Выдавецтва «Беларуская Энцыклапедыя імя Петруся Броўкі» презентавала серыю кніг «Беларусь памятае. У імя жыцця і міру». Скарбонка кніг, якія зберагаюць нашу гісторыю і тыя факты, што нельга забываць, папоўнілася трыма друкаванымі крыніцамі. У серыю ўвайшлі тры кнігі: «Беларусь партызанская. Ілюстрыраваная энцыклапедыя партызанскага руху ў Беларусі ў гады Вялікай Айчыннай вайны», «Нельга забыць. Нельга зразумець. Нельга апраўдаць. Ілюстраваная энцыклапедыя спаленых вёсак Беларусі ў гады Вялікай Айчыннай вайны» і «Перамога адна на ўсіх. Беларусь — Узбекістан». У кожнай з іх больш за 600 фотаздымкаў, многія з якіх апублікаваны ўпершыню. Кнігі будуць прадстаўлены шырокаму колу чытачоў на разнастайных кніжных форумах, а таксама з’явіцца магчымасць набыць іх у кніжных крамах ва ўсіх, хто цікавіцца дазенай тэмай.
— Ухіл выдавецтва «Беларуская энцыклапедыя імя Петруся Броўкі» зрабіла на тэмы эмацыянальныя, шчымлівыя, якія былі на інфармацыйным полі нашай краіны на працягу ўсіх гэтых гадоў. Але з’яўляюцца новыя тэхналогіі і паўстае пытанне, як прыцягнуць увагу да гэтых кніг, асабліва моладзі. Безумоўна, гэта павінна быць сучаснае візуальнае аздабленне кнігі і важную ролю адыгрывае не толькі размяшчэнне тэксту, але і фотаздымкі, дызайн, — зазначыў начальнік упраўлення выдавецкай і паліграфічнай дзейнасці Міністэрства інфармацыі Рэспублікі Беларусь Уладзімір Андрыевіч. — Зараз, калі ў Заходняй Еўропе ёсць пасыл на адраджэнне нацысцкай ідэалогіі, то хто, як не беларусы, павінны папулярызаваць тэму гістарычнай праўды і выступаць са сваёй пазіцыяй.
Першая кніга «Беларусь партызанская. Ілюстрыраваная энцыклапедыя партызанскага руху ў Беларусі ў гады Вялікай Айчыннай вайны» расказвае аб унікальнай з’яве ў сусветнай гісторыі і ў гісторыі нашай краіны — партызанскім руху ў Беларусі ў гады Вялікай Айчыннай вайны. Выданне на 352 старонкі з’яўляецца практычна агульнанацыянальным праектам, у падрыхтоўцы якога прымалі ўдзел Інстытут гісторыі Нацыянальнай акадэміі навук Беларусі, Нацыянальны архіў Рэспублікі Беларусь, Беларускі дзяржаўны архіў кінафотафонадакументаў, Беларускі дзяржаўны музей гісторыі Вялікай Айчыннай вайны, абласныя і раённыя гісторыка-краязнаўчыя музеі.
У выданні паказана не толькі героіка партызанскай барацьбы, але і суровыя партызанскія будні, жыццё і побыт гэтых людзей. Аўтарскія тэксты для выдання падрыхтаваны супрацоўнікамі аддзела ваеннай гісторыі Інстытута гісторыі Нацыянальнай акадэміі навук Беларусі. У кнізе распавядаецца пра нацыстскі акупацыйны рэжым на тэрыторыі нашай краіны, пра падпольны антыфашысцкі і партызанскі рух, аб унікальных партызанскіх зонах, на якія не распаўсюджвалася ўлада акупантаў, пра Беларускі штаб партызанскага руху і прысягу партызана, якая натхняла на барацьбу з ворагам. Таксама наглядна паказаны партызанскія аперацыі, дыверсійная дзейнасць, «рэйкавая вайна», партызанская разведка. Асобныя тэмы выдання — гэта дапамога тылу і мясцовых жыхароў партызанам і іх зваротная падтрымка мірнага насельніцтва. Кніга дае магчымасць пазнаёміцца з партызанскім друкам — рукапісныя часопісы, газеты, лістоўкі, што пісалі пра барацьбу з захопнікамі і жыццё партызан. Эксклюзіўным раздзелам выдання з’яўляюцца старонкі, дзе чытач можа даведацца пра партызанскі побыт, рэаліі жыцця ў тых умовах: якое было ўзбраенне, медыкаменты, боепрыпасы, харчаванне, абмундзіраванне, партызанскія майстэрні па вытворчасці зброі, пашыву адзення, выпечкі хлеба, а таксама партызанская мастацкая самадзейнасць і лясныя школы. Не абмінулі ўвагай і такія пытанні як роля моладзі ў партызанскім руху, дапамога партызан Чырвонай арміі, удзел народных мсціўцаў у вызваленні Беларусі. Вартыя ўвагі і матэрыялы аб партызанах Героях Савецкага Саюза, пра ўдзел замежных антыфашыстаў у партызанскім руху на тэрыторыі Беларусі ў гады Вялікай Айчыннай вайны.
Другая кніга серыі мае назву «Нельга забыць. Нельга зразумець. Нельга апраўдаць. Ілюстраваная энцыклапедыя спаленых вёсак Беларусі ў гады Вялікай Айчыннай вайны» і расказвае чытачу аб трагедыі беларускіх вёсак спаленых нацыстамі разам з жыхарамі ў гады Вялікай Айчыннай вайны. Тут наглядна можна ўбачыць, якімі былі дзеянні захопнікаў на беларускай зямлі, маштаб колькасці ахвяр і ўвекавечанне памяці загінулых.
Трэцяя кніга серыі «Перамога адна на ўсіх. Беларусь — Узбекістан» прысвечана воінам-узбекістанцам, якія змагаліся супраць нацызму ў нашай краіне падчас Вялікай Айчыннай вайны — былі сярод абаронцаў Брэсцкай крэпасці, удзельнічалі ў партызанскім і падпольным руху, вызвалялі Беларусь.Многія ўзбекістанцы за і гераізм і мужнасць удастоены звання Героя Савецкага Саюза. І тысячы воінаў-узбекістанцаў назаўсёды засталіся ў беларускай зямлі. У нашай краіне памяць пра мінулую вайну свяшчэнная, як і памяць пра тых салдат і афіцэраў з Узбекістана, чые лёсы непарыўна павязаны з Беларуссю. Іх імёнамі названы вуліцы, ім стаяць помнікі і мемарыяльныя дошкі і іх памяць зберагаецца беларусамі. У кнігу ўпершыню ўключаны імёны больш за тысячу салдат, якія былі прызваны з Узбекістана і загінулі на тэрыторыі Беларусі ў гады Вялікай Айчыннай вайны. Менавіта таму найбольшы інтарэс кніга будзе мець сярод тых, хто вывучае Вялікую Айчынную вайну, а таксама працягвае шукаць сваіх блізкіх, якія аддалі жыццё за Перамогу.
Алена ДРАПКО
Фота Анастасіі ПРАКАПЕНКА
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
