарадах людзі могуць адчуваць сябе камфортна, паспяхова з эканамічнага пункту погляду можа развівацца бізнес? Што рабіць, каб захоўвалася спрыяльным экалагічнае становішча? Усё гэта дапаможа зрабіць распрацаваная прасторавая стратэгія развіцця.

— Нельга мець устойлівую дэмаграфію, устойлівае эканамічнае працвітанне, калі ў нас у горадзе няўстойлівая прастора, інфраструктура, — кажа кансультант праекта «Зялёныя гарады» па зялёным горадабудаўніцтве Вера СЫСОЕВА. — Пытанні транспарту, энергетыкі, добраўпарадкавання і азелянення, землекарыстання, прыярытэтаў эканамічнай актыўнасці не могуць вырашацца па адным, трэба рабіць гэта ў комплексе.

Як жа пачаць выконваць гэту вельмі складаную работу? Па словах эксперта, перш за ўсё гарадской адміністрацыі важна не толькі ўмець аналізаваць сучасны стан развіцця горада, але і ацэньваць свае магчымасці, а затым планаваць дзеянні ва ўвязцы з іншымі службамі горада, каб адно мерапрыемства дапамагала выканаць некалькі мэт у розных сферах. Такі інтэграваны падыход выкарыстоўваецца за мяжой, і найлепшыя яго практыкі знайшлі сваё адлюстраванне ў праекце «Зялёныя гарады».

Для трох пілотных гарадоў — Полацка, Наваполацка і Навагрудка — распрацаваныя Планы зялёнага горадабудаўніцтва да 2040 года. Яны былі зацверджаныя мясцовымі Саветамі дэпутатаў.

План зялёнага горадабудаўніцтва — гэта мясцовая стратэгія ўстойлівага развіцця, распрацаваная з улікам асаблівасцяў гарадской прасторы і з удзелам насельніцтва, прадстаўнікоў бізнесу і грамадскіх арганізацый на ўсіх стадыях планавання. У яе ўваходзіць не толькі агульны погляд на будучыню горада, але і канкрэтныя мерапрыемствы, накіраваныя на дасягненне Мэт устойлівага развіцця, а таксама прыярытэтныя задачы, увязаныя з існуючымі ў горада рэсурсамі, і распрацоўваюцца ўзгодненыя дзеянні, аснашчаныя індыкатарамі для маніторынгу і крыніцамі для фінансавання.

У кожнага горада планы маюць сваю спецыфіку.

• Так, план «Навагрудак. Захаваем будучыню!» прадугледжвае прыцягненне інвестыцый у турыстычную галіну, развіццё сферы зялёных агратэхналогій, стварэнне безбар'ернага асяроддзя, паляпшэнне даступнасці гарадскіх аб'ектаў для бізнесу і адпачынку насельніцтва і многае іншае.
• «Полацк. Навядзём масты» — так называецца план для горада над Заходняй Дзвіной. Тут плануецца не толькі ў фізічным сэнсе злучаць разарваныя ракой, чыгуначнымі пераездамі гарадскія раёны для паляпшэння транспартнай сувязі, у тым ліку і з суседнім Наваполацкам. Гэтыя гарады, на думку экспертаў, могуць стаць магутным лагістычным цэнтрам краіны — калі належным чынам сарыентаваць грузавыя патокі, яны прыносілі б гарадам працвітанне, і ў той жа час не пагаршалі б экалагічнага стану.
• План «Наваполацк: зноў новы. Версія 2.0» прадугледжвае мадэрнізацыю, адыход ад монаарыентацыі горада на хімічную прамысловасць, развіццё няшкодных відаў вытворчасці, паляпшэнне транспартнай інфраструктуры, стварэнне вузлоў прыцягнення, у тым ліку пляцовак для адпачынку розных узроставых груп і іншае.

Каб на справе паказаць, як можа палепшыцца жыццё гараджан, каманда разам з зацікаўленымі бакамі ў кожным пілотным горадзе выбрала раёны, якія плануецца ў хуткім часе трансфармаваць згодна з прынцыпамі зялёнага горадабудаўніцтва. Гэта цэнтральная частка Навагрудка (раён вуліц Міцкевіча і Гродзенскай), мікрараён № 9 у Наваполацку і полацкі раён Грамы.

— Ужо прайшлі праектныя кансультацыі ў кожным горадзе, — расказала Вера Сысоева. — На сустрэчы з праекціроўшчыкамі запрашаліся жыхары і карыстальнікі раёнаў, каб даведацца, якія праблемы трэба вырашыць, што для іх важна і каштоўна. Да канца года плануецца атрымаць зацверджаныя эскізныя рашэнні для кожнага з раёнаў.

Акрамя Полацка, Наваполацка і Навагрудка, свае планы зялёнага горадабудаўніцтва ствараюць Карма, Зэльва, Гарадок і Крычаў.

Вераніка КОЛАСАВА