Вы тут

Як паўдзельнічалі гарады ў сёлетнім Еўрапейскім тыдні мабільнасці?


На працягу сямі дзён жыхары сотняў гарадоў з 45 краін Еўропы, у тым ліку і 76 беларускіх гарадоў, дэманстравалі альтэрнатыўныя аўтамабілю спосабы і сродкі перамяшчэння ў гарадскім асяроддзі. Сярод найлепшых быў названы пасёлак Лагішын Пінскага раёна.


— У пасёлку панавала асаблівая атмасфера. Нас, яго жыхароў, перапаўнялі гонар і пачуццё адказнасці за дачыненне да важнай міжнароднай справы. Сярод лагішынцаў абыякавых да ідэй тыдня не было. Амаль усе жыхары ў той ці іншай ступені імкнуліся паўдзельнічаць у яго мерапрыемствах, — паведаміла Ірына Петруковіч, кіраўнік спраў Лагішынскага сельскага Савета ў час сваёй прэзентацыі на канферэнцыі, прысвечанай вынікам Еўрапейскага тыдня мабільнасці (ЕТМ) — 2019.

У сувязі з гэтым цікава прасачыць штогадовую дынаміку ўдзелу Беларусі ў тыдні мабільнасці. Наша краіна адносна нядаўна далучылася да яго. Нагадаем, у 2015 годзе ў ЕТМ удзельнічалі толькі Мінск, Полацк і Наваполацк, у 2016-м ужо 19 гарадоў, у 2017-м — 46 гарадоў і населеных пунктаў, у 2018-м — 66. Далучаліся ў пераважнай большасці абласныя і раённыя цэнтры, гарады абласнога падпарадкавання.

А гарадскі пасёлак Лагішын з насельніцтвам прыкладна 2200 чалавек нароўні з куды большымі гарадамі яскрава і крэатыўна ўдзельнічае ў Еўрапейскім тыдні мабільнасці. У сэнсе прыцягнення невялікіх населеных пунктаў да глабальных экалагічных акцый і маштабных кампаній досвед Лагішынскага сельсавета і прывабны, і варты вывучэння і пераймання. Гэта тым больш актуальна на фоне шэрагу гарадоў з куды большымі магчымасцямі і насельніцтвам, якія фармальна далучыліся да кампаніі, падпісалі паперы, а па сутнасці нічога істотнага не зрабілі для папулярызацыі альтэрнатыўнага аўтамабілю руху на гарадскіх дарогах.

Сёлета тэма тыдня мабільнасці ў Лагішыне была прысвечана, як і ўсюды ў краіне, прыцягненню ўвагі і засвойванню мясцовым насельніцтвам бяспечных пешых і веласіпедных маршрутаў.

— У рамках тыдня мабільнасці быў праведзены шэраг загадзя прадуманых і спланаваных разам з райсаветам мерапрыемстваў. У гэтым нам вельмі дапамаглі супрацоўнікі аддзелаў і арганізацый райвыканкама. Мы імкнуліся сумесна падрыхтаваць цікавую і разнастайную праграму. Яна, па водгуках жыхароў пасёлка, атрымалася. На працягу тыдня праводзіліся мэтавыя мерапрыемствы. Гэта экалагічная квэст-гульня «Зялёная планета», майстар-клас, конкурс знаўцаў правіл дарожнага руху на тэму «Веласіпед і дарога». Завяршыўся тыдзень мабільнасці велапрабегам, — расказвае старшыня сельсавета Валерый Шушко.

У той дзень сапраўдныя прыхільнікі здаровага спосабу жыцця Лагішына сабраліся каля мясцовай АЗС. Сярод іх былі заўважаны, у прыватнасці, намеснік старшыні райвыканкама Дзмітрый Палхоўскі, старшыня сельсавета Валерый Шушко, работнікі ААТ «Лагішын», навучэнцы і дырэктар Лагішынскай сярэдняй школы Сяргей Норбут і іншыя. Усяго ў велапрабегу ўдзельнічалі 15 прадпрыемстваў і арганізацый пасёлка. Самай шматлікай аказалася каманда школы, якую прадстаўлялі і педагогі, і тэхнічныя работнікі, і навучэнцы. Веласіпедысты праехалі па вуліцах Леніна, Дзяржынскага, Свярдлова, Сацыялістычнай і фінішавалі каля маладзёжнага цэнтра культуры. Яго супрацоўнікі, дарэчы, у падтрымку ідэй мабільнасці правялі флэшмоб «Мабільнасць і актыўнасць, здароўе, крэатыўнасць» пад дэвізам «Выбірай і рухайся!»

Гэта толькі на першы погляд здаецца, што проста пераканаць заўзятага аўтамабіліста кінуць любімага «жалезнага каня» і перасесці на веласіпед. Паводле слоў начальніка аддзела арганізацыі дарожнага руху і дарожнай інспекцыі УДАІ МУС Беларусі Дзмітрыя Навоя, сёння веласіпедыстам нярэдка даводзіцца сутыкацца з праявамі так званага шавінізму кіроўцаў. Ёсць сярод іх агрэсіўная меншасць, якая з прычыны недасведчанасці ці прабелаў у адукацыі і выхаванні не ўспрымае актуальнасці стварэння ўстойлівай гарадской мабільнасці. Іх трэба пераконваць і пераконваць.

Тут неабходна падкрэсліць, што на самым пачатку, калі лагішынская мясцовая ўлада вагалася наконт далучэння да Еўрапейскага тыдня мабільнасці, яе падтрымаў Іван Рабкавец, дэпутат Палаты прадстаўнікоў Нацыянальнага сходу Беларусі. Ён прапанаваў: давайце паспрабуем. Першы блін не быў камяком. І ўжо трэці год запар Лагішын становіцца актыўным і паспяховым удзельнікам ЕТМ.

— У раёне гэта новая практыка работы сельскага Савета. У яго дэпутатаў увогуле шмат чаго з задуманага атрымоўваецца. Чаму? Умеюць знайсці падыход да людзей. Дзякуючы намаганням сельсавета пасёлак прыгожы, утульны, з добрай інфраструктурай, амаль усе дарогі заасфальтаваны. Не сорамна гасцям паказаць. Між іншым, першымі ў раёне высаджваць кветкі на вуліцах пачалі менавіта ў Лагішыне. Ёсць тут дзе адпачыць у вольны час моладзі. Дом міласэрнасці — прадмет асаблівага клопату і гонару дэпутатаў, — расказвае старшыня Пінскага раённага Савета дэпутатаў Іосіф Гузіч.

На яго думку, пасёлак развіваецца ў правільным кірунку. І, відаць, недарэмна Лагішын разглядаецца цяпер у якасці кандыдата на месца правядзення абласных дажынак у 2021 годзе. Давераць — сельсавет абавязкова справіцца.

Леанід Лахманенка

Загаловак у газеце: Рухацца ў правільным кірунку

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.