Вы тут

​Штогод да ўрачоў-псіхіятраў звяртаецца каля 300 тысяч беларусаў


А многія людзі хаваюць свае праблемы ад блізкіх і не ідуць па дапамогу, што толькі пагаршае іх стан.


fishki.net

Імклівы тэмп жыцця, пастаянныя перагрузкі і стрэсавая работа робяць нас уразлівымі да псіхічных і паводзінскіх расстройстваў. Паводле звестак Сусветнай арганізацыі аховы здароўя, на іх пакутуе кожны чацвёрты-пяты чалавек. А кожны другі рызыкуе захварэць на працягу жыцця. Згодна з даследаваннямі, кожны сёмы чалавек на Захадзе хварэе на шызафрэнію або схільны да дэпрэсіі ці алкагалізму. Беларусь паўтарае сусветныя тэндэнцыі.

Асноўная небяспека ў тым, што нам бачная толькі «вяршыня айсберга». Афіцыйная статыстыка ахоплівае тых, хто знаходзіцца пад дыспансерным назіраннем. У Беларусі гэта крыху больш за 1 % насельніцтва. Звыш паловы з іх — каля 60 тысяч чалавек — маюць інваліднасць.

— Праблема псіхічнага здароўя для Беларусі вельмі актуальная. Асабліва схаваная яе форма, калі людзі не звяртаюцца па дапамогу да ўрачоў ці псіхолагаў. Многія апасаюцца «нязручнага» дыягназу, праблем на рабоце і сацыяльных ярлыкоў, — адзначаюць у Беларускім таварыстве Чырвонага Крыжа. — На самай справе ніхто не застрахаваны ад праблем з псіхікай. Але калі ад іх не ўцякаць, то ўсё можна паправіць. Напрыклад, у Мінску можна бясплатна звярнуцца ў цэнтр Чырвонага Крыжа «Адкрыты дом» і атрымаць псіхалагічную дапамогу і падтрымку як самім пацыентам, так і іх блізкім.

Ён адкрыты па буднях з 10 да 19 гадзін па вуліцы Чырвонай, 3. Тут нікога не называюць пацыентамі — толькі гасцямі, ды і гісторый хваробы ніхто не пытае. З наведвальнікамі працуюць супрацоўнікі цэнтра, якіх кансультуюць спецыялісты РНПЦ псіхічнага здароўя і Гарадскога клінічнага псіхіятрычнага дыспансера.

— Час мяняць стаўленне ў грамадстве, каб да псіхічных захворванняў адносіліся гэтак жа, як і да іншых. Каб наймальнікі ў Беларусі не апасаліся браць такіх людзей у штат, а бацькі не баяліся пакінуць дзіця з равеснікам, паводзіны якога здаюцца дзівацкімі. Забабоны і стэрэатыпы перашкаджаюць такім людзям стаць часткай грамадства і жыць паўнавартасна, — падзяліліся асцярогамі ў Чырвоным Крыжы.

Каб становішча мянялася, арганізацыя запусціла флэшмоб #усемыдзіўныя. Для ўдзелу трэба размясціць у любой сацсетцы пост з апісаннем свайго дзівацтва з гэтым хэштэгам. Спецыялісты збяруць разам усе запісы, а самыя цікавыя — надрукуюць. Яны павінны падвесці грамадства да высновы: няма ідэальных людзей, але ёсць непрыманне тых, хто не ўпісваецца ў звыклыя стэрэатыпы.

Алена КРАВЕЦ

Загаловак у газеце: Усе мы дзіўныя?

Выбар рэдакцыі

Эканоміка

Куды звяртацца, калі грамадзяніну затрымліваюць зарплату?

Куды звяртацца, калі грамадзяніну затрымліваюць зарплату?

Адказ на гэта і іншыя пытанні — у гутарцы з Дзмітрыем Шаўчуком.

Эканоміка

Чаму не варта спадзявацца на «шэрую» зарплату?

Чаму не варта спадзявацца на «шэрую» зарплату?

Будаўніку заплацілі менш, чым дамаўляліся вусна.

Культура

Галоўны рэдактар часопіса «Маладосць» распавядае пра новую стратэгію выдання

Галоўны рэдактар часопіса «Маладосць» распавядае пра новую стратэгію выдання

З пачаткам новай падпісной кампаніі ў «Маладосці» з'явіўся новы «прамоўшан»: цяпер гэта «больш чым часопіс».