У Мінску пройдзе Міжнародны Марафон паспяховых практык па рабоце з моладдзю

У Мінску пройдзе Міжнародны Марафон паспяховых практык

па рабоце з моладдзю

12 лістапада (аўторак) з 10:00 да 16:00 у ДУА «Рэспубліканскі інстытут вышэйшай школы» пройдзе Марафон паспяховых практык спецыялістаў у сферы арганізацыі работы з моладдзю.

У Марафоне прымуць удзел спецыялісты прадпрыемстваў, устаноў адукацыі, лідары і актывісты маладзёжных і дзіцячых грамадскіх аб’яднанняў, некамерцыйных арганізацый, супрацоўнікі рэгіянальных дзяржаўных органаў, якiя ажыццяўляюць дзяржаўнае рэгуляванне і кіраванне ў сферы маладзёжнай палітыкі.

Мэта Марафону – выяўленне і распаўсюджванне паспяховых практык у сферы работы з моладдзю, абмен перадавым вопытам і абмеркаванне перспектыў супрацоўніцтва з калегамі з краін СНД.

«Марафон праходзіць у трэці раз і збярэ ў гэтым годзе больш за 100 удзельнікаў з усёй Беларусі. Таксама ў працы Марафону возьмуць удзел 25 спецыялістаў у галіне арганізацыі работы з моладдзю з краін СНД, стажыроўку якіх з 11 па 13 лістапада прымае РІВШ», – адзначае Алена Стэфанаўна Ігнатовіч, кандыдат педагагічных навук, загадчык кафедры маладзёжнай палітыкі і сацыякультурных камунікацый ДУА «Рэспубліканскі інстытут вышэйшай школы».

Праграма Марафону ўключае экспрэс-прэзентацыі, актыўны абмен вопытам, працу інтэрактыўных і тэматычных пляцовак, якія адпавядаюць асноўным напрамкам праекта Стратэгіі дзяржаўнай моладзевай работы 2030: адукацыя, праца, здароўе, сям’я, бяспека, вольны час і творчасць.

Абмен вопытам і абмеркаванне перспектыў супрацоўніцтва з замежнымі калегамі пройдзе падчас круглага стала «Маладзёжная палітыка ў СНД», воркшопа «Стратэгічныя прыярытэты развіцця дзяржаўнай маладзёжнай палітыкі на нацыянальных узроўнях: кейс Рэспублікі Беларусь», пошукавага дыялогу «Стратэгічныя перспектывы маладзёжнага супрацоўніцтва дзяржаў-удзельніц СНД: рэалізацыя патэнцыялу моладзі ў мэтах устойлівага развіцця».

Даведачна: Арганізатар Марафону – кафедра маладзёжнай палітыкі і сацыякультурных камунікацый ДУА «Рэспубліканскі інстытут вышэйшай школы» (РІВШ) пры ўдзеле Грамадскага аб’яднання спецыялістаў па рабоце з моладдзю. Марафон праводзіцца пры падтрымцы Міністэрства адукацыі Рэспублікі Беларусь.

Кантакты для СМІ: +375 29 314 12 79 Алена Ігнатовіч

ДУА РІВШ, г. Мінск, вул. Маскоўская, 15, каб 321