Пра выкананне патрабаванняў заканадаўства аб ахове гісторыка-культурнай і археалагічнай спадчыны і распараджэння Прэзідэнта аб добраўпарадкаванні месцаў пахавання гаварылі на Дубровеншчыне на выязным пасяджэнні прэзідыума аблсавета дэпутатаў. У ім бралі ўдзел старшыні гарадскіх і раённых, а таксама сельскіх Саветаў.
Старшыня Віцебскага абласнога Савета дэпутатаў Уладзімір Цярэнцьеў канстатаваў, што ў вобласці каля 960 гісторыка-культурных каштоўнасцяў — і гэта другі ў краіне паказчык.
Улічваючы, што налета будзе святкавацца 75-я гадавіна Вялікай Перамогі, у цэнтры ўвагі ўсё, што ўвекавечвае подзвігі барацьбітоў з ворагам, памяць аб ахвярах фашысцкіх акупантаў, пакутах нашых землякоў.
Шмат чаго было зроблена для прывядзення памятных месцаў у парадак у рамках выканання запланаваных мерапрыемстваў «Года малой Радзімы» і напярэдадні юбілею вызвалення Беларусі.
Канешне, і раней на тэрыторыі манументальных комплексаў, вайсковых могілак стараліся падтрымліваць парадак, каб помнікі былі ў добрым стане.
Начальнік галоўнага ўпраўлення ідэалагічнай работы і па справах моладзі Віцебскага аблвыканкама Генадзь Ягораў паведаміў прысутным, што да красавіка 2020 года будзе ўстаноўлена каля 370 указальнікаў да месцаў пахаванняў, якія знаходзяцца далёка ад вёсак і дарог.
Дарэчы, сёння ў вобласці больш за 1460 вайсковых могілак. Вечны спакой там знайшло каля 402 тысяч чалавек. І, на жаль, прозвішчы прыблізна 206 тысяч — невядомыя.
Начальнік упраўлення культуры Віцебскага аблвыканкама Пётр Падгурскі адзначыў, што сёлета ў спіс гісторыка-культурных каштоўнасцяў унеслі мемарыяльны комплекс «Суражскія вароты», а таксама помнік, прысвечаны падзеям вайны 1812 года, — у аграгарадку Вароны Віцебскага раёна. Ён падкрэсліў, што трэба ва ўсіх раёнах правесці інвентарызацыю памятных аб'ектаў па ўсіх правілах. У прыватнасці, нямала помнікаў усталявалі ў 1990-я гады, але належным чынам неабходную дакументацыю не аформілі.
Удзельнікі мерапрыемства наведалі некалькі знакавых месцаў на тэрыторыі раёна. Пабывалі ў парку райцэнтра, дзе многае зроблена, каб тутэйшым і прыезджым было цікава і ўтульна.
Дэпутаты азнаёміліся і з ходам рэканструкцыі мемарыяльнага комплексу «Рыленкі». Там пахавана каля 9,6 тысячы салдат і афіцэраў, імёны якіх вядомыя. У «Рыленках» старшыня аблсавета Уладзімір Цярэнцьеў узяў удзел у закладцы яблыневай алеі. Ён даў высокую ацэнку кіраўніцтву раённай вертыкалі выканаўчай улады ў справе захавання помнікаў, абеліскаў, могілак. І падзякаваў тым, хто карпатліва займаецца пошукавай работай, каб засталося меней невядомых імёнаў салдат.
Аляксандр ПУКШАНСКІ
Фота аўтара
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.
