Вы тут

Нататкі шматдзетнага таткі


Вера:

— Тата, а ты ведаеш, што выйшаў новы мульцік пра Прастаквашына і там з'явілася маленькая дзяўчынка, якую завуць Вера Паўлаўна?


— Так? А прозвішча ў яе выпадкова не Холад?

— Не ведаю.

Дзеля інтарэсу вырашыў высветліць «радаслоўную» мульцяшнай Веры Паўлаўны:

— Гэта атрымліваецца, што яна дачка Дзядзькі Фёдара, ці што?

— Не, сястра.

Поля няўпэўнена:

— А па-мойму, дачка...

Вера:

— Поля, гэта дакладна яго сястра.

(Калі двайняткі пачынаюць спрачацца, выйсце заўсёды адно: спытацца аб прадмеце спрэчкі ў «Гугла».)

У выніку адпаведнага запыту мы высветлілі, што Вера Паўлаўна і праўда малодшая сястра Дзядзькі Фёдара. Таму, выходзіць, мая Вера Паўлаўна мела рацыю.

Пры гэтым падчас «даследавання» высветліўся іншы цікавы нюанс: згодна з мультфільмам, тату Веры Паўлаўны (і, адпаведна, Дзядзькі Фёдара) чамусьці завуць... Дзмітрый (?!). На гэту невялікую няўвязачку стваральнікі мультфільма ўвагі, відаць, не звярнулі.

Цяпер, каб выправіць прыкрую памылку, яны абавязкова павінны ўвесці ў наступнай серыі новы персанаж: нейкага Паўла, роднага бацьку Веры Паўлаўны. А можа, чым чорт не жартуе, і Дзядзькі Фёдара (нездарма ж ад нас столькі гадоў хаваюць яго імя па бацьку).

А пакуль, згадзіцеся, сямейка атрымліваецца, мякка кажучы, дзіўная: хлопчык па імені Дзядзька Фёдар, малая Вера Паўлаўна і іх тата Дзмітрый (так і хочацца сказаць «Ілжэдзмітрый»).

P. S. У гэтай неаднастайнай кампаніі толькі Шарык з Матроскіным выглядаюць больш-менш нармальнымі людзьмі.

☺☺☺

Двайняткі за кухонным сталом лепяць з пластыліну нейкія фігуркі. Раптам Вера бярэ сальніцу і пасыпае пластылін соллю.

Я, здзіўлена:

— Ты навошта пластылін соліш?

— Каб Ксеня яго не ела.

— А яна яго есць?

— Так.

— Усё роўна не салі, раптам ён з соллю яшчэ смачнейшы будзе?

— А што тады рабіць?

— Проста не давайце ёй пластылін.

Сказаў, а самога так і падмывае пакаштаваць: спачатку з соллю, потым без (ці наадварот). За апошнія сорак гадоў я, сорамна сказаць, зусім забыўся на смак пластыліну.

P. S. Хоць па старой памяці здаецца, што наяўнасць або адсутнасць солі ў гэтым выпадку непрынцыповая.

Павел Холад

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».