Аляксандр Лукашэнка павіншаваў з 25-годдзем Службу бяспекі Прэзідэнта

У Палацы Незалежнасці адбылася цырымонія ўзнагароджання ваеннаслужачых і ўручэння пагон старэйшаму афіцэрскаму складу Службы бяспекі Прэзідэнта Рэспублікі Беларусь.

Перш за ўсё кіраўнік дзяржавы Аляксандр Лукашэнка павіншаваў удзельнікаў урачыстасці з 25-годдзем Службы бяспекі. «Сённяшняя дата — чарговая значная вяха ў гісторыі нашага падраздзялення, — сказаў ён. — Чвэрць стагоддзя таму мы стварылі Службу практычна з нуля. Мы не ўяўлялі, якой яна павінна быць, не ведалі, чым яна павінна займацца. Упершыню ў гісторыі сувярэннай Беларусі з'явілася такое падраздзяленне. Не было асаблівых рэсурсаў, ды і вопыту. Але былі людзі і глыбокія традыцыі той вялікай краіны».

Прэзідэнт звярнуў увагу на тое, што пры фарміраванні падраздзялення з новымі кампетэнцыямі былі адабраныя найлепшыя супрацоўнікі сілавых ведамстваў Беларусі — прафесіяналы і патрыёты з высокім пачуццём абавязку перад краінай і народам.

«Мы тады стваралі нашу Службу бяспекі, можна шчыра сказаць, на рэштках структур краіны, якая была разбурана: адпаведных падраздзяленняў Камітэта дзяржбяспекі, Міністэрства ўнутраных спраў, групы «Альфа» і іншых сілавых структур, — нагадаў Аляксандр Лукашэнка. — Сёння ж вы маеце самую сучасную зброю, здольныя якасна вырашаць найскладанейшыя задачы ў любой кропцы Беларусі. У экстрэмальных сітуацыях гатовы дзейнічаць вытрымана, дакладна, зладжана, як і трэба спецслужбе — непрыкметна, але ў той жа час эфектыўна».

Кіраўнік дзяржавы падкрэсліў: гарантаванне бяспекі, абарона нацыянальных інтарэсаў краіны і народа — штодзённая праца супрацоўнікаў элітнага падраздзялення. «Вы знаходзіцеся штогадзінна і штохвілінна ў баявым шыхту і поўнай баявой гатоўнасці, — адзначыў ён. — Гэта ў многім вызначае прэстыж нашай суверэннай дзяржавы. А цудоўную вывучку пацвярджаюць шматлікія поспехі на міжнародных спаборніцтвах рознага ўзроўню».

Аляксандр Лукашэнка звярнуў увагу на тое, што ў тым ліку і дзякуючы Службы бяспецы Прэзідэнта сёння ў Беларусі захоўваецца мір і спакой. Разам з тым на планеце літаральна штогадзіну расце напружанасць. Накаляецца сітуацыя і паблізу нашых межаў.

«Замест «поясу добрасуседства», які мы прапаноўваем, вымалёўваецца дуга нестабільнасці, і ў гэтай сітуацыі вы павінны зрабіць усё, каб нават не даць нагоды дэструктыўным сілам разбурыць мір, які створаны на гэтай зямлі, — акцэнтаваў Прэзідэнт. — У мірны час вы не толькі забяспечваеце свой фронт работ, але і дэманструеце ўсім, асабліва ўнутры нашага грамадства, што спакой у нашай краіне — рэч сталая, мір — трывалы. У выпадку, не дай Бог, агрэсіі супраць нашай дзяржавы, задача воінаў элітнага падраздзялення — быць наперадзе ўсіх іншых, каб абараніць нашу краіну, нашу Айчыну і нашых грамадзян».

Кіраўнік дзяржавы загадаў супрацоўнікам Службы бяспекі максімальна выкарыстоўваць свой інтэлектуальны патэнцыял, пралічваць магчымыя варыянты і дзейнічаць на апераджэнне, быць непераадольнай сцяной на шляху любой пагрозы, абараніць жыцці людзей.

Прэзідэнт дадаў: «Выконваючы прафесійны абавязак на найвышэйшым узроўні, па факце вы гарантуеце нацыянальную бяспеку Беларусі. І, як бы пафасна гэта не гучала, з'яўляецеся апорай міра і стабільнасці ў нашым грамадстве».

Кіраўнік дзяржавы адзначыў, што беларусы цэняць і шануюць усіх тых, хто па поклічу сэрца справай усяго жыцця абірае самаадданае служэнне Айчыне, і заклікаў быць годнымі такога даверу.

«Упэўнены, словы, якія размешчаны на зваротным баку палотнішча Сцягу Службы бяспекі: «ДОЎГ, ГОНАР, АЙЧЫНА», — не проста дэвіз, а рэальны арыенцір для кожнага з вас», — рэзюмаваў Прэзідэнт.

Ён падзякаваў за службу ўсім дзеючым супрацоўнікам і ветэранам, пажадаў ім моцнага здароўя, шчасця і поспехаў у прафесійнай дзейнасці на дабро Беларусі.

У адказным слове начальнік Службы бяспекі Прэзідэнта Дзмітрый Шахраеў пааябяцаў прыкладаць максімум намаганняў, каб Служба заставалася прыкладам у выкананні воінскага абавязку, вернасці прысязе, а таксама прыкладам у якасным і эфектыўным выкананні пастаўленых задач.

Кіраўнік падраздзялення ўручыў Прэзідэнту памятны юбілейны медаль у гонар 25-годдзя Службы бяспекі.

Пасля гэтага Аляксандр Лукашэнка сказаў: «У краіне ёсць некалькі падраздзяленняў, якія заўсёды знаходзяцца ў поўнай баявой гатоўнасці, гэта значыць, якія цягам некалькіх секунд гатовыя выканаць свой абавязак па прызанчэнні… І памятайце, у вас заўсёды павінны быць чыстыя рукі, светлыя, чыстыя твары і вочы, бо гэта не толькі вашы рукі і вашы вочы. Гэта рукі і вочы Прэзідэнта, кіраўніка дзяржавы».

Вольга МЯДЗВЕДЗЕВА