Вы тут

Штотыднёвы спартыўны агляд «Звязды»


У штотыднёвым спартыўным аглядзе «Звязды» расказваем пра найбольш актуальныя падзеі выхадных.


1. На рахунку зборнай Беларусі па выніках дамашняга этапу Кубка свету па веласпорце на трэку дзве ўзнагароды. Залаты медаль у скрэтчы выйграў Яўген Каралёк, «бронзу» ў жаночай гонцы па ачках заваявала Таццяна Шаракова.

Нагадаем, Мінск прымаў першы ў алімпійскім сезоне этап Кубка свету па веласпорце на трэку з 31 кастрычніка да 3 лістапада. У спаборніцтвах удзельнічалі 57 камандаў з 44 краін свету. Наступны этап Кубка свету праз тыдзень будзе прымаць шатландскі Глазга.

Фота: БелТА


2. Аліна Змушко заваявала бронзавы медаль на дыстанцыі 50 м брасам на шостым этапе Кубка свету па плаванні ў Казані. Раней Змушко таксама паказала трэці вынік на дыстанцыі 100 м брасам.

Удзел у турніры ўзялі каля 200 атлетаў. Наступным стартам для беларускіх плыўцоў стане сёмы этап Кубка свету, які пройдзе 7-9 лістапада ў Досе (Катар).


3. Адбыліся матчы 27-га тура чэмпіянату краіны па футболе. Брэсцкае «Дынама» і салігорскі «Шахцёр» не выявілі пераможцу — 1:1, а футбалісты барысаўскага БАТЭ нечакана саступілі на сваёй арэне «Іслачы» — 2:4. Вынікі іншых сустрэч 27-га тура: «Тарпеда-БелАЗ» (Жодзіна) — «Дынама» (Мінск) — 4:0, «Дняпро» (Магілёў) — «Віцебск» — 2:0, «Мінск» — «Слуцк» — 1:0, «Гарадзея» — «Нёман» (Гродна) — 1:0.

Такім чынам, за тры туры да фінішу адрыў брэсцкага «Дынама» ад БАТЭ павялічыўся да сямі ачкоў. Становішча ў групе лідараў пасля 27 тураў: «Дынама» (Брэст) — 68 ачкоў, БАТЭ — 61, «Шахцёр» — 59, «Дынама» (Мінск) — 47, «Іслач» — 45, «Тарпеда-БелАЗ» — 45.

Бамбардзірскую гонку ўзначальвае Ілья Шкурын («Энергетык-БДУ»), які забіў 17 мячоў. Матчы 28-га тура пройдуць 8-10 лістапада.


4. Арына Сабаленка паднялася на 11-е месца ў рэйтынгу Жаночай тэніснай асацыяцыі. Дагэтуль беларуска займала 14-ю пазіцыю, а пасля перамогі на малым выніковым турніры WTA ў кітайскім Чжухаі перамясцілася на тры пазіцыі вышэй. Лідзіруе ў рэйтынгу Эшлі Барці (Аўстралія), на другім месцы — Караліна Плішкава (Чэхія), на трэцім — Наомі Осака (Японія).

Фота: eurosport.ru

Вікторыя Азаранка займае 50-е месца, Аляксандра Сасновіч знаходзіцца на 67-й пазіцыі, у Вольгі Гаварцовай 194-е месца, Вера Лапко займае 328-ы радок сусветнага рэйтынгу.


5. Брэсцкі гандбольны клуб імя Мяшкова пацярпеў пятае паражэнне ў Лізе чэмпіёнаў, саступіўшы ў гасцях македонскаму «Вардару» — 31:36. Самым выніковым у складзе БГК стаў Мікіта Вайлупаў, які закінуў дзевяць мячоў. Такім чынам, у шасці праведзеных гульнях беларускі клуб атрымаў толькі адну перамогу, абыграўшы ў сябе дома ўкраінскі «Матор» з Запарожжа.

Турнірнае становішча ў групе зараз такое: «Кіль» — 11 ачкоў, «Вардар» — 8, «Віве» — 7, «Манпелье» — 7, «Веспрэм» — 6, «Порту» — 6, БГК — 2, «Матор» — 1.

БГК свой наступны паядынак Лігі чэмпіёнаў правядзе 9 лістапада ў сябе дома супраць «Веспрэма».

Дар'я Лабажэвіч

Загаловак у газеце: Адкладзенае чэмпіёнства

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».