Вы тут

У Мінску ў Доме Масквы адкрылася праваслаўная выстаўка-форум «Радасць Слова»


Учора ў Мінску ў Доме Масквы адкрылася праваслаўная выстаўка-форум «Радасць Слова».


Фота bryansk.glavny.tv

Арганізатары звяртаюць увагу, што абодва словы ў назве выстаўкі пішуцца з вялікай літары, бо «Слова» тут маецца на ўвазе тое, пра якое сказана ў першым радку Дабравесця паводле Іаана: «Напачатку было Слова, і Слова было ў Бога, і Богам было Слова».

— Сёння, нягледзячы на існаванне шэрагу сродкаў масавай інфармацыі, новых інфармацыйных тэхналогій, мы да кнігі ставімся асабліва: з трапятаннем, натхненнем. Часам у адрас Царквы можна пачуць папрок у кансерватызме, у тым, што яна не ідзе ў нагу з часам. Але само слова «кансервацыя» (або «кансервант») — добрае, гэта ўменне захаваць найлепшы вопыт, назапашаны народам і Царквой цягам стагоддзяў. Таму мы ўсё тое добрае захоўваем, спрабуем павялічыць і перадаць будучым пакаленням, — сказаў журналістам перад адкрыццём выстаўкі мітрапаліт Мінскі і Заслаўскі Павел, Патрыяршы Экзарх усяе Беларусі. — Кніга мае асаблівае значэнне для чытача, яна дысцыплінуе, дапамагае падыходзіць творча да падзей, якія апісвае, і ў адрозненне ад кінематографа робіць самога чытача і рэжысёрам, і выканаўцам... Кніга нас прымушае думаць, таму яна ніколі не знікне з жыцця чалавека.

Мітрапаліт Павел выказаў спадзяванне, што выстаўка будзе запатрабаваная жыхарамі краіны, якія любяць чытаць кнігі і цэняць іх.

Разам з кіраўніком Беларускай праваслаўнай царквы выстаўку адкрываў мітрапаліт Калужскі і Бароўскі Клімент, старшыня Выдавецкага савета Рускай праваслаўнай царквы. Ён перш за ўсё перадаў усім удзельнікам выстаўкі, жыхарам Мінска і Беларусі благаславенне Патрыярха Маскоўскага і ўсяе Русі Кірыла. Епіскап таксама ўпэўнены, што папяровая кніга застанецца ва ўжытку будучых пакаленняў.

— Ужо больш за дзесяць гадоў на амерыканскім рынку папяровая і электронная кніга трымаюць свае долі: 80 працэнтаў першая і 20 працэнтаў — другая. Нашы крамы запоўненыя кнігамі, пры гэтым асартымент літаратуры, якая друкуецца ў Расіі, павялічыўся за апошнія дзесяцігоддзі ў дзясяткі разоў, — аргументаваў мітрапаліт Клімент. — Выдавецкі савет Рускай праваслаўнай царквы штогод дае грыф на публікацыі каля дзвюх тысяч найменняў новых кніг, з іх 60 працэнтаў — першыя выданні. Значыць, кніга патрэбна.

Магчыма, тыражы скарачаюцца, прызнаў старшыня Выдавецкага савета РПЦ, але агульная колькасць кніг, па яго словах, не становіцца меншай. Ён спаслаўся на інфармацыю ад кампетэнтных крыніц: сумарны тыраж традыцыйных кніг, якія з'явіліся ў Расіі ў 2018 годзе, павялічыўся на пяць-шэсць працэнтаў у параўнанні з 2015—2016 гадамі.

— Мэта гэтай выстаўкі — пазнаёміць чытача з новай літаратурай, — удакладніў мітрапаліт Клімент. — Тут прадстаўленая прадукцыя апошніх двух гадоў ад розных выдавецтваў. Тут людзі знойдуць цікавую для іх кнігу і службовай тэматыкі, і багаслоўскай, а таксама мастацкую літаратуру і дзіцячую. Мы да праваслаўнай кнігі адносім не толькі Евангелле, пісанні святых айцоў, але таксама і мастацкую літаратуру, якая адкрывае чалавеку сэнс жыцця.

Праваслаўная кніжная выстаўка-форум «Радасць Слова» — асветніцкі праект Выдавецкага савета РПЦ, які па благаславенні Маскоўскага Патрыярха рэалізуецца больш за восем гадоў у розных гарадах і краінах. У Беларусі яна праходзіць упершыню, сярод яе арганізатараў таксама Беларуская праваслаўная царква, асацыяцыя «Праваслаўная кніга», Дом Масквы ў Мінску пры падтрымцы пасольства Расійскай Федэрацыі.

Акрамя ўласна выстаўкі кніг, у рамках форуму прайшлі канферэнцыя на тэму «Подзвіг новапакутнікаў», семінар, прысвечаны пытанням узаемадзеяння царкоўнай і дзяржаўнай бібліятэчных сістэм, сустрэчы з праваслаўнымі пісьменнікамі. Экспануюцца таксама фатаграфіі ХІХ—ХХІ стагоддзяў са святой гары Афон (Грэцыя).

Выстаўка працуе два дні — па 17 кастрычніка, з 10 да 19 гадзін. Уваход вольны.

Вольга Мядзведзева

Выбар рэдакцыі

Грамадства

Як пенсіянерка з Гомеля купіла набор каструль па цане патрыманай іншамаркі

Як пенсіянерка з Гомеля купіла набор каструль па цане патрыманай іншамаркі

Усё, як у казцы: прыгожая зала, музыка, пачастункі. Абаяльныя людзі распавядаюць аб правільным харчаванні і рэкламуюць свой тавар...

Грамадства

714 тысяч тон адходаў для перапрацоўкі сабралі летась беларусы

714 тысяч тон адходаў для перапрацоўкі сабралі летась беларусы

Гэта адходы шкла, паперы, пластыку, шын, батарэек, машыннага масла...

Грамадства

​Дзе прызначалі спатканні ў даваенным Мінску?

​Дзе прызначалі спатканні ў даваенным Мінску?

Атрымаць падказкі вам дапаможа экскурсія «Рамантыка мінскіх дворыкаў».